وتـار شـه‌فـه‌ق
ئيمه‌ چه‌نيگ له‌ سه‌ركه‌فتنه‌و نزيكيم؟

ئيمه‌ چه‌نيگ له‌ سه‌ركه‌فتنه‌و نزيكيم؟


شه‌فه‌ق نيوز/ ئه‌و شماره‌ ك ها ناونى ده‌س خوه‌نواره‌يل له‌ گووڤار فه‌يلى، ئه‌وه‌ دويا شماره‌س وه‌رجه‌ ئه‌نجامداين راپرسێ له‌ هه‌رێم كوردستان! پرسياره‌گه‌يش له‌وه‌سه‌ ك روێداگ چه‌س ئه‌گه‌ر راپرسێ ئه‌نجام بدريه‌ێد و چه‌ روێ ئه‌ياد ئه‌گه‌ر ئه‌نجام نه‌گرێد؟! بيگومان چه‌رخيان مێژووييش روێداگه‌و كورديش وه‌گشت ئاشكرايگ قسه‌ێ خوه‌يان كردن و ناوچه‌گه‌و جه‌هان وه‌گشتى ئى په‌يامه‌ ژنه‌فتن و باقى مه‌سه‌له‌گه‌ په‌يوه‌سه‌ وه‌ وه‌خت و چوينێتى سه‌رخستن پرووسه‌ێ سه‌روه‌خوه‌يى كوردستان.

 

مه‌سه‌له‌گه‌ له‌ باوه‌ڕ كورد ده‌يشت هه‌رێم فيشتر سه‌خته‌و ته‌نانه‌ت ئه‌وانه‌كيش دويرن له‌ ناوچه‌يل كوردستانى نگه‌رانييان فيشتره‌، چوينگه‌ نگه‌رانى ته‌نانه‌ت له‌ رووژه‌يل ئاسايى گوزه‌يشتيش وجوود داشت، وه‌لێ يه‌كلاوه‌ نه‌وێ! ئمجا گرينگى رۆڵيان له‌ ناوچه‌يل نيشته‌جييان نه‌وێ، به‌ڵكوو له‌ ريڕه‌ويان خوه‌ێ ديه‌و وه‌ل هه‌ڵويستيان، دێ مه‌سه‌له‌گه‌يش له‌يوا له‌ليان خواست جارجاريگ وه‌ چه‌واشه‌ێ وه‌شت و جارجاريگيش وه‌ليا بجويليه‌ن، ئمجا گرينگ ئه‌وه‌سه‌ ته‌كجم بكه‌ن و هه‌ڵويست داشتوون نه‌ك جوور ته‌ماشاكه‌ر بوون و له‌ گووشه‌يگه‌و بنوڕن.

 

له‌ى روێه‌و له‌ مه‌رز هه‌رێم و له‌لايگ تريشه‌و تايبه‌تمه‌نديه‌يل و رازه‌يل و مه‌سه‌له‌يل تووخيگ هه‌س، ئه‌گه‌ريش وه‌ ئاسانى بويشيم ئه‌ى چوين ئه‌وانه‌گ وه‌پيمان ئويشن خوه‌شدان توايم دڵه‌ڕاوه‌كێ ئه‌را مه‌ردم ئه‌يه‌رن له‌ به‌سانن مه‌رز له‌ڕێ ره‌سانن و وه‌ كابوس ورسگێ و ئابڵوقه‌ هويرمان ئه‌كه‌ن، له‌ ده‌يشت هه‌رێميش ترس كوشتن فه‌ورێ و دزێ و تاڵانى له‌ دڵ مه‌ردمه‌گه‌مان كاڵن، ئه‌ويش ته‌نيا له‌وه‌ر خاتر قه‌يه‌غه‌ێ قسه‌كردنمان‌ له‌بان راپرسێ و سه‌روه‌خوه‌يى!

 

راسه‌ ك داين گشت هه‌وڵيگ له‌وه‌ر خاتر ئاشتى و يه‌كگرتن له‌ مه‌سه‌له‌ێ بڕيار چاره‌نويس كار خواستيگه‌، وه‌لێ قسه‌كردن له‌بان رووح نه‌ته‌وايه‌تى له‌ كوردستان ئاسانه‌ تا ڕاده‌يگ ك گشت كه‌س ئه‌تويه‌نن روێ وه‌روێ بوونه‌و، به‌ڵكوو سه‌ختى و مايه‌ێ شانازێ ها له‌ ده‌يشت كوردستان و ئه‌و مه‌ردمانه‌ ك ناڵنن وه‌ده‌س سه‌ختيه‌يل ژيانه‌و وه‌ل گشت هه‌ڕه‌شه‌يليگ، مقه‌يه‌تى له‌ ناسنامه‌ێ نه‌ته‌وه‌ييان ئه‌كه‌م.

 

بيلن با حوكم گوزه‌يشته‌ ده‌رنه‌كه‌يم و ده‌س بكه‌يمنه‌ دابه‌شكردن تومه‌ته‌يل و ئيمه‌يش له‌ وڵاتيگ ئىمان و خاوه‌ن سروشت دڵڕفنيم، گرينگ ئه‌وه‌سه‌ له‌ى قوناغ چاره‌نويسسازه‌ ئه‌وه‌ بزانيم ك گشت واينمان و شكه‌ستمان ئه‌چێده‌و ئه‌را ئه‌و وه‌خته‌يله‌ ك له‌تى نه‌زانستيم ئيمه‌ چه‌نيگ له‌ سه‌ركه‌فتن نزيكيم و بڕيار پاشگه‌زێ دايم.

عه‌لى حسێن فه‌يلى