وتـــــار
وه‌ئاشكرا.. ماناێ سه‌روه‌خوه‌يى كوردستان چه‌س؟

وه‌ئاشكرا.. ماناێ سه‌روه‌خوه‌يى كوردستان چه‌س؟


شه‌فه‌ق نيوز/ گشت چشتيگ له‌ێ وڵات پڕ له‌ قه‌يرانه‌يل و تويشهاتگ وه‌ جووره‌ها نه‌خوه‌شى مه‌سه‌له‌يگ ئاساييه‌، ته‌نيا مافه‌يل ملله‌ت كوردستان نه‌ود!! وجوود مليۆنه‌ها يه‌تيم و كوشتن و رفانن و ترۆر و راوناين و كووچ وه‌پيكردن و گه‌ناته‌كارى و نه‌وين ئاو و كاره‌باو خزمه‌تگوزاريه‌يل تر، گشت ئه‌يانه‌ مه‌سه‌له‌يليگ ئاسايين و وجوود ملينه‌ها كه‌سيش له‌ژير خه‌ت فه‌قيرى و وجوود مليۆنه‌ها بيوه‌ژن و بيكاريش وه‌ هه‌مان شيوه‌ هه‌ر مه‌سه‌له‌يگ ئاساييه‌و جيوه‌جيكردن ئه‌جنداێ ده‌ركى و جيوه‌جى نه‌كردن ياسايه‌يل و بڕين بودجه‌ يا قووت مه‌ردم كوردستانيش هه‌ر مه‌سه‌له‌يگ ئاساييه‌و هاتن داعش و داگيركرن سێكوتى خاك و ويرانكردنى مه‌سه‌له‌يگ ئاساييه‌و وجوود مليۆنه‌ها كووچبه‌ريش مه‌سه‌له‌يگ ئاساييه‌، وه‌لێ هه‌ناى مه‌سه‌له‌گه‌ په‌يوه‌سه‌ وه‌ خواست ملله‌تيگ ئه‌را هاوردنه‌وه‌ێ مافه‌يل زه‌فتكرياێ و كووتاييهاتن مه‌ينه‌تيه‌يلێ، جوور كاره‌ساتيگ تاريف كريه‌ێد!!

 

ئايا خاستر نيه‌ پرسيار له‌ ملله‌ت عراقى بكريه‌ێد له‌ چه‌ ناڵنن و چ چشتيگ ترسنێده‌يان وه‌ شيوه‌يگ گه‌وراتر و چه‌ هيشته‌يان فيشتر ناڕه‌حه‌ت بوون و له‌وه‌ر خاتر چه‌ موباره‌كى له‌ى زوڵمه‌ ئه‌كه‌ن و ئه‌كه‌نه‌ێ به‌هه‌يشتيگ ئه‌را تاوانباره‌يل و جێگه‌يگ ئه‌را گه‌ناته‌كاره‌يل!

 

با حكومه‌ت و چين سياسى راسگوو بوون وه‌ل ملله‌ت، چوينكه‌ ئاگادارن له‌ بارودوخ عراق و وه‌ره‌و گوورا ئه‌چێد!! ئه‌گه‌ريش بڕێگ له‌ليان مه‌يل ديرن وه‌ خاتر بنيات عراقيگ يه‌كگرتگ، په‌ند له‌ دره‌سه‌يل رژيم وه‌رين وه‌ربگرن و سياسه‌ته‌يل سه‌دام جيوه‌جى بكه‌ن، خاستر ئه‌وه‌سه‌ به‌رنامه‌يل كاره‌گه‌يان و ئاكامه‌يل حوكمه‌كه‌يان ئه‌را مه‌ردم ئاشكرا بكه‌ن، عراقيش وه‌ گووره‌ێ پێوه‌ر وڵاتيگ سه‌ركه‌فتگ نيه‌، وه‌تايبه‌ت له‌ ژيان هاوبه‌ش ناونى پيكهاته‌يل نه‌ته‌وه‌يى و ئايينيه‌گه‌ێ و له‌ ده‌سه‌وه‌ركردن دادگه‌رێ كۆمه‌ڵايه‌تى و له‌ حكومه‌ت شه‌راكه‌ته‌گه‌يشى هويچ شه‌راكه‌تيگ له‌تى نيه‌ و هيزه‌يل تايفى و سياسى ده‌سڵاتيان ها بان ياساوه‌.

