2018-09-24 07:20:00

شه‌فه‌ق نيوز/ رووژنامه‌ى شه‌رقولئه‌وسه‌ت له‌نده‌نى، وت: پارت ديموكرات كوردستان كانديد خوه‌ى پيشكه‌ش كردگه‌ ك ئه‌ويش فوئاد حسێن سه‌رۆك ديوان سه‌رۆكايه‌تى هه‌رێم كوردستانه‌و يه‌كيگه‌ له‌ كه‌سه‌يل نزيك له‌ مه‌سعود بارزانى سه‌رۆك پارته‌گه‌ تا بدێده‌ ركابه‌ر هه‌يشته‌م له‌ ركابه‌رى سه‌رۆكايه‌تى و شايه‌ت ركابه‌ر قايم وه‌رانوه‌ر به‌رهه‌م ساڵح كانديد يه‌كێتى نيشتمانى كوردستان.

 

حسێن پۆست سه‌رۆك ديوان سه‌رۆكايه‌تى هه‌رێم ديرێد له‌ساڵ 2005ه‌و، كورديگه‌ فه‌يلى له‌ساڵ 1952 له‌ به‌غدا هاته‌سه‌ دونياو باوه‌ڕنامه‌ى دكتۆرا ديرێد و بيجگه‌ هه‌ردوگ زووان كوردى و عه‌ره‌بى هه‌ردوگ زووان ئنگليزى و فره‌نسييش زانێد، ك پارتى كانديدى كرد ئه‌را پۆست سه‌رۆكايه‌تى.

 

رووژنامه‌ وت: بايه‌س بوێ هه‌ڵوژانن سه‌رۆك كۆمار بخرياتاده‌ خشته‌ى كاره‌يل دانيشتن په‌رله‌مان عراق ك سوو سێشه‌ممه‌ ئه‌نجام ئه‌گرێد، وه‌لێ سه‌ردان محه‌مه‌د حه‌لبوسى سه‌رۆك په‌رله‌مان ئه‌را هه‌ولێر و ديدارى وه‌ل سه‌رۆك پارت ديموكرات كوردستان و جيگره‌گه‌ى و گه‌ورا وه‌رپرسه‌يل تر و گله‌وخواردنى گورج ئه‌را به‌غدا له‌ هه‌مان رووژ و سه‌ردان له‌ناكاو نێچيروان بارزانى جيگر سه‌رۆك پارت ديموكرات ئه‌را به‌غدا له‌ هه‌مان شه‌و شايه‌ت بڕگه‌ى هه‌ڵوژانن سه‌رۆك كۆمار له‌ خشته‌ى كاره‌يل په‌رله‌مان لاورد.

YesIraq