هــــه‌واڵ عــیراق
پرووژه‌يگ بويه‌سه‌ جى نگه‌رانى و عراقيه‌يليش له‌ هه‌مواركرن ياسايگ تويڕه‌ن

پرووژه‌يگ بويه‌سه‌ جى نگه‌رانى و عراقيه‌يليش له‌ هه‌مواركرن ياسايگ تويڕه‌ن


شه‌فه‌ق نيوز/ پرووژه‌ى هه‌مواركردن ياساى ره‌گه‌نامه‌ بويه‌ هووكار تويڕه‌يى فريه‌يگ له‌ عراقيه‌يل ك وه‌ كاره‌سات تازه‌يگ تاريفى كردن روێ وه‌ڕوێ وڵاته‌گه‌يان ئه‌دێ دوياى ئه‌وه‌گ ساڵه‌يل فريه‌يگ ناڵان وه‌ده‌س جه‌نگ و كوشتار و گه‌ناته‌كارێ، وه‌تايبه‌ت مه‌سه‌له‌ى زيايبوين نفوز ئيران له‌ وڵاته‌گه‌.

 

ئه‌نجومه‌ن نوێنه‌ره‌يل عراق، رووژ دوشه‌ممه‌ى گوزه‌يشت خوه‌نينه‌وه‌ى يه‌كه‌م ئه‌را پرووژه‌ى هه‌مواركردن ياساى ره‌گه‌زنامه‌ كرد، ك يه‌يش رێ  وه‌ هه‌ر بيگانه‌يگ ئه‌ياد ئه‌گه‌ر ماوه‌ى ساڵيگ له‌ عراق بويه‌ بتويه‌نێد ره‌گه‌زنامه‌ى وڵاته‌گه‌ وه‌ده‌س بارێد.

 

له‌ى باوه‌ته‌و، يه‌حيا محه‌مه‌دى ئه‌ندام ئه‌نجومه‌ن نوێنه‌ره‌يل له‌ ديمانه‌يگ ته‌له‌فزيۆنى وت: حكومه‌ت حه‌يده‌ر عه‌بادى ئى پرووژه‌ ياسا پيشكه‌ش كردگه‌و حكومه‌ت عادل عه‌بدولمه‌هدييش په‌سه‌نى كردگه‌و ره‌وانه‌ى په‌رله‌مان كرياگه‌.

 

محه‌مه‌دى هه‌ميش وت: هه‌رچه‌نى له‌ خوه‌نينه‌وه‌ى سه‌ره‌تايى ئى ياسا جيگيره‌، وه‌لێ بويه‌سه‌ جى نگه‌رانى فريه‌يگ له‌ ئه‌ندامه‌يل وه‌بوونه‌ى ئه‌و مادده‌يل له‌تى ك بويه‌سه‌ هووكار كه‌مه‌وكردن له‌ شانيه‌ت ره‌گه‌زنامه‌ى عراقى.