وتـــــار
قاپى گفتگوو كوتيم، وه‌لێ سواڵ له‌ كه‌س ناكه‌يم

قاپى گفتگوو كوتيم، وه‌لێ سواڵ له‌ كه‌س ناكه‌يم


شه‌فه‌ق نيوز/ دوياى ئاشكرابوين ئاكامه‌يل راپرسى ك جوور ته‌فويزيگ مه‌ردميه‌ روخساره‌يل گه‌شبينى باڵ كيشاسه‌ بان جاده‌ى كوردستانى وه‌ل داين متمانه‌ ئه‌را سه‌ركردايه‌تى سياسى و حكومه‌ت هه‌رێم ئه‌وه‌نه‌ى وه‌رگه‌گرتن باره‌يل قورسيگ و نه‌خشه‌ێ سياسه‌ته‌يل تازه‌يگ و پلانه‌يليگ بنه‌ڕه‌تى و تازه‌ ئه‌را روى وه‌ڕوى بوينه‌وه‌ى كيشه‌يل فريه‌و له‌وانه‌يش پلان سه‌روه‌خوه‌يى ك ئه‌گونجيه‌يد وه‌ل خواسته‌يل سه‌ده‌ێ بيس و يه‌ك وه‌ پێوه‌ره‌يلى و خواست و ئه‌نازه‌ێ و ئه‌و ئيراده‌ى بته‌وه‌ ك تويه‌نريه‌يد باريه‌ێده‌ به‌ر له‌ جموجويلداين چالاكيه‌يل و خاسى ئداره‌ له‌ خاسه‌وكردن ناكووكيه‌يل فريه‌يگ وه‌ل حكومه‌ت عراقى و ره‌سين ئه‌را چاره‌سه‌ر گشت هه‌ڵويست و كيشه‌يليگ له‌ڕێ گفتگوو ئارام و له‌يه‌كڕه‌سينه‌وه‌ و شيواز كاره‌يل و ئاماده‌گى ئه‌را ئه‌و كاره‌يله‌ وه‌ فكر و خياڵ و پلان و باوه‌ڕهاوردن چه‌ن مه‌سه‌له‌يگ‌ وه‌ به‌غدا وه‌ خواست و كاره‌يل چه‌سپياێ ك هه‌ر بايه‌سه‌ بخه‌نه‌ى خانه‌ێ ئعتبار، ئه‌ويش يه‌كه‌ميان ئه‌وه‌سه‌ ك كورد گله‌وناخوه‌ن وه‌ره‌و دويا و ئه‌وه‌گ روێدا له‌ 25/9/2017 جوور زاينده‌يگه‌ ك نه‌بايه‌د بچێده‌و ئه‌را ناو زگ داڵگێ و دويه‌ميش ئه‌وه‌سه‌ ك بايه‌سه‌ له‌بانيان ئه‌وه‌ له‌ياد نه‌وه‌ن ك ئيمه‌ رۆڵيگ بنه‌ڕه‌تى داشتيم له‌ ريڕه‌و ئه‌و ئاڵشتكاريه‌يله‌ ك رويدان وه‌ دريژايى مێژوو له‌ ناوچه‌گه‌و هه‌ميش ئه‌و رۆڵه‌ نيشان ئه‌يه‌يم له‌ ئاينده‌يش و شايه‌تيش تويڕه‌و بويمن و ره‌تيشه‌و بكه‌يم، سێيه‌ميش باوه‌ڕ وه‌پى كردنيان وه‌ قه‌بولكردن زاينده‌ تازه‌گه‌ و مامڵه‌كردن وه‌ليا وه‌ ئه‌مريگ واقع ك نه‌بايه‌د لاوريه‌يد يا بخنكريه‌ێد يا فه‌رامووش بكريه‌ێد وه‌هويچ شيوه‌يگ.

 

مه‌سه‌له‌ى چواره‌ميش خواست ئه‌وه‌سه‌ له‌ هه‌وڵه‌يلمان ره‌وامان بفامن وه‌خاتر سه‌روه‌خوه‌يى وه‌ گووره‌ى وه‌ختيگ بگونجيه‌يد وه‌ گووره‌ى سروشت قوناغه‌گه‌و گشت چشتيگ وه‌ناو خوه‌يه‌و ناو بنريه‌ێد و گشت هه‌قيقه‌تيگ ئاشكرا بكريه‌ێد. په‌نجه‌ميش ده‌م ئه‌وانه‌ بووه‌سريه‌ێد ك ئه‌چنه‌ بان مه‌نبه‌ر رويداريكردن و كراهيه‌ت دروس ئه‌كه‌ن پڕ له‌ خه‌ڵه‌تانن و غه‌شكردن و نه‌ف له‌ بار تازه‌ وه‌ربگيريه‌يد ك جياس له‌ بار گوزه‌يشت ك له‌تى بڕياره‌يليگ ده‌رچين وه‌گووره‌ى مه‌يل و خواست حوكمداره‌يل و بايه‌سه‌ لاپه‌ڕه‌يل جيا و تازه‌يگ واز بكريه‌ێد و داواكاريه‌يل سه‌رده‌م بگرێده‌ خوه‌ى.

