2016-09-04 21:23:08

چمان میل کیشاس لە ڕۊ گلارەم

باڵْ خەێاڵات وە مەیلْ جاران

تەڕ بکەم وە شەو لە پرزەێ واران

پێژوارێ بووەم تا سەر پەچیەێ شەوق

بنیشم تا سوو لە پاێ کووانێ زەوق

زەوقم هەڕاجە شەوقم تاڵانە

ڕووحم شەو وریاێ سیاماڵانە

دڵم دڵ قرچی ژێرْ دەوار کەێ

هەواێ هەوڵْ هەوشْ مینگە نەوار کەێ

بڵووزەێ ئاگر گوڕەێ کۆتەسەور

بەن بەن سقانم بکەێدن وە بەور

بەورم بەن وە دەْس با شەماڵەوە

بووەێدەم وە ماواێ کوردەماڵەوە

با شەماڵ بەورم بووە تا وە دەیشت

تا جی پاێ خودا تا باخْ بەهەیشت

مەلەکەیلْ ئەرش لەورە سناو کەن

سناو وە پرزەێ نەرمە خوناو کەن

تا ماڵْ گەچین قوم قومەک بووەرەم

تا وە تەقەێ تەوڵْ دار سمەک بووەرەم

بووەرەم تا ئەورە گْ ناو مەرزان نییە

ئەقدْ شەو لە سەرْ ئاسمان نییە

شەماڵ بەورەگەم بکە لە داوان

بچۊچن لە ڕۊ کۊیە سەرئاوان

یا ئەر بەورەگەم لە کۊوان کەی بەش

بەش گەوراگەم بەێدن وە سەرکەش

سعید عبادتیان

FaceIraq
}