 

با ئاشكراتر بويمن، ئه‌گه‌ر نه‌ويشيم عراق به‌شبه‌شه‌و كرياگه‌، ئه‌وه‌ خوو ناودارترين دوزه‌خه‌ ئه‌را ژيان له‌ى سه‌رده‌مه‌و له‌ خاسترين حاڵه‌ته‌يليشى و دوياێ پشتگووشخستن كه‌مينه‌يل نه‌ته‌وه‌يى و ئايينى و مه‌زه‌وى، ئه‌وه‌سه‌ ك ئى وڵاته‌ پيكهاتگه‌ له‌ سێ به‌ش و ئه‌ياكه‌يان ئه‌واكه‌يان ناخوازێد، ئه‌وانه‌يش ك باس له‌ عراق يه‌كگرتگ ئه‌كه‌ن تواناى ته‌نانه‌ت يه‌كگرتگى به‌غدايش نه‌يرن.

 

له‌يرا پرسيار وه‌ هيزه‌و خوێ ده‌رئه‌خا، ك ئه‌گه‌ر ده‌رفه‌ت كه‌فته‌و وه‌ل دامه‌زرانن ده‌وڵه‌ت كوردى و ته‌مامكردن ستوينه‌يلى، چه‌نيگ له‌ عراقيه‌يل ئه‌زره‌ت ژيان له‌تى ئه‌كه‌ن؟ ئه‌ويش وه‌ قياس وه‌و ئه‌زموون سه‌ركه‌فتگ هه‌رێم كوردستانه‌ ، ك باوه‌ڕم ئه‌وه‌سه‌ جواوه‌گه‌ ئاشكراس.

 

له‌ هه‌كگه‌ پاشمنده‌ى رژيمه‌يل يه‌ك له‌شوون يه‌ك عراق، ئه‌وه‌سه‌ ك عراق يه‌كيگه‌ له‌و وڵاته‌يله‌ ك فيشتر عه‌سكه‌رتاريه‌و نرخ ژيان ئاده‌ميزاد له‌تى ته‌نيا نرخ ئتڵاقه‌يگ هاورده‌سه‌و ته‌نيا خزمه‌تيگيش له‌تى خزمه‌ت تون وتيژى و تونڕه‌ويه‌ ك رووژانه‌ ئه‌گه‌ر نه‌ويشيم سه‌دان، ده‌يان كه‌س له‌تى بوونه‌ قوربانى و ئى تراجيديايشه‌ مه‌ويسيه‌يل ها شوونى و هويچ كه‌سيگ تواناى فيشتر له‌وه‌ نه‌يرێد بويشێد كه‌ێ ته‌مام ئه‌دێ!

 

با ته‌نيا ئه‌وه‌ بخه‌يمنه‌ هوير، ك وه‌رجه‌ سه‌د ساڵ رژيمه‌يل سياسى عراقى مه‌شق زوڵم كرديان دژ ملله‌ت وه‌تايبه‌ت دژ ملله‌ته‌يل غه‌يره‌ عه‌ره‌ب و ئايينه‌يل غه‌يره‌ ئسلام، ك ئايا كوردستانيه‌يل وه‌ چه‌ بايه‌سه‌ هويره‌و بكه‌ن دوياێ ئه‌و هه‌مگه‌ تاوانه‌يل و كاره‌سات و مه‌ينه‌تى و ژانه‌يله‌ ك هاتياده‌ تويشيان له‌ جوگرافيه‌ێ ده‌سڵات ئى وڵاته‌؟! ئمجا له‌ وه‌ختيگ ئويشنه‌ پيمان وه‌لمانا بوون كوشيه‌ين و ئه‌گه‌ريش وه‌لمانا نه‌وين چه‌وه‌ڕێ بكه‌ن ئه‌كوشيمه‌دان!!! كورد بيجگه‌ مافه‌يل سروشتييان جوور باقى ملله‌ته‌يل تر جه‌هان له‌ داواكارى ئه‌را سه‌روه‌خوه‌يى وه‌خاتر وه‌رگرتن مافه‌يليان و زه‌مانه‌تكردن سه‌روه‌رى و كرامه‌تيان، وه‌ل ئه‌وه‌يشا وه‌ بوونه‌ێ مكوڕێ به‌غدا له‌بان وه‌رده‌وامبوين له‌بان سياسه‌ت دروسكردن قه‌يرانه‌يل ك هه‌ڕه‌شه‌ێ فيشتر له‌ جه‌نگ ئه‌كا و وه‌ل ئاينده‌ێ تيه‌ريك و ناديار و وه‌گووره‌ێ ئه‌زموونه‌يل و به‌رنامه‌ێ كار وڵاتيگ پڕ له‌ خوسه‌و كينه‌ت، دوينێد ناخوازن بوونه‌ چيلگيگ ئه‌را ئاگر ئه‌و جه‌نگ و ئاشووه‌يله‌و ناخوازن بوونه‌ شه‌ريكيگ له‌ تاوان كوشتن يه‌كترى.

عه‌لى حسێن فه‌يلى