2019-02-19 16:46:00

شه‌فه‌ق نيوز/ به‌شير حه‌داد جيگر سه‌رۆك ئه‌نجومه‌ن نوێنه‌ريل عراق، پيشوازى له‌ شانديگ كرد ك پيكهات له‌ سه‌رۆك هووزه‌يل و كه‌سايه‌تيه‌يليگ له‌ كورده‌يل فه‌يلى و له‌و ديداره‌ باس له‌ بارودوخ و گوزران فه‌يليه‌يل كريا له‌سه‌رجه‌م ناوچه‌يل عراق و ئه‌و كاره‌ساته‌يله‌ ك هاته‌سه‌ تويش ئى پيكهاته‌و زه‌فتكردن مافه‌يليان له‌ ده‌يه‌يل وه‌رين.

 

حه‌داد له‌ ديداره‌گه‌ گووش له‌ قسه‌يل ئه‌و شانده‌ گرت ك له‌تى باس له‌ راده‌ى مه‌ينه‌تيه‌يل كورد فه‌يلى و ئه‌و زوڵم و سته‌مه‌ كريا ك هاته‌سه‌ تويشيان وه‌بى وه‌رگرتنه‌وه‌ى مافه‌يليان و هاوردنه‌وه‌ى ره‌گه‌زنامه‌يل عراقييان و ماڵ وموڵكه‌يل زه‌فتكرياگيان له‌ سه‌رده‌م رژيم وه‌رين.

 

له‌و باوه‌ته‌و جيگر سه‌رۆك په‌رله‌مان له‌ به‌ياننامه‌يگ ئه‌را شه‌فه‌ق نيوز وت: كورده‌يل فه‌يلى پيكهاته‌يگن ره‌سه‌ن له‌ پيكهاته‌يل ملله‌ت عراقى و هه‌وڵ ئه‌يه‌يم ئه‌را ئنسافكردن ئى پيكهاته‌ى زوڵمليكرياێ و هاوردنه‌وه‌ى مافه‌يل ره‌وايان له‌ڕێ داناين بڕيار و ياساى جيوه‌جيكار و رينماييكردن ده‌زگايه‌يل ده‌وڵه‌ت ئه‌را هاوردنه‌وه‌ى ماڵ وموڵكه‌يل و چاودێرى ئه‌و خيزانه‌يله‌ ك زه‌ره‌دمه‌ن بوينه‌.

YesIraq