2019-03-09 08:10:00

شه‌فه‌ق نيوز/ ئه‌نداميگ له‌ په‌رله‌مان عراقى له‌بان ره‌وت خاسسازى، ئاشكراى ئه‌وه‌ كرد عادل عه‌بدولمه‌هدى سه‌رۆك وه‌زيره‌يل ماوه‌ى چه‌ن رووژيگه‌ تويش فشاره‌يل فريه‌يگ هاتگه‌ وه‌رانوه‌ر پۆسته‌يل تر له‌ ده‌وڵه‌ت وه‌ناو ماف پيكهاته‌و نوێنه‌رايه‌تى و ماف هه‌ڵوژاردن.

 

له‌ى باوه‌ته‌و ئه‌لعه‌ره‌بى ئه‌لجديد له‌ زووان ئه‌و ئه‌ندامه‌و وت: به‌رنامه‌ حكوميه‌گه‌ى عه‌بدولمه‌هدى ك په‌سه‌ن كريا، تويش ئاڵشتكراى فريه‌يگ هاتگه‌ ك خاونه‌يلێ زياتر له‌ 6 ساڵه‌ وه‌رده‌وام بوينه‌ وه‌ل پۆسته‌يل وه‌ وه‌كاله‌ت و ئيه‌يش باس له‌ جموجيل حزبه‌يل و فراكسيۆنه‌يل سياسى ئه‌كريه‌ێد و هه‌ر لايه‌نيگ له‌ليان به‌ش خوه‌ێ ئه‌خوازێد له‌و پۆسته‌يله‌ ك ناونى نانه‌ ماف پيكهاته‌ يا چين و تايفه‌ له‌چوارچێوه‌ى ئه‌و مسته‌ڵحه‌يله‌ ك خوه‌يان ئه‌يه‌رنه‌ى كار له‌وه‌ر به‌رژه‌وه‌ندى حزبى.

 

باس له‌وه‌يش كرد هيزه‌يل عه‌ره‌ب سنى وه‌و ريڕه‌و گام نه‌ن له‌ژير ناونيشان ماف پيكهاته‌و هيزه‌يل كورديش چشتيگ له‌و جووره‌ كارا ئه‌كه‌ن و حزبه‌يل شيعه‌يش باس له‌وه‌ ئه‌كه‌ن ئنساف نه‌كريانه‌ له‌ دابه‌شكردن وه‌زارى و داواى پۆسته‌يل تر ئه‌كه‌ن له‌ پۆسته‌يل تايبه‌ت و جه‌ختيش له‌وه‌ كرد سه‌رۆك وه‌زيره‌يل پايه‌ند بويه‌ وه‌ كووتاييهاوردن وه‌ دوسيه‌ى ئداره‌كردن پۆسته‌يل حكومى وه‌ وه‌كاله‌ت وه‌رجه‌ هاتن حزه‌يران ئاينده‌ وه‌ بوونه‌ى وجوود به‌نديگ له‌ بودجه‌ ك په‌يوه‌سه‌ وه‌پيه‌و، ك يه‌يش ماناى ئه‌وه‌سه‌ جه‌نگ پۆسته‌يل تايبه‌ت ده‌س وه‌پى ئه‌كا.

YesIraq