تۆمارکردن ٢٤ مردن و زیاتر لە ٢٠٠ تووشهاتگ وە کۆڕۆنا لە باشوور عراق

Category: هــــه‌واڵ عــیراق

Date: 2020-06-27T14:02:02+0000

شەفەق نیوز/ پارێزگای زیقار له‌ باشوور عراق، ئمڕو شەممە، بەرزەوبوین گەورایگ تۆمارکرد لە هەژمار مردگەیل وە ڤایڕۆس کۆرۆنا، لە وەختیگ وەڕیەوبەر خەسەخانەی حسێن هووکارەیی دەسکیشا لە پۆستەگەی، لەئەنجام خراوبوین رەوشە تەندروسیەگەی.
سەرچەوەیگ پزشکی ئەرا ئاژانس شەفەق نیوز وت: فەرمانگەی تەندروسی زیقار ئمڕوو ١٩ مردن و ١٥٧ تووشهاتگ و ٨٥ خاسەوبوی لە ڤایڕۆس کۆڕۆنا تۆمارکرد.
لەلای خوەیەو راجی یاسری وەڕیەوبەر خەسەخانەی حسێن دەسکیشانەوەی خوەی خستە وەردەس وەڕیەوبەر تەندروسی زیقار ئەرا دەرچگنی لە پۆستەگەی.
یاسری وەگورەی بەڵگەنامەیگ وت: داواکردنی وە کیشانەوەی لە پۆستەگەی لە ئەنجام خراوبوین رەوشە تەندروسیەگەی هات. ودووپاتکرد ؛ توانای وەردەوامی لە کار نەیرێد، و سەرچەوەیگ لە فەرمانگەی تەندروسی ئاماژەدا ک بڕیار لە رزامەنی لاوردن یاسری تا ئیسە نەدریاگە.
سەرچەوەیگ پزشکی ئەرا ئاژانس شەفەق نیوز وت: دکتۆر حسێن کەنزاوی دانریا وە وەڕیەوبەر خەسەخانەی هوکارەیی حسێن.
لە میسان، سەندیکای پزشکەیل، ئمڕوو شەممە، ئاشکراکرد لە زیایبوین تووشهاتن وە ڤایڕۆس کۆڕۆنا لەناو پزشکەیل و کارمەنەیل لە خەسەخانەیل پارێزگاگە.
دکتۆر سەعەد لامی وەرپرس لق سەندیکاگە لە بەیاننامەیگ رەسیە ئاژانس شەفەق نیوز وت: شماره‌ی تووشهاتنەگان رەسیە ٤٦ پزشک، ودیاری کرد ک هەژمار پزشکەیل خاسەوبوی لە بیماریەگە بویە ١٧ پزشک. ودووپاتکرد ک پزشکەیل دویای ماوەی هوچانیگ لە تووشهاتنەگە روی کەنە پەخشین وە پلازمای خوین، تا بچەسپنن ک خویان پڕۆژەی دەسوازی و وفادارین ئەرا مه‌ردم ئی وڵاتە لە بیمارییان و تەندروسییان.
لامی لە گشت هاووڵاتیەیل داواکرد وە پابەندی رینما تەندروسیەگان وە دویرەوکەفتن کۆمەڵایەتی و وەکارهاوردن دەمامەک و تەمیسکردن دەسەیل و دویرەوکەفتن لە گردەوبوینەگان، ئەرا مقەیەتی سەڵامەتییان و نواگردن لە بڵاوبەین پەتاگە.
لە پارێزگای بەسرە، سەرچەوەیگ پزشکی وەرپرس وت: پەنج تووشهاتگ وە ڤایڕۆس کۆرۆنا ئمڕوو مردن