هــــه‌واڵ كــوردى
حكومه‌ت كوردستان جواو بڕيار دادگاى ناوه‌ندى داره‌و له‌باره‌ێ ده‌ستووريه‌ت راپرسى

حكومه‌ت كوردستان جواو بڕيار دادگاى ناوه‌ندى داره‌و له‌باره‌ێ ده‌ستووريه‌ت راپرسى


شه‌فه‌ق نيوز/ حكومه‌ت هه‌رێم كوردستان، ئاشكراى جواودانه‌وه‌ى كرد له‌بان بڕيار دادگاى باڵاى ناوه‌ندى له‌باره‌ى نه‌وين ده‌قيگ له‌ ده‌ستوور ڕى وه‌ جيابوينه‌وه‌ى هه‌ر پيكهاته‌يگ بيه‌ێد له‌ عراق و جه‌خت له‌وه‌ كرد ك كوردستان پابه‌نده‌ وه‌ له‌وه‌رگرتن ڕيه‌يل ده‌ستوورى و ياسايى ئه‌را چاره‌سه‌ر ناكووكيه‌يل ناونى به‌غدا و هه‌ولێر.

 

حكومه‌ت هه‌رێم كوردستان له‌ به‌ياننامه‌يگ ئه‌را(شه‌فه‌ق نيوز)له‌باره‌ى شيه‌وكردن مادده‌ى يه‌كه‌م له‌ ده‌ستوور عراقى له‌لايه‌ن دادگاى ناوه‌نديه‌و وت: له‌بان داواكارى ئه‌ميندار گشتى ئه‌نجومه‌ن وه‌زيره‌يل ناوه‌ندى له‌ 5/11/ 2017، دادگاى باڵاى ناوه‌ندى له‌ ريكه‌فت6/11/2017 بڕيار شماره‌ (122/اتحادية 2017)ده‌ركرد له‌باوه‌ت شيه‌وكردن مادده‌ى 1 له‌ ده‌ستوور عراقى ك ده‌قه‌گه‌ى ئه‌وه‌سه‌(كۆمار عراق ده‌وڵه‌تيگ ناوه‌ندى يه‌كگرتگ سه‌روه‌خوه‌يه‌و خاوه‌ن سه‌روه‌رى ته‌ماميگه‌و سيستم حوكم له‌تى كۆمارى په‌رله‌مانى ديموكراسيه‌و ئى ده‌ستووريشه‌ زامن يه‌كگرتگى عراقه‌).

 

به‌ياننامه‌گه‌ وت: وه‌جه‌ختكردن له‌بان پابه‌ندى هه‌رێم كوردستان ك هه‌ميشه‌ گه‌رديده‌ شوون چاره‌سه‌ر ناكووكيه‌يل له‌ناونى ده‌سڵاته‌يل ناوه‌ندى و هه‌رێم وه‌ ريه‌يل ياسايى و ده‌ستوورى و له‌ڕى ئه‌و هه‌ڵويستمانه‌ ك خوه‌شاڵيم وه‌گشت ده‌سپيشخه‌ريه‌يل له‌ى باوه‌ته‌وه‌و له‌وانه‌يش ده‌سپيشخه‌رى ئايه‌توڵڵا سه‌يد عه‌لى سيستانى و بريگ له‌ كه‌سايه‌تيه‌يل عراقى و ده‌وڵه‌ته‌يل دووس ملله‌ت عراق له‌باره‌ى گله‌وخواردن ئه‌را ده‌ستوور عراقى له‌وه‌ر چاره‌سه‌ر ناكووكيه‌يل و هه‌ر له‌يراوه‌ حورمه‌ت شيه‌وكردنه‌گه‌ى دادگاى ناوه‌ندى ئه‌گه‌ريم ئه‌را مادده‌ى 1 له‌ ده‌ستوور و جه‌خت له‌وه‌ ئه‌كه‌يم ك ئه‌يه‌ ئه‌دێده‌ بنه‌مايگ ئه‌را ده‌سوه‌پيكردن گفتگوو نيشتمانى گشتگيريگ ئه‌را چاره‌سه‌ر له‌ڕى جيوه‌جيكردن گشت مادده‌يل ده‌ستوورى وه‌ ته‌مامى و له‌وانه‌يش مقه‌يه‌تيكردن مافه‌يل و ده‌سڵاته‌يل و تايبه‌تمه‌نديه‌يل ك له‌ ده‌ستوور هاتنه‌ وه‌ ئه‌وه‌گ ته‌نيا ڕييگه‌ ئه‌را زه‌مانه‌ت يه‌كگرتگى عراق جوور ئه‌وه‌گ ئاماژه‌ وه‌پى كرياگه‌ له‌ مادده‌ى 1 له‌ ده‌ستوور.