هــــه‌واڵ عــیراق
دادوه‌ر دادگاييكه‌ر سه‌دام شكايه‌ت مه‌تڵه‌بى كرد له‌وه‌ر هانداين مه‌ردم دژ كورده‌يل فه‌يلى

دادوه‌ر دادگاييكه‌ر سه‌دام شكايه‌ت مه‌تڵه‌بى كرد له‌وه‌ر هانداين مه‌ردم دژ كورده‌يل فه‌يلى


شه‌فه‌ق نيوز/ دادوه‌ر مونير حه‌داد ك يه‌كيگه‌ له‌و دادوه‌ره‌يله‌ دادگايى سه‌دام حسێن سه‌رۆك وه‌رين عراقى كرد، شكايه‌تيگ دادگايى له‌ دادگاى په‌يجورى كه‌ڕاده‌ له‌ به‌غدا دژ سعه‌د مه‌تڵه‌بى ئه‌ندام ئه‌نجومه‌ن پاريزگاێ به‌غدا له‌بان ئئتلاف ده‌وڵه‌ت ياسا به‌رزه‌و كرد وه‌ تومه‌ت هانداين مه‌ردم له‌بان كوشتن و ته‌هجيركردن كورده‌يل فه‌يلى له‌ به‌غداێ پايته‌خت و سه‌ندنه‌وه‌ى ره‌گه‌زنامه‌ له‌ليان.

 

له‌و شكايه‌ته‌ ك حه‌داد به‌رزيه‌و كردگه‌و خوه‌يشى كورد فه‌يليه‌، ئه‌وه‌ ده‌ركه‌فت ك مه‌تڵه‌بى له‌ ريككه‌فت 20 حزه‌يران گوزه‌يشت له‌ ڕى ديمانه‌يگ ته‌له‌فزيۆنى وه‌ ريككه‌فت وه‌ل باس ئه‌نجامداين راپرسى هه‌رێم كوردستان ئه‌را سه‌روه‌خوه‌يى له‌ عراق، كورده‌يل له‌ عراق وه‌ گشتى گرته‌سه‌ ئامانج.

 

حه‌داد له‌و شكايه‌ته‌ ك تاريخ دويه‌كه‌ وه‌پيه‌و بوێ، وتگه‌ لێدوانه‌يل مه‌تڵه‌بى گوزارشه‌يليگ له‌تى هان مه‌ردم له‌بان كوشتن و ته‌هجير كورده‌يل فه‌يلى ئه‌ياد وه‌ زووره‌ملى و ده‌ركردنيان له‌ ماڵه‌يليان و جوور بيگانه‌ هساو بكريه‌ن و ره‌گه‌زنامه‌ێ عراقى له‌ليان بسينيه‌يده‌و و فڕه‌ بدريه‌نه‌ ده‌يشت مه‌رزه‌يل و له‌ پۆسته‌يليان لاوريه‌ن و ماڵ و موڵكه‌يليان زه‌فت بكريه‌ێد.

 

حه‌داد وت: ئى لێدوانه‌يله‌ ئاشوو تايفى له‌ناونى نه‌ته‌وه‌ى عه‌ره‌ب و كورد دروس ئه‌كاو جه‌نگ ئه‌هلى له‌لى ئه‌كه‌فێده‌و و له‌هه‌مان وه‌خت لێدوان مه‌تڵه‌بى له‌باره‌ێ ته‌هجير پيكهاته‌يگ گرينگ له‌ كومه‌ڵگاێ عراقى وه‌ يه‌كيگ له‌ ديارده‌يل ترۆر تاريف كرد ك شايه‌ت جه‌نگ تايفى جوور ساڵ 2007 بارێده‌و.

 

جى باسه‌، حه‌داد هه‌ميش وت: دوياێ ئه‌و لێدوانه‌يل مه‌تڵه‌بيه‌ چوار حاڵه‌ت كوشتن كورده‌يل فه‌يلى روێداگه‌و هه‌ر وه‌و خاتريشه‌ حه‌داد له‌ دادگا داوا كردگه‌ ڕى وشوون ياسايى بگريه‌ێده‌ وه‌ر ده‌رهه‌ق مه‌تڵه‌بى.