2019-02-28 07:28:00

شه‌فه‌ق نيوز/ سه‌رۆك هووزه‌يل شار سامه‌ڕا، ئاشكراى ره‌ته‌وكردن خوه‌يان كردن له‌ باره‌ێ ده‌خاڵه‌ت له‌ يه‌كگرتگێ پاريزگاى سه‌ڵاحه‌دين و تاوان خستنه‌ بان موسه‌نا عه‌بدولسه‌مه‌د ئه‌نجومه‌ن نوێنه‌ره‌يل سه‌باره‌ت وه‌ قه‌يرانه‌يل سياسه‌ت له‌ پاريزگاگه‌.

 

له‌ى باوه‌ته‌و، وه‌ليد عه‌زاوى يه‌كيگ له‌ سه‌رۆك هووزه‌يل عه‌زه‌ له‌ سامه‌را وت: سه‌ڵاحه‌دين له‌ دوجيڵ تا شه‌رگات يه‌ك حاڵه‌ته‌و هه‌ر كۆنگره‌يگ يا لێدوانيگ ك داواى شيوانن يه‌كگرتگيمان بكا ره‌ته‌و ئه‌كه‌يم و داوايش له‌ سياسيه‌يل له‌ پاريزگاگه‌ كرد ناكووكيه‌يليان بخه‌نه‌ كنار و خزمه‌ت وه‌ شاره‌يل ويرانكرياگيان بكه‌ن.

 

لاى خوه‌يه‌و عه‌بدوڵڵا عه‌باسى سه‌رۆك له‌ ئه‌شره‌ت ئه‌لبوعه‌باس له‌ سامه‌ڕا وت: كۆنگره‌ى موسه‌نا عه‌بدولسه‌مه‌د نوێنه‌رايه‌تى مه‌ردم سامه‌ڕا ناكا و رينمايه‌يلى سياسى و حزبايه‌تيه‌ و سامه‌ڕايش به‌شيگه‌ له‌ سه‌ڵاحه‌دين و دابه‌شكردنى ره‌ته‌و ئه‌كه‌يم و روێ هه‌ر كه‌سيگيش وسيه‌يم ك داواى دابه‌شكردنى بكا جوور ئه‌وه‌گ وه‌ هه‌رێمكردنى ره‌ته‌و كرديم.

 

جى باسه‌، راپۆرته‌يل رووژنامه‌گه‌رێ باس له‌وه‌ كردن موسه‌نا عه‌بدولسه‌مه‌د سه‌رۆك حزب مه‌سار مه‌ده‌نى و ئه‌ندام به‌يان سامه‌ڕا داواى ئه‌وه‌ كردگه‌ شاره‌گه‌ بكريه‌ێده‌ پاريزگايگ جيا له‌ سه‌ڵاحه‌دين.

YesIraq