وتـــــار
كورد فه‌يلى.. مه‌ينه‌تى له‌بان رفه‌يل پشتين

كورد فه‌يلى.. مه‌ينه‌تى له‌بان رفه‌يل پشتين


شه‌فه‌ق نيوز/ مه‌ويسى كورد فه‌يلى جوور مه‌ويسى مه‌ردمان تر نيه‌، بيجگه‌ قه‌واره‌ى كاره‌سات له‌ هه‌مان وه‌خت يه‌تيميگيشه‌ بى سه‌رپه‌رش و نه‌ نه‌ته‌وه‌ هويرى ئه‌كا نه‌يش مه‌زه‌و، يه‌يش له‌وه‌ختيگ قوربانى له‌ تواناى خوه‌يان فيشتر ئه‌رايان دانه‌و كيشه‌يان ئه‌وه‌سه‌ ئنتمايان ئه‌را عراق و په‌يوه‌سبوينيان وه‌ نيشتمان گه‌وراترين و گرينگترينه‌و يه‌يش هووكار كيشه‌گه‌يانه‌.

 

عراق داخداره‌ له‌و زه‌خمه‌ ك ئاكام مه‌ينه‌ته‌يليانه‌و نيشتمانيش شه‌رمه‌زاره‌ ئه‌را ئه‌وه‌ك وه‌فا نه‌ياشت ئه‌رايان، ئمجا ئه‌گه‌ر ئيمه‌ مناێ ده‌سڵات پيس عه‌فله‌قيه‌يل نه‌كرديايم، ئه‌ى عوزر سێ حكومه‌ت چه‌س ك حزبه‌يل تايفه‌و نه‌ته‌وه‌يل و كه‌سه‌يليگ جڵه‌وگر به‌رنامه‌يلى بوين و له‌ لێدوانه‌يليان باس له‌ مه‌سه‌له‌ى نيشتمانى و ئنسانى و ديموكراسى كرديان و نوێنه‌رايه‌تى ملله‌ت كردن وه‌بى ئه‌وه‌گ ده‌س بنه‌ بان ئه‌و زه‌خمه‌يل خويناويه‌ وه‌ دريژايى فيشتر له‌ 37 ساڵ خوين چوڕانياد يا نوڕستنيگ ئه‌راى له‌وه‌ر ئه‌وه‌گ كه‌ميگ له‌ ژانى كه‌مه‌و بوود.

 

له‌ وڵات خوه‌يان كووچ كريان و ماڵ و موڵكيان هيشتنه‌ جى و له‌وانه‌يش ئه‌زيزتر دويه‌ت و كوڕه‌يليان، ك هه‌ر خيزانيگ نيمه‌ى ئه‌ندامه‌يلى يا سێكوتيان له‌ده‌سداو له‌لايه‌ن خراوه‌كاره‌يل ئى نيشتمانه‌ كاره‌سات دڕندانه‌ وه‌سه‌ريان هاوريا له‌ زانكۆ و خوه‌ندنگاو وازيگايه‌يل و باخچه‌ى ساوايه‌يل و باوه‌ش داڵگه‌يل، وه‌جووريگ ك وژدان ئنسانى له‌ ده‌مار ئه‌را ده‌مار له‌ناو چى وه‌ شيوازيگ شيانه‌و هه‌زاران كه‌س له‌ى پيكهاته‌ كه‌فتنه‌ ناونى كوشتن و ده‌ركردن و داڵگ و خوه‌يشگ و هاوسه‌ر و ميمگه‌يليگ ئه‌را خه‌م و ده‌رده‌سه‌رى مه‌ندنه‌و وه‌ ئه‌زره‌ت ديده‌ن ئه‌وانه‌گ له‌ باوه‌شيان رفيان و باوگه‌يليش چه‌وه‌يليان روێ وه‌ره‌و ئاسمان عراق كردنه‌ ئه‌را هه‌واڵ و فه‌ره‌ج درووكانييشگ ك هه‌رچه‌نى ئه‌زيزه‌يليان بى سه‌رو شوونن له‌ خاكه‌يل عراق وه‌ل رووحه‌يليگ حنيه‌ت و چه‌وه‌ڕيگ ئه‌را زانستن چاره‌نويس هيمان ها ته‌مايان.

 

كورد فه‌يلى تويش نه‌خوه‌شى به‌رزه‌وبوين فشار نيشتمانى هاتنه‌، ئمجا له‌ خه‌باتكردن مه‌ردمى ئه‌وان يه‌كه‌مين كه‌سه‌يليگ بوينه‌و له‌ كيشه‌كيش چينايه‌تييش يه‌كه‌مين شه‌هيد بوينه‌ ئه‌را وه‌رگرى له‌ ماف فه‌قيره‌يل و له‌ روى وه‌ڕوى بوينه‌وه‌يل وه‌فاى نيشتمانى ئنسانييش كوشياگ و زه‌خمدار داشتن له‌پشت په‌رچه‌م شووڕش 14ى ته‌ممووز و سه‌ركرده‌ نيشتمانيه‌گه‌ى و له‌ مه‌يدانه‌يل كيشه‌ى كورديش خوين له‌بان خاك كوردستان رشانن و له‌وه‌ر كه‌محاڵ عه‌ره‌ب باشوور و ناوڕاس عراقيش نه‌ريته‌يل كه‌ربه‌لايى داشتن ئه‌را باوه‌ گه‌ورايان حسێن(س . خ)جوور فيداكارى و قوربانى وه‌خاتر هه‌ق و دادگارى و له‌ به‌ره‌ى فكر و ماريفه‌تيش جه‌نگاوه‌ر بوينه‌ وه‌خاتر ئازادى وشه‌و ئازادكردن رووشنهويرى نيشتمانى، ك يه‌يش ئه‌و سفته‌يل خاسه‌سه‌ ك خه‌رجيان بويه‌ وه‌ گووره‌ى رووژگار.

 

عراق هيمانى ناڵنێد ئه‌را له‌ده‌سداين پيكهاته‌يگ ك جوانيه‌گه‌ى وه‌بى ئاماده‌بوينى ته‌مام نادێ و نيشتمانيش پڕ ژانه‌ ئه‌را گومبوين ئه‌زيