2019-01-03 06:30:00

شه‌فه‌ق نيوز/ دياره‌ هه‌واڵگيرى بريتانى زانياريه‌يل تازه‌يگ وه‌ده‌س هاوردگه‌ له‌باره‌ى "بيوه‌ژنه‌ چه‌رمگ‌" تيرۆريسته‌گه‌ ك خه‌ته‌رناكترينه‌ له‌ جه‌هان.

 

له‌ى باوه‌ته‌و، چه‌ن هووكاريگ بريتانى له‌ زووان سه‌رچه‌وه‌يگ ئاگادار وتن: هه‌واڵگيره‌ بڕيگ زانيارى له‌بان Samantha Lewthwaite تيرۆريست بريتانى ك ته‌مه‌نى 35 ساڵه‌ په‌يا كردگه‌ ك وه‌گووره‌ى ئه‌و زاناناريه‌يله‌ ده‌ركه‌فت ئى ژنه‌ له‌ كينيا و جارجاريگيش له‌ سۆماڵ خوه‌ى شاردياده‌و.

 

زانياريه‌يل له‌يوا ده‌رخستنه‌ ئى ژنه‌ يه‌كه‌مين خه‌ته‌رناكترين ژنه‌ له‌ جه‌هان ك باس ئه‌كريه‌ێد نزيكه‌ى 400 كه‌س كوشتگه‌و شايه‌ت له‌ يه‌مه‌نيش خوه‌ى شاردوێده‌و، چوينكه‌ په‌يوه‌ندييش وه‌و وڵاته‌و ديرێد.

 

هه‌واڵگيرى بريتانى دوياى په‌يكردن فريه‌يگ ره‌سيه‌سه‌ ئى زانياريه‌يله‌ و ئه‌را ماوه‌ى هه‌فت ساڵ گه‌رديه‌سه‌ شوون سامنتاو ئه‌راى ده‌ركه‌فت ك په‌يوه‌نديى قايميگيش وه‌ل بزووتنه‌وه‌ى جايه‌يل تيرۆريست ديرێد ك ساڵه‌يليگ له‌ كينياو سوماڵ مقه‌يه‌تى له‌لى كردنه‌.

 

باس له‌وه‌ ئه‌كريه‌ێد سامانتا لوسويت، دويه‌ت سه‌ربازيگ بريتانيه‌ و له‌وه‌خت هه‌رزه‌كارى بويه‌سه‌ ئسلام ك له‌و وه‌خته‌يله‌ ته‌مه‌نى 15 ساڵان بويه‌و ناو خوه‌ى ئاڵشت كردگه‌ ك هه‌ميشه‌ له‌لايه‌ن هه‌واڵگيرى خوه‌ئاوايى و ئه‌فريقييه‌و چه‌وديرێ ئه‌كريه‌ێد جوور مه‌ژگيگ كار له‌بان پلانه‌يل ئه‌كا ئه‌را ئه‌نجامداين په‌لاماره‌يل جوور ئه‌وه‌گ جيرمن ليندسى هاوسه‌رى ئه‌نجامى دياد هه‌ناى ك خوه‌ى ته‌قانه‌و وه‌ل 3 خوه‌يكوش تر له‌ 4 په‌لامار ك شه‌مه‌نده‌فه‌ره‌يل تونێل له‌ له‌نده‌ن گرته‌ ئامانج له‌ ته‌ممووز 2005 و نزيكه‌ى 52 كه‌س كوشت و زياتر له‌ 700 كه‌سيش زه‌خمدار كرد.

YesIraq