وتـــــار
خودا خوه‌شێ له‌ى ملله‌ته‌ ئه‌ياد

خودا خوه‌شێ له‌ى ملله‌ته‌ ئه‌ياد


شه‌فه‌ق نيوز/ شيوازه‌يل له‌ده‌سداين چه‌وه‌كى و فراوانبوين و ته‌ما له‌ دونيا فريه‌و جوراوجووره‌، وه‌لێ روێداگه‌يليگ ك وه‌ بوونه‌ى هووكار ده‌ركردن بڕياره‌يل هه‌ڵه كه‌فته‌وه‌و زه‌ره‌د وه‌ روێوه‌ر عراق ره‌سانن كه‌من‌!

 

ئاشكراس ك هه‌ر له‌سه‌ره‌تاى ئمساڵ و تا رووژ ئمڕوومان شماره‌ى مه‌ردم جه‌هان وه‌ نزيكه‌ى 34  مليۆن كه‌س زياى كردگه‌، وه‌لێ يه‌يش ماناى ئه‌وه‌ نيه‌ كيشه‌يلێ كه‌مه‌و بوينه‌.

 

جوور ئه‌وه‌گ خوه‌نينه‌وه‌ى مێژوو تاقيكردنه‌وه‌ى ئه‌زموونه‌يلى هووكاره‌مان كرد وه‌ ئه‌وه‌گ زه‌ره‌د سه‌ركه‌فتن مه‌سه‌له‌يگ وارد و چه‌وه‌ڕيكرياگه‌، ئاسانيشه‌ ئمڕوو له‌ شوونيگ بويشيم هه‌ڵه‌ له‌ دياريكردن قانجازه‌يل و به‌رژه‌وه‌نديه‌يل گشتى و بڕياره‌يل نادروس كيشه‌يل هه‌ميشه‌يى فريه‌يگ ئه‌را ئى وڵاته‌ خسته‌و، تيه‌ڵترين له‌ دوباره‌كردنه‌وه‌ى ئه‌و ئه‌زموون سه‌رنه‌كه‌فتگه‌ ئه‌وه‌سه‌ واز له‌ليمان ناگه‌ردێد ئاشناى ريه‌يل دروس بويمن له‌ناو گه‌رده‌لويل ئى روێداگه‌يله‌.

 

ترس و هه‌ڕه‌شه‌ى گه‌ورا له‌بان ئى وڵاته‌ ته‌نيا له‌ نه‌وين ديموكراسيه‌ت نيه‌، به‌ڵكوو له‌ نه‌وين متمانه‌و باوه‌ڕدارى ئه‌ياكه‌ وه‌ ئه‌وانه‌و گيان له‌يه‌كوه‌خشينه‌، ك يه‌يش ده‌رفه‌ت سه‌ركه‌فت نايه‌ێد ئه‌را هه‌ر كاريگ سه‌رده‌ميانه‌ى دادگه‌رانه‌و گشتگير.

 

سه‌ركه‌فتن پروسه‌ى هه‌ڵوژاردن له‌ عراق ئاكامه‌يل خاس ئه‌راى نانويسيه‌ێد، چوينكه‌ خوه‌رئاواو ده‌وڵه‌ته‌يل هاوسا سه‌قامگيرييگ ئه‌خوازن تيكه‌ڵ بدێ وه‌ناو چه‌ن كه‌س و لايه‌نه‌يليگ و ئه‌و به‌رنامه‌ ك مومكن بوێ دوير بدێ له‌ ريڕه‌و راسكانى له‌ مه‌يل و هه‌وه‌جه‌يل ئى ملله‌ته‌! يه‌يش ئه‌و باسه‌يل تيه‌ڵ و قه‌وڵه‌يل ناجيوه‌جيكرياگه‌سه‌ ك به‌ش ئاوه‌دان ئه‌رشيف ئى وڵاته‌سه‌.

 

هه‌ڵوژاردنه‌يل له‌ شيوازه‌ سروشتيه‌گه‌ى رويداگيگ جوانه‌و بايه‌سه‌ پيشوازى و موباره‌كبايى له‌لى بكريه‌ێد، وه‌لێ ئيجاره‌ نه‌ به‌شدارى وه‌ ئاست وه‌رچه‌وه‌يگ بوێ و نه‌يش تام سه‌ركه‌فتن له‌تى خوه‌ش بوێ، چوينكه‌ جامه‌ك چه‌واشه‌كه‌ر بارودوخ تيه‌ڵ ئاينده‌يگ نادياره‌ و نيشانه‌يل ئارامى و سه‌قامگيرى وه‌پيه‌و ده‌رناكه‌فێد‌.

 

هه‌ميشه‌ ئويشن عراقيه‌يل ئه‌تويه‌نن وه‌جه‌م زاڵبوون له‌بان بارودوخه‌گه‌ وه‌بى ئه‌وه‌گ چه‌وه‌ڕێ چاره‌سه‌ر ده‌ره‌كى بكه‌ن، چوينكه‌ له‌ مه‌رجه‌يل سه‌ركه‌فتن له‌ حاڵه‌ت جه‌نگ ئه‌وه‌سه‌ ك قوربانى و به‌رخوردانه‌ ئه‌را ئه‌وه‌گ چه‌ك هه‌ڵگرێد، وه‌نا وجوود هه‌زاران چه‌ك و ته‌قه‌مه‌نى وه‌بى وجوود سه‌ربازيگ جه‌نگاوه‌ر تواناى راوناين دوشمن نه‌يرێد!!

 

له‌ڕاسى من له‌يوا دوينم ك خودا خوه‌شى له‌ى ملله‌ته‌ ئه‌ياد له‌وه‌ر ئه‌وه‌گ فريه‌ له‌ هه‌ڵه‌يليان خوه‌ش ئه‌دێ، وه‌لێ تاكه‌ێ؟ نازانم.

عه‌لى حسێن فه‌يلى