2019-01-07 06:18:00

شه‌فه‌ق نيوز/ عادل عه‌بدولمه‌هدى سه‌رۆك وه‌زيره‌يل عراق، سه‌ردان جاده‌ى ره‌شيد كرد له‌ ناوڕاس به‌غداى پايته‌خت.

 

نويسينگه‌ى ره‌سانن سه‌رۆك وه‌زيره‌يل له‌ به‌ياننامه‌يگ وت: عه‌بدولمه‌هدى له‌و گه‌شته‌ ته‌ماشاى كاره‌يل وه‌رده‌وام كردگه‌ ئه‌را هاوردنه‌وه‌ى ژيان و تازه‌كردنه‌وه‌ى جاده‌يل و لاوردن ديواره‌يل كۆنگريتى له‌تيان.

 

به‌ياننامه‌گه‌ وت: عه‌بدوله‌هدى چه‌وى كه‌فته‌سه‌ شماره‌يگ له‌ هاووڵاتيه‌يل ك خوه‌شاڵى خوه‌يان ده‌رخستنه‌ وه‌ هه‌وڵه‌يل ئه‌را وازكردن ڕيگه‌و جاده‌يل و چالاكه‌وكردن كار و زينگه‌وكردن ناوچه‌يل كلتوورى له‌ به‌غداى پايته‌خت.

 

جاده‌ى ره‌شيد كويه‌نترين و ناودارترين جاده‌يليگه‌ له‌ به‌غدا ك له‌وه‌خت حوكم عوسمانيه‌يله‌ وه‌ناو جاده‌ى(خه‌ليل پاشا جاده‌ سى)ناسريا وه‌ناو خه‌ليل پاشاى حاكم به‌غدا و سه‌ركرده‌ى سوپاى عوسمانى ئه‌وسا ك جاده‌و ريگه‌يل فراوانه‌و كرد و ئه‌و جاده‌يشه‌ ك له‌ باب شه‌رقيه‌و دريژه‌و ئه‌دێ تا باب موعه‌زه‌م له‌ساڵ 1910 وه‌ناو ئه‌وه‌و دانريا.

 

جى باسه‌، ئه‌و جاده‌ بڕيگ مزگفت كلتوورى له‌خوه‌ى گرتگه‌ جوور مزگفت حه‌يده‌ر خانه‌ ك داود پاشا له‌ساڵ 1819 دروسى كرد و مزگفت مه‌رجان و مزگفت سه‌يد سوڵتان عه‌لى و مزگفت حسێن پاشا، يه‌يش بيجگه‌ بازاڕه‌يليگ كويه‌ن و له‌وانه‌يش بازاڕ هه‌ره‌ج و بازاڕ سه‌راى.

YesIraq