شيعر
یەێ ڕوو تو ژەم دويرەو نەکەف

یەێ ڕوو تو ژەم دويرەو نەکەف


یەێ ڕوو تو ژەم دويرەو نەکەف، هەرچگ خەمە بارم نەکە

یەێ شەو هەم ئەڵ شانم نەخەف، ئێقەیشە نازارم نەکە

هەێ هەێ بکەو سازت بژەن، م وەرکێگم ویرت وەمەو

ڕا م نەخوەن،ڕا م نەخەن، م گورگێگم هارم نەکە

ئەو شەو شەماڵەێ زڵفەگەت ناڵ چناوەم کردگە

باڵ بژانگت ئەڵ بگر،کێ وت ک بزمارم نەکە؟

ئەر گیست ئمشەو شفتە بوو، هەم دیتەمە واڵا ژەنوو

ئەر ئەو چنی گیست چوە دوو؟ خوو بێ پەلامارم نەکە

هشکە تەلم یان توک پەلم، بشکن ک دارم ئەڵ بچووگ

تێشنگ نەنە دە ڕیشگم، ئێجوورە پاسارم نەکە

چوێ سا دە شوونت کەفتمە، هەرکوو بچی هام ئەو نووات

تا کەێ خڕم دی ئاسمان! ئێ شار و ئوو شارم نەکە

ژە چنگ تو م دەر نیەچم، ژە مڵک تو ئەو دەر نیەچم

ئێ سەر تونی ئەو سەر تونی، دیەر بێ خودی بارم نەکە

جارێ تويەم دووسی خەری، جارێ تويەم خوينی گەری

ساڵێ بخەو ساڵێ بێلەم، م خاکتم ژارم نەکە

ژە دەر چگی ژە دڵ مەچوو، وە ڕێ چگی وە گڵ مەچوو

هەێ گوڵ مەچوو  بڵبڵ مەچوو، چوێ سەردووا زارم نەکە

هەێ خەم ژە نامەو خوەیتەمان، ژە گیان و دڵ ئەو کەیتەمان

وە واێ تونێگ وەیتەمان، بەو پويک پیتارم نەکە

فه‌رهاد شاهمورادیان