وتـــــار
راپرسێ و مه‌نه‌لێ

راپرسێ و مه‌نه‌لێ


شه‌فه‌ق نيوز/ مه‌نه‌لێ ئه‌وساو تا سه‌رده‌م حوكم پاشايه‌تى يه‌كيگ بويه‌ له‌ شاره‌يل و قه‌زايه‌يل ناسرياێ و ناودار وه‌ خێر و به‌ير و سامانه‌يل كشتوكاڵێ و ئاژه‌ڵێ و كانزايى، وه‌ل ئه‌وه‌يشا ناودايشه‌ وه‌ جووره‌يل ميوه‌جات وه‌تايبه‌ت پرته‌قاڵ و ئه‌نار و سيف، ئمجا خاوه‌ن بووسانه‌يل مه‌نه‌لێ گشت جووره‌ خورماو ميوه‌جاتيگ هه‌نارده‌ێ به‌غداێ پاته‌خت و شاره‌يل كوردستان جوور سلێمانى و هه‌ولێر و كه‌ركوك و شاره‌يل تر كرديان بيجگه‌ هانه‌رده‌كردنى ئه‌را شاره‌يل كوردستانى له‌ ئيران جوور شار كرماشان و ئيلام و شوونه‌يل تر.

 

بازاڕه‌يليگ بازرگانى له‌ مه‌نه‌لێ وجوود داشت جوور "بازاڕ گه‌ورا" وه‌ لقه‌يل جياجياى بازرگانى و تايبه‌تمه‌ند جوور بازاڕ جنگ دويره‌يل و بازاڕ قوماش فرووشى و بازاڕ مادده‌يل خوارده‌مه‌نى و بازاڕ سونعه‌ت و فرووشتن كه‌وش و ده‌مپايى و بازاڕ سه‌وزى فرووشى و بازاڕ قه‌ساوخانه‌يل و ئاشخانه‌يل ئه‌را كه‌باب و چه‌نه‌ها چايخانه‌يش ئه‌را ئسراحه‌تكردن مه‌ردم، وه‌ل ئه‌وه‌يشا بازاڕه‌يل تريش ناودار له‌ مه‌نه‌لێ وجوود داشتن و له‌وانه‌يش "بازاڕ بويچگ" و بازاڕه‌يل تر، وه‌لێ له‌باره‌ێ پيكهاته‌يل مه‌ردمى قه‌زاێ مه‌نه‌لێ، زوورميان كورد بوين بيجگه‌ خيزانه‌يليگ توركمانى و بڕيگيش عه‌ره‌ب له‌ ده‌يشت شاره‌گه‌.

 

له‌ سه‌رده‌م حوكم سيه‌ى به‌عس، مه‌نه‌لێ تويش خراوترين سياسه‌ته‌يل ته‌هجير و كوشتن و پيشتگوشخستن و ويرانكارێ هات و حزب به‌عس ده‌سكرده‌ ته‌رحيلكردن مه‌ردم و هووزه‌يل كورد له‌ ماڵه‌يليان و زه‌وێ زاريان و بووسانه‌يليان و مه‌ردم عه‌ره‌ب هاورده‌ شوونيان، له‌ساڵ 1980يش به‌عس بڕياريگ ده‌ركرد و مه‌نه‌لێ وه‌و بڕياره‌ له‌ قه‌زا ئاڵشت كريا ئه‌را ناحيه‌يگ سه‌ر وه‌ به‌له‌دروز، يه‌يش له‌ وه‌ختيگ ك به‌له‌دروز ناحيه‌يگ بوى سه‌ر وه‌ قه‌زاێ مه‌نه‌لێ، له‌ وه‌خت جه‌نگيش وه‌ل ئيران گشت باخ و بووسان و ماڵ و مزگفت و ده‌زگايه‌يل حكومى و خوه‌ندنگاو چشته‌يل تر فريه‌يگ ويران كرياو باقى مه‌ردمه‌ كووچكردن وه‌ره‌و شاره‌يل تر و مه‌نه‌لێ ك شماره‌ێ مه‌ردمه‌گه‌ێ له‌ 40 هه‌زار كه‌س فيشتر بوى بويه‌ شاريگ به‌تاڵ له‌ مه‌ردم و ناوێ نريا شار شه‌به‌حه‌يل.

