يه‌كه‌م سه‌رچه‌وه‌ى ده‌ركه‌فتن ڤايرۆس كۆرۆنا ئاشكرا كريا

Category: هــــه‌واڵ جیــهانى

Date: 2020-04-19T10:13:43+0000

شه‌فه‌ق نيوز/ تيميگ له‌ زانايه‌يل له‌ زانكۆى كامبريدج بريتانى، ئاشكراى ئه‌وه‌ كردن يه‌كه‌م ده‌ركه‌فتن ڤايرۆس كۆرۆنا له‌ مانگ سپته‌مبه‌ر گوزه‌يشت بويه‌ له‌ باشوور چين نه‌ك له‌ شار وۆهان له‌ ناوڕاس چين، جوور ئه‌وه‌گ رووژنامه‌ى ده‌يلى مه‌يل بريتانى ئاماژه‌ وه‌پى كردگه‌.

 

له‌ى باوه‌ته‌و، توێژه‌ره‌يل ك په‌يجوورى له‌ بنه‌ڕه‌ت ڤايرۆسه‌گه‌ ئه‌كه‌ن، ره‌سينه‌سه‌ ده‌رئه‌نجامه‌يليگ له‌رێ تاقيكردن شماره‌ى فريه‌يگ له‌ سولاله‌ى ڤايرۆسه‌گه‌ له‌ لاشه‌ى نه‌خوه‌شه‌يل له‌ گشت جه‌هان و ئه‌وه‌ ئه‌رايان ده‌ركه‌فتگه‌ ك ده‌ركه‌فتن ئى ڤايرۆسه‌ له‌ سه‌ره‌تاو يه‌كه‌مجار له‌ ماوه‌ى 7 تا 13 سپته‌مبه‌ر ده‌ركه‌فتوێد نه‌ك له‌ كوتايى سپته‌مبه‌ر جوور ئه‌وه‌گ حكومه‌ت چينى باسى كردگه‌.

 

بيته‌ر فۆرسته‌ر زانا له‌ زانكۆى ناوبرياێ، وتگه‌: شايه‌ت ڤايرۆسه‌گه‌ شيواز كووتايى خوه‌ى وه‌رگرتگه‌ له‌ لاشه‌ى ئاده‌ميزاد وه‌رجه‌ چه‌ن مانگيگ، وه‌لێ له‌ناو لاشه‌ى شه‌مشه‌مه‌كوره‌ك يا ئاژه‌ڵيگ تر و ته‌نانه‌ت ئاده‌ميزاديش مه‌ندويد ئه‌را چه‌ن مانگيگ وه‌بى ئه‌وه‌گ تويش كه‌سه‌يل تر باێد و دوياخريش بڵاوه‌و بويه‌.