هــــه‌واڵ كــوردى
حكومه‌ت هه‌رێم له‌باره‌ى هه‌ڵوه‌شانن راپرسێ جواو نويسينگه‌ێ عبادى داره‌و

حكومه‌ت هه‌رێم له‌باره‌ى هه‌ڵوه‌شانن راپرسێ جواو نويسينگه‌ێ عبادى داره‌و


شه‌فه‌ق نيوز/ سه‌فين دزه‌يى قسه‌كه‌ر وه‌ناو حكومه‌ت هه‌رێم كوردستان جه‌خت له‌وه‌ كرد ك ده‌ستوور عراقى نواگيرى له‌ ئه‌نجامداين راپرسێ ناكاو هيزه‌يل پێشمه‌رگه‌يش هيزه‌يليگ نين له‌ ده‌يشت عراقه‌و هاتوێن.

 

دزه‌يى له‌ به‌ياننامه‌يگ له‌ جواودانه‌وه‌ى قسه‌يل سعه‌د ئه‌لحه‌ديسى قسه‌كه‌ر وه‌ناو نويسينگه‌ێ حه‌يده‌ر عبادى سه‌رۆك ئه‌نجومه‌ن وه‌زيره‌يل وت: هه‌ڵوه‌شانن ئاكامه‌يل راپرسێ مه‌سه‌له‌ێ ئاسانيگ نيه‌ جوور ئه‌وه‌گ وه‌رپرسه‌يل له‌ به‌غدا باوه‌ڕ ديرن و ئى مه‌سه‌له‌ په‌يوه‌سه‌ وه‌ ملله‌ت كوردستان و بڕيار خوه‌يان له‌ى باوه‌ته‌و دانه‌.

 

جى باسه‌، ئه‌لحه‌ديسى زويتر داواى ئه‌وه‌ كرد هه‌رێم كوردستان پابه‌ند بدێ وه‌ ده‌ستوور و هه‌ڵوه‌شانه‌وه‌ى ئاكامه‌يل راپرسێ ئه‌را سه‌روه‌خوه‌يى له‌ عراق ك له‌ رووژ 25 له‌ مانگ گوزه‌يشت ئه‌نجام دريا وه‌ل خوه‌يكيشانه‌وه‌ى هيزه‌يل پێشمه‌رگه‌ له‌ ناوچه‌يل كوردستانى ده‌يشت هه‌رێم كوردستان جوور مه‌رج ئه‌را گفتگوو له‌ ناونى به‌غدا و هه‌ولێر.