هــــه‌واڵ عــیراق
ويسته‌گه‌يل كاره‌باێ ناوچه‌يگ له‌به‌غدا گريا ئامانج

ويسته‌گه‌يل كاره‌باێ ناوچه‌يگ له‌به‌غدا گريا ئامانج


شه‌فه‌ق نيوز/ مسعه‌ب ئه‌لموده‌ڕس قسه‌كه‌ر فه‌رمى وه‌ناو وزاره‌ت كاره‌با، ئاشكراى ئه‌وه‌ كرد ك چه‌كداره‌يليگ نه‌ناسرياێ ئه‌را جار چواره‌مه‌ له‌ ماوه‌ى 10 رووژ سێ ويسته‌گه‌ێ كاره‌با له‌ ناوچه‌ێ به‌له‌ديات له‌ به‌غداێ پايته‌خت ئه‌گرنه‌ ئامانج.

 

ئه‌لموده‌ڕس له‌ به‌ياننامه‌يگ ئه‌را شه‌فه‌ق نيوز وت: دوياێ داين وه‌رده‌وام كاره‌با وه‌ هاووڵاتيه‌يل له‌ئاكام گرتنه‌وه‌ى ناوچه‌گه‌ وه‌ ريككه‌فتنه‌يل خزمه‌ت و جبايه‌، جاريگ تر مه‌رامداره‌يل و گه‌ناته‌كاره‌يل زه‌ره‌د له‌ به‌رژه‌وه‌ندێ هاووڵاتيه‌يل دان و ويستگه‌يل كاره‌با له‌ ناوچه‌ى به‌له‌ديات گرتنه‌ ئامانج.

 

جى باسه‌، ناوبرياێ داوا له‌ لايه‌نه‌يل ئاسايشى و ده‌مچه‌رمگه‌يل و رووڵه‌يل ناوچه‌گه‌ كرد خه‌وه‌ر له‌بان ئه‌و كه‌سه‌يله‌ بيه‌ن ك ئى ره‌فتار تاوانكارانه‌ ئه‌نجام دانه‌ له‌وه‌ر ئه‌وه‌گ وه‌گووره‌ى ياسا بڕه‌سنه‌ سزاێ خوه‌يان.