2018-10-15 17:15:00

شه‌فه‌ق نيوز/ ليوا سعه‌د معه‌ن قسه‌كه‌ر وه‌ناو وه‌زاره‌ت ناوخوه‌يى عراقى، ئاشكراى ده‌سگيركردن تووڕيگ له‌ تيرۆريسته‌يل سه‌ر وه‌ ريكخرياگ داعش كرد له‌ پاريزگاى نه‌ينه‌وا.

 

معه‌ن له‌ به‌ياننامه‌يگ ئه‌را شه‌فه‌ق نيوز وت: وه‌ڕيه‌وبه‌رايه‌تى پۆليس كه‌رامه‌ سه‌ر وه‌ سه‌ركردايه‌تى پۆليس نه‌ينه‌وا وه‌گووره‌ى ده‌سكه‌فتن زانيارى هه‌واڵگرى پڕ دقه‌تيگ و چه‌وديرييگ وه‌رده‌وام تويه‌نستگه‌ چوار كه‌س له‌ چه‌ته‌يل داعش ده‌سگير بكا ك گشتيان له‌چوارچێوه‌ێ يه‌ك تووڕ كار كردنه‌.

 

معه‌ن وت: ئه‌و تووڕه‌ له‌ ناوچه‌ى حه‌يولعه‌ده‌ن له‌ ديم چه‌پ شار موسڵ ده‌سگير كريانه‌و يه‌كيگ له‌ليان له‌ ديوان عقارات كار كردگه‌و ئه‌ركه‌ سه‌ره‌كيه‌گه‌ێ شماردن ماڵه‌يل سه‌ر وه‌ كارمه‌نده‌يل ده‌زگاى ئه‌منى و ئه‌و خيزانه‌يله‌ بويه‌ ك له‌ موسڵ واين و ماڵ و موڵكيان زه‌فت كرياو دريانه‌ خيزانه‌يل داعش.

YesIraq