 

مه‌ردم مه‌نه‌لێ دوياێ 2003 چه‌وه‌ڕێ ئه‌وه‌ له‌ حكومه‌ت شيعه‌ێ عراقى كردن گرينگى بيه‌ێده‌ شاره‌ ويرانكريايه‌گه‌يان و كار له‌بان به‌سانن گشت دوسيه‌يل و بڕياره‌يل كويه‌ن به‌عس بكا ك فه‌رق و جيايى ره‌گه‌زێ و مه‌زه‌وى و تايفى له‌تى بوى، وه‌لێ جى داخه‌ ده‌سڵاتداره‌يل تازه‌ێ به‌غدا هويچ چشتيگ ئه‌را ئى شار مێژووييه‌ نه‌كردن و له‌وانه‌يش لاوردن كابوس زوڵم و غوبن وه‌تايبه‌ت لاوردن برياره‌يل ره‌گه‌زێ پڕ كينه‌ت به‌عس ك وه‌ گووره‌ێ ئه‌وه‌يش مه‌نه‌لێ ئاڵشت كريا ئه‌را ناحيه‌و هه‌وڵ جددى ئه‌را هاوردنه‌وه‌ێ مه‌ردم كورد ئه‌را ماواو ئه‌را بان باخ و بووسان خوه‌يان وه‌ل بنياتناين بنگه‌يل ته‌ندروسى و خوه‌ندنگاو نه‌خوه‌شخانه‌و ده‌رمانخانه‌و باڵه‌خانه‌يل و بازاڕ تازه‌و زه‌مانه‌تكردن كاره‌باو ئاو خواردن و خزمه‌تگوزاريه‌يل تر، وه‌لێ وه‌ چه‌واشه‌وه‌ ئه‌و خوسه‌و كينه‌ت و جيايى و ره‌گه‌زێ و تايفى و كاره‌يل مه‌زه‌ويه‌ فيشتره‌و بوى و مه‌نه‌لێ ناڵنێد وه‌ده‌ش هه‌مان كيشه‌يل وه‌رين و زياتريش، وه‌ل ئه‌وه‌يشا هيمان ئداره‌ێ ناوصه‌يى له‌ باقووبه‌ و ناوه‌ندييش له‌ به‌غدا ئى شار ويرانكرياگه‌ فه‌راووش و پشتگووش ئه‌خه‌ن وه‌ ئه‌نقه‌ز و هيمان ئه‌و لايه‌نه‌يله‌ ك مامڵه‌ وه‌ل مه‌ردم كورد ئه‌كه‌ن وه‌ هه‌مان ئه‌قڵيه‌ت وه‌رين به‌عسيه‌ و حكومه‌ت به‌غدايش وه‌ ئه‌نقه‌ز مه‌سه‌له‌ێ جيوه‌جيكردن بڕيار 140 پشتگووش خست ك تايبه‌ته‌ وه‌ ناوچه‌يل كيشه‌ له‌سه‌ر له‌ناونى حكومه‌ت و هه‌رێم كوردستان و مه‌نه‌لييش ئه‌كه‌فێده‌ وه‌ر ئى بڕياره‌.

 

مه‌نه‌لێ و راپرسێ: مه‌نه‌لێ له‌لايه‌ن حكومه‌ت ناوه‌ندييه‌و تويش ته‌هميش هات و دى فايده‌ نه‌يرێد مه‌ردم ئى شاره‌ وه‌ل ئداره‌ێ ناوچه‌يى له‌ دياله‌و ئداره‌ێ ناوه‌ندێ له‌ به‌غدا بمينن وه‌ هويچ شيوه‌يگ، چوينكه‌ مه‌ندن له‌ژير بنميچ به‌غدا و باقووبه‌ ماناێ وه‌رده‌واميه‌ له‌ مه‌ينه‌تى و مه‌ويسى و له‌هويربردن و فه‌رامووشكردن، هه‌ر وه‌و خاتريشه‌ مه‌ردم مه‌نه‌لێ ماف خوه‌يانه‌ چاره‌نويس خوه‌يان ديارێ بكه‌ن و هه‌ر له‌وه‌ر ئه‌وه‌يش چاره‌سه‌ر دروس و خاس ئه‌وه‌سه‌ مه‌ردم مه‌نه‌لێ له‌ رووژ 25 ئه‌يلوول وه‌ به‌ڵێ ده‌نگ ئه‌را سه‌روه‌خوه‌يى كوردستان بيه‌ن تا ئى مافه‌ بگرێده‌يانه‌وه‌و مه‌ردم ئه‌و شاره‌يشه‌ له‌ساێ ده‌وڵه‌تيگ بژيه‌ن گرينگى وه‌ شاره‌گه‌يان بيه‌ێد و په‌ره‌و پيشكه‌فتن وه‌پى بدريه‌ێد و ئه‌مان و سه‌قامگيرى و خوه‌شگوزه‌رێ له‌نوو ئه‌ڕاێ باێده‌و.

قاسم مه‌نده‌لاوى