2015-05-13 14:14:25

کرماشانه‌گه‌م!

ت تیه‌ڵته‌رین زام له‌ پاران و بانانمی

ک خوه‌شێ توام

نه‌ هازم وه‌ ده‌رمانت هه‌س

نه‌ دڵێگ ئه‌ڕا وه‌جی هیشتنت

باوانه‌گه‌م

له‌ لیم بوه‌خشه‌ ک

بێجه‌ ئرمێسه‌گانم

چشتێگ ئه‌ڕا ڕه‌نجه‌ڕوی سه‌دان ساڵه‌ت نه‌یرم

میلکانه‌گه‌م له‌ لیم بوه‌خشه‌ ک

فره‌ ساڵانه‌

باوگان و داڵگانم

لا وه‌لیت نه‌کردن

وڵاته‌گه‌م

له‌ لیم بوه‌خشه‌ ک

وه‌ باڵای سه‌وڵه‌گان چه‌میات

له‌ هه‌ڕه‌مه‌ی شیره‌ و ته‌ڵیاق

هه‌زاران داخ له‌ له‌ش و لارم که‌فتێگه‌

خانمانه‌گه‌م

له‌ لیم بوه‌خشه‌ ک

له‌ گورچگ هه‌راج خوارده‌ی دویه‌ته‌گانت

هه‌زاران چڕچه‌ له‌ خه‌ون و خه‌یالم که‌فتێگه‌

زمگه‌ی هه‌بوونم

له‌ لیم بوه‌خشه‌ ک

له‌ ناسپاسی مناڵه‌گانت

هه‌زاران تانه‌ و ته‌زک

له‌ شه‌رمه‌زاری ڕووژه‌وانه‌ وه‌ کووڵتا نیشتێیه‌

ماڵه‌گه‌م

له‌ لیم بوه‌خشه‌ ک

له‌و سه‌رده‌ما ئاگامان وه‌پیته‌و نه‌وی و

ئاسه‌مان دا ک وه‌تازه‌ڕێیا که‌فتێیه‌گان

داوای خاوه‌نداریت بکه‌ن

شاره‌گه‌م

بنه‌وای له‌ داڵگ بوینم

له‌ لیم بوه‌خشه‌ ک

نه‌ ده‌سه‌ڵاتم

وه‌ ده‌رمانێگ ئه‌ڕا زامه‌گانت هه‌س

نه‌ دڵێگ

ئه‌ڕا ئه‌ولا که‌فتن و

وه‌جی هیشتنت...

 

كۆڵه‌نجه‌ كه‌ڵهۆڕ

FaceIraq
}