په‌روه‌رده‌ مادده‌ى "ئسلامى" ئه‌را به‌كالۆريا وسان و باس له‌ كه‌مه‌وكردن پرۆگرام ئه‌كا

Category: هــــه‌واڵ عــیراق

Date: 2020-04-01T10:16:47+0000

شه‌فه‌ق نيوز/ ليژنه‌ى په‌روه‌رده‌ى نوێنه‌رايه‌تى، ئاشكراى لايه‌نگرى بڕيار وه‌زاره‌ت په‌روه‌رده‌ كرد له‌باره‌ى وسانن مادده‌ى ئسلامى پۆل شه‌ش ئاماده‌يى و ئاماژه‌يش وه‌ ئه‌وه‌ كرد ئه‌و مادده‌ كاريگه‌رى نه‌يرێد له‌بان موعه‌ده‌ل خوه‌ندكاره‌يل.

 

له‌ى باوه‌ته‌و، عه‌باس زاملى ئه‌ندام ليژنه‌گه‌ ئه‌را شه‌فه‌ق نيوز وت: بڕيار وه‌زاره‌ت په‌روه‌رده‌ له‌باره‌ى وسانن مادده‌ى ئسلامى پۆل شه‌ش ئاماده‌يى و تيكه‌ڵكردن هه‌ردوگ مادده‌ى ئسلامى و عه‌ره‌بى، و فيزيا و كيميا پۆل سێى ناوه‌ندى دوياى پيشنياره‌يليگ هاتگه‌ ك زويتر تاوتوێ كرياگه‌ له‌ناونى ليژنه‌گه‌ و وه‌زاره‌ته‌گه‌.

 

باس له‌وه‌يش كرد وسانن يه‌ك مادده‌ هويچ كاريگه‌رييگ نه‌يرێد له‌بان موعه‌ده‌ل خوه‌ندكاره‌گه‌، چوينكه‌ جه‌م نمره‌يل له‌ تاقيكردن به‌كالۆريا له‌بان شه‌ش مادده‌ مه‌زه‌نه‌ ئه‌كريه‌ێد نه‌ك هه‌فت مادده‌ و يه‌يش ده‌رخست ك وسانن مادده‌گه‌ وه‌ بوونه‌ى دوياكه‌فتن سه‌ره‌تاى ساڵ خوه‌نين و بارودوخه‌گه‌ بويه‌ ك عراق وه‌پيه‌و گوزه‌ر كرد، بيجگه‌ پشووه‌يل خوه‌نين و قه‌يه‌غه‌ى هاتوچوو.