ڕاپــۆرت تایبـه‌ت
ويرانه‌ێ موسڵ دوياێ ئازادكردنى

ويرانه‌ێ موسڵ دوياێ ئازادكردنى


شه‌فه‌ق نيوز/ وه‌ باڵه‌خانه‌يل ويرانه‌ێ و سه‌ياره‌يل ويرانكرياگى له‌ناو كويچه‌يلێ، شار كوين له‌ موسڵ بويه‌سه‌ ويرانه‌يگ له‌ شوون هه‌فته‌يليگ له‌ جه‌نگ سه‌خت له‌ناونى هيزه‌يل عراقى و ريكخرياگ ترۆريستى داعش.

 

شار كويه‌ن ك دڵ دويه‌مين گه‌وراترين شاره‌يل عراق بويه‌، جوور مه‌شهه‌ديگ له‌ فيلمه‌يل كووتايى جه‌هان دياره‌، وه‌لێ وه‌ل ئه‌وه‌يشا حه‌فاره‌يل ده‌سكردنه‌سه‌ جموجويل ئه‌را پاكه‌وكردن جاده‌يل پڕ له‌ زبڵدانى له‌ ناوه‌ند مێژوويى شار ئازادكرياگ له‌ژير ده‌سڵات ريكخرياگ داعش.

 

له‌ بنگه‌يگ نزيكيش، سه‌ياره‌يل موده‌ڕه‌ع جموجويل ئه‌كه‌ن ئه‌را پاكه‌وكردن ڕى له‌وه‌رده‌م كرده‌وه‌يل گه‌ردين له‌شوون دويا كه‌سيگ له‌ تونڕه‌وه‌يل ك شايه‌ت خوه‌يان شاردوينه‌و له‌ ناوچه‌گه‌.

 

عه‌قيد سه‌لام جاسم حسێن له‌ هيزه‌يل دژه‌ ترۆر وت: جه‌ماعه‌ت ترۆريستى هويچ له‌ليان نه‌مه‌ندگه‌و ناوچه‌گه‌ وه‌ ته‌مامى ها ژير كۆنترۆڵ هيزه‌يل ئاسايشى.

 

عه‌قيد سه‌لام ك باندج به‌ساوێده‌ پاێ دوياێ ئه‌وه‌گ له‌ جه‌نگيگ زه‌خمدار بوێ، وت: له‌ڕاسى جه‌نگ كووتايى وه‌پى هات و هيزه‌يل ئاسايشى سه‌ركه‌فتن گه‌ورايگ وه‌ده‌س هاوردن له‌بان ريكخرياگ ترۆريستى داعش.

 

هه‌رچه‌نى حه‌يده‌ر عبادى سه‌رۆك وه‌زيره‌يل عراقى و سه‌ركرده‌ێ گشتى هيزه‌يل چه‌كداريش ئاشكراێ سه‌ركه‌فتن كرد له‌بان دڕنده‌يى و ترۆر، وه‌لێ وه‌ل ئه‌وه‌يشا هيمان سه‌ربازه‌يل عراقى جه‌نگ وه‌ل ئه‌و ترۆريسته‌يله‌ ئه‌كه‌ن ك ئابڵوقه‌ دريانه‌ له‌ نزيك ئاو دجله‌.

 

دوياێ داين فه‌رمان له‌لايه‌ن عه‌قيد حسێنه‌و، دو قه‌ناس وه‌ده‌س و سه‌ربازيگ ك زه‌خيره‌و ته‌قه‌مه‌نى فره‌يگ وه‌پى بوى روێ كردنه‌ باڵه‌خانه‌يل ويرانكرياگ ئه‌را ئه‌وه‌گ شوون خوه‌يان قايم بكه‌ن و تونڕه‌وه‌يل له‌ناو بووه‌ن.

 

هيزه‌يل عراقى وه‌رده‌وامن له‌ پاكسسازى شاره‌گه‌و هيمان ترم تونڕه‌وه‌يل له‌بان خاك مه‌ندگه‌و بانيان درياگه‌ له‌ جاده‌ێ فريه‌يگ له‌ جاده‌يل شار كويه‌ن و له‌ ئاكام جه‌نگ و بوردمانه‌يل ئاسمانى ئى شاره‌ بويه‌ ويرانه‌.

 

شوونه‌وار كاولكارى له‌بان زوورم باڵه‌خانه‌يل شار كويه‌ن دياره‌ ك ناودار بوێ وه‌ بازاڕ جوان و شوونه‌واره‌يل مێژوويى.

 

بوردمانه‌يل ئاسمانى له‌ ديره‌ وه‌ختيگ رووژ دوشه‌ممه‌ێ گوزه‌يشت هه‌ر وه‌رده‌وام بوێ ئه‌را ئه‌وه‌گ دويا بنگه‌يل ئه‌و ريكخرياگ ترۆريستيه‌ بگرێده‌ ئامانج و گشت وه‌ختيگيش ده‌نگ ته‌قينه‌وه‌ێ گه‌ورايگ ژنه‌فياو دوياێ ئه‌وه‌يش له‌رزه‌ێ سووكيگ وه‌رجه‌ به‌رزه‌وبوين دويكه‌ڵ وه‌ره‌و ئاسمان و هيمان گومه‌زێ سه‌وز مزگفتيگيش وه‌ به‌ڵه‌نگووه‌يل بانگداينى دياره‌ له‌ناو ئه‌و ويرانه‌يله‌.

 

وه‌ل ئه‌وه‌يشا ده‌يان هه‌زار مه‌ده‌نى تويه‌نستن بهه‌يوان له‌شوون ئه‌وه‌گ له‌ بار سه‌ختيگ ژيان له‌ ئاكام كه‌مى خوه‌راك و خوارده‌مه‌نى و وه‌كارهاوردنيان جوور قه‌ڵغان به‌شه‌رێ له‌لايه‌ن تونڕه‌وه‌يل ترۆريستى داعشه‌و.

 

له‌ يه‌كيگ له‌ كويچه‌يل تر نزيك، پاشمه‌نده‌ێ مزگفت ئه‌لنورى دياره‌ ك تونڕه‌وه‌يل ته‌قاننه‌وه‌ێ، وه‌ل ناخوه‌ڕه‌ێ ئاويگ ك مه‌ردم ئه‌را ده‌سنمازگرتن هاورديانه‌ێ كار.

 

ئيسه‌يش خوه‌يبه‌خشه‌يليگ ئه‌را ده‌سميه‌ت هيزه‌يل ئاسايشى له‌و ناوچه‌ بڵاو بوينه‌سه‌وه‌و كه‌باب برشنن له‌ دويرێ چه‌ن گاميگ له‌ مه‌ناره‌ێ حه‌دباێ ويرانكرياێ ك چه‌ن سه‌ده‌يگه‌ دامه‌زرياوێد.