هــــه‌واڵ كــوردى
ده‌زگاى ئاراس دوياى په‌نج ساڵ له‌ به‌سانن دوباره‌ واز كريا

ده‌زگاى ئاراس دوياى په‌نج ساڵ له‌ به‌سانن دوباره‌ واز كريا


شه‌فه‌ق نيوز/ له‌ هه‌ولێر پايته‌خت هه‌رێم كوردستان سه‌رله‌نوو ده‌زگاى ئاراس ئه‌را چاپ و بڵاوكردنه‌وه‌ واز كريا، ئه‌ويش دوياى په‌نج ساڵ له‌ به‌سانن له‌وه‌ر بارودوخ دارايى.

 

ده‌زگاى ئاراس ئه‌را يه‌كه‌مجار له‌ساڵ 1998 واز بوێ و دوياى ئه‌وه‌يش ئاژانس ئه‌كانيوز كوردستان له‌لى كه‌فته‌و.

 

به‌دران ئه‌حمه‌د حه‌بيب وه‌ڕيه‌وبه‌ر ده‌زگاگه‌ له‌ وته‌يگ له‌وه‌خت وازكردنى وت: ئمڕوو ئاشكراى وه‌رده‌وامى ئامانج و ريه‌يليگ ئه‌كه‌يم ك داينايم و له‌ گام يه‌كه‌مه‌و ده‌س وه‌پى ئه‌كه‌يم وه‌ل كۆمه‌ڵيگ له‌ كارمه‌نده‌يل تايبه‌تمه‌ند و ميكانيزم تازه‌ له‌ڕێ ئۆنلاين ئه‌را مامڵه‌كردن و په‌يوه‌نديكردن وه‌ل نويسه‌ره‌يل و باس له‌وه‌يش كرد ك له‌ سه‌ره‌تاى كاره‌گه‌يان ده‌س ئه‌كه‌نه‌ چاپكردن نزيكه‌ى 60 - 70 ناونيسان تازه‌ له‌ بواره‌يل جياجيا.

 

جى باسه‌، ده‌زگاى ئاراس ك باره‌گاى ها هه‌ولێر، له‌ ديارترين ده‌زگايه‌يل بڵاوكردنه‌ له‌ هه‌رێم و عراق، ك له‌ماوه‌ى كاركردنى زياتر له‌ 2000 ناونيشان كتاو ئه‌نجا داگه‌و له‌ناونيانيش كتاوه‌يليگ تايبه‌ت بويه‌ وه‌ كاروبار كورده‌يل باشوور - فه‌يليه‌يل.