 

دويا خاڵيش مكوڕبوين كورد‌ له‌بان گفتگوو ماناى سواڵكردن يا كزبوين يا ترس نيه‌ له‌ هه‌ڕه‌شه‌ و ئابڵوقه‌و ته‌نانه‌ت جه‌نگيش، چوينكه‌ ئه‌وه‌گ ئمڕوو روێ ئه‌ياد و له‌ رووژه‌يل ئاينده‌يش ناڕه‌سێده‌ دڕندانه‌ى ئه‌نفال.

 

ئى راپرسيه‌ ك گه‌شبينى دروس كرد، ناڕه‌حت به‌غدا كردگه‌ وه‌ رووح تويڕه‌يى نه‌ته‌وه‌يى و خوسه‌و كينه‌ شوفينيانه‌يگ له‌لاى به‌عزيگ له‌ ناحه‌زه‌يل ك يه‌كه‌وگرتنه‌ دژ هه‌وڵه‌يل كوردستانى و برده‌يانه‌و ئه‌را كينه‌ت كوورانه‌يان ك بنه‌ڕه‌ته‌ له‌ مامڵه‌كردنيان وه‌ل كورد و كيشه‌يل كوردى و جام كينه‌ت و بوغز ژاراوييان رشننه‌ بان ده‌نگده‌ره‌يل له‌ راپرسێ ك هاوكيشه‌گه‌ قه‌ڵبه‌و كردگه‌ له‌ ده‌روين ئه‌وانگ نه‌فامى و گيلى ديرن و ئه‌وانه‌گ نازانن ك سياسه‌ت پيكهاتگه‌ له‌ بڕيگ له‌ كرده‌وه‌يل و ئاقڵيش خاسه‌گه‌يان هه‌ڵوژنێد و ئه‌وانه‌كيش نه‌ف له‌ ئه‌زموون گوزه‌يشت و ژان ئيسه‌و ترس له‌ ئاينده‌ وه‌رنه‌گرتنه‌، به‌ڵكوو له‌گشت مێژوو و هانيان دريا تا كوردستانيه‌يل تومه‌تبار بكه‌ن وه‌بى هويچ فه‌هميگ ك لێدوان و قه‌وڵه‌يل خراويان ئحراجيان ئه‌كا و ئحراج ئه‌و لايه‌نه‌يليشه‌ ك سه‌ر وه‌پيانن و مه‌سه‌له‌ێ راپرسييش پرووسه‌يگ ديموكراسيه‌ و نه‌بايه‌د جى ناڕه‌زايه‌تى بوود و بڕياريش له‌ى باوه‌ته‌و مافيگ شه‌رعيه‌ ئه‌را ملله‌ت كورد وه‌گشت پێوه‌ره‌يل ديموكراسى و ژيارى و ريڕه‌وه‌يل جه‌هانى و نه‌بايه‌د پاشگه‌زى له‌لى بكريه‌ێد و نه‌بايه‌د حكومه‌ت عراقى هويچ گاميگ بنه‌ێد ئه‌را په‌كخستن ئى ريڕه‌وه‌، چوينكه‌ گونجياگه‌ وه‌ل ده‌ستوور عراقى و كاره‌يل خراو ئه‌را ئى گامه‌ مه‌ترسيه‌ و ناكووكيه‌يل فريه‌يگ و گه‌وراتريگ له‌لى ئه‌كه‌فێده‌و له‌ناونى كورد و عه‌ره‌ب و له‌بان گشت ئاسته‌يل فه‌رمى و مه‌ردمى، ئمجا له‌وه‌ر ئه‌وه‌گ حكومه‌ته‌يل وه‌رين ئى راسيه‌يله‌ پشتگووش خستنه‌ و گشت وه‌سيله‌يليگ شوفێنى و دڕندانه‌ هاوردنه‌ كار ئه‌را زه‌فه‌رهاوردن له‌ وجوود و ئيراده‌ى كورد، ئه‌وه‌سه‌ له‌ئاكام چينه‌ ناو زبڵدان مێژوو و سه‌بر ملله‌ت كوردستانيش دياره‌ له‌ واقع له‌بان خاكه‌گه‌ێ و په‌يوه‌سن وه‌ دووسى و ئاشتى وته‌فاهوم و روى له‌ ئاشكراكردن ده‌وڵه‌ته‌ سه‌روه‌خوه‌ييه‌گه‌ى كرد جوور باقى ملله‌ته‌يل تر، دوياخريش ئويشيم: كورد قاپى گفتگوو كوتن، وه‌لێ سواڵ له‌كه‌س ناكه‌ن.

سوبحى ساڵه‌يى