هــــه‌واڵ عــیراق
شماره‌ى سه‌رپيچيه‌يل حزب و وه‌رپرسه‌يل له‌بان موڵكه‌يل ده‌وڵه‌ت ئاشكرا كريا

شماره‌ى سه‌رپيچيه‌يل حزب و وه‌رپرسه‌يل له‌بان موڵكه‌يل ده‌وڵه‌ت ئاشكرا كريا


شه‌فه‌ق نيوز/ ده‌زگاى عه‌قاره‌يل ده‌وڵه‌ت داوا له‌ سه‌رۆكايه‌تى كۆمار كرد رێ وه‌ تيمه‌يلێ بيه‌ێد بچنه‌ ناو چوارگووشه‌ى سه‌رۆكايه‌تى له‌ ناوچه‌ى جادريه‌ ئه‌را شماردن موڵكه‌يل سه‌ر عه‌قار ده‌وڵه‌ت و ئاشكراى وجوود زياتر له‌ 100 هه‌زار حاڵه‌ت سه‌رپيچێ نيشته‌جى و كشتوكاڵى و پيشه‌سازى و بازرگانى كرد له‌بان موڵكه‌يل ده‌وڵه‌ت له‌لايه‌ن بڕيگ له‌ حزب و ئه‌ندامه‌يل په‌رله‌مان و پاريزگايه‌يل و شماره‌يگ تر له‌ جيوه‌جيكار و له‌ياسا ده‌رچگه‌يل.

 

له‌ى باوه‌ته‌و، رووژنامه‌ى "ئه‌لسه‌باح" زووانحاڵ حكومه‌ت عراقى له‌ زووان ئه‌حمه‌د روبه‌يعى وه‌ڕيه‌وبه‌ر ده‌زگاى عه‌قاره‌يل ئه‌وه‌ ده‌رخست ك ده‌زگاگه‌ كتاوه‌يل فه‌رمى ديرێد ئه‌تويه‌نێد وه‌گووره‌ى ئه‌و كتاوه‌يله‌ جه‌رد موڵكه‌يلى بكا له‌ چوارگووشه‌ى سه‌رۆكايه‌تى له‌ ناوچه‌ى جادريه‌و هه‌ر له‌بان ئه‌و بنه‌مايشه‌ ليژنه‌يل فريه‌يگ دامه‌زريا ئه‌را ئاشكراكردن شوونه‌يل و ئامار ئه‌و موڵكه‌يله‌، وه‌لێ ئه‌و ليژنه‌يله‌ سه‌ريان سوڕمينێد له‌وه‌گ نواگيرى له‌ليان ئه‌كريه‌ێد له‌لايه‌ن فه‌وج سه‌رۆكايه‌تى وه‌رپرس له‌بان پاسه‌وانه‌يل ئه‌و چوارگووشه‌و رێ وه‌پيان نادريه‌ێد بره‌سنه‌ ئه‌و موڵكه‌يله‌.

 

جى باسه‌، روبه‌يعى هه‌ميش وت: شماره‌ى سه‌رپيچيه‌يل له‌بان موڵك و زه‌ويه‌يل ده‌وڵه‌ت ره‌سيه‌سه‌ نزيكه‌ى زياتر له‌ 100 هه‌زار حاڵه‌ت نيشته‌جى و كشتوكاڵى و پيشه‌سازى و بازرگانى له‌گشت وڵاته‌گه‌و باس له‌وه‌يش كرد ك زوورم سه‌رپيچيكه‌ره‌يل پيكهاتنه‌ له‌ جيوه‌جيكاره‌يل و چه‌ته‌يل ده‌رچگ له‌ ياساو بڕيگ له‌ وه‌رپرسه‌يل و حزبه‌يل و ئه‌ندامه‌يل ئه‌نجومه‌ن نوێنه‌ره‌يل و پاريزگايه‌يل.