هــــه‌واڵ عــیراق
عراقيه‌يل له‌ داواكارى په‌نابه‌رى ئه‌را ئه‌ڵمانيا پله‌ى دويه‌م ديرن

عراقيه‌يل له‌ داواكارى په‌نابه‌رى ئه‌را ئه‌ڵمانيا پله‌ى دويه‌م ديرن


شه‌فه‌ق نيوز/ وه‌زاره‌ت خارجيه‌ى ئه‌ڵمانى باس له‌ به‌رزه‌وبوين شماره‌ى په‌نابه‌رى پيشكه‌شكرياێ كرد له‌ مانگ ته‌ممووز گوزه‌يشت وه‌ به‌راورد وه‌ل مانگ حزه‌يران.

 

وه‌زاره‌ته‌گه‌ له‌ به‌ياننامه‌يگ ك شه‌فه‌ق نيوز ئاگادارى بوێ وت: 15 هه‌زار و 199 كه‌س داواى وه‌رگرتن په‌نابه‌رى پيشكه‌ش كردنه‌سه‌ ده‌زگاى كووچ و په‌نابه‌رى ناوه‌ندى له‌ ته‌ممووز گوزه‌يشت و ئاشكرايشى كرد ك ئى شماره‌ زيايه‌س وه‌ نسبه‌ت 14.7 له‌سه‌د وه‌ به‌راورد وه‌ل حزه‌يران گوزه‌يشت.

 

به‌ياننامه‌گه‌ وت: شماره‌ى ئه‌وانه‌گ داواى په‌نابه‌رى كردنه‌ له‌ حزه‌يران گوزه‌يشت ره‌سيه‌سه‌ 13 هه‌زار و 354 كه‌س، وه‌لێ له‌ ئايار گوزه‌يشت 12 هه‌زار و 404 كه‌س بوينه‌، ئاماژه‌ وه‌يه‌يش كرد سووريه‌يل زورمينه‌ بوينه‌ له‌ داواكارى په‌نابه‌رى له‌ مانگ ته‌ممووز ك شماره‌يان ره‌سيه‌سه‌ 3 هه‌زار و 786 كه‌س، وه‌لێ عراقى هه‌زار و 415 كه‌س بوينه‌.