2020-02-27 08:35:30

شه‌فه‌ق نيوز/ وه‌زاره‌ت ته‌ندروستى و ژينگه‌ى عراقى، ئاشكراى تۆماركردن حاڵه‌تيگ تر تويشهاتن وه‌ ڤايرۆس كۆرۆنا كرد له‌ به‌غداى پايته‌خت ئه‌را جايه‌ڵيگ ك له‌ ئيران هاته‌سه‌و.

 

له‌ى باوه‌ته‌و، سه‌يف به‌در قسه‌كه‌ر وه‌ناو وه‌زاره‌ته‌گه‌ له‌ به‌ياننامه‌يگ وت: وه‌زاره‌ته‌گه‌ ئاشكراى كردگه‌ ك جايه‌ڵيگ له‌ به‌غدا تويش ڤيرۆس كۆرۆنا ى تازه‌ هاتگه‌ ك له‌ئيرانه‌و گله‌و خواردگه‌ و له‌يه‌كيگ له‌ ده‌زگايه‌يل ته‌ندروستى له‌ به‌غدا تاقييه‌و كرياگه‌و خرياسه‌ غورفه‌ى تايبه‌ت و ده‌ركه‌فتگه‌ ك وه‌ كۆرۆنا تويشهاتگه‌.

 

به‌در باس له‌وه‌يش كرد ئه‌و جايه‌ڵه‌ ته‌ندروستيى خاسه‌و ها له‌يه‌كيگ له‌ نه‌خوه‌شخانه‌يل تايبه‌ت له‌ به‌غدا و گشت رێوشوونه‌يل خواستيگ وه‌رانوه‌رى گيرياسه‌ وه‌ر ئه‌را چه‌وديريكردن حاڵه‌ته‌گه‌ێ وه‌گووره‌ى رينمايه‌يل ته‌ندروستى جه‌هانى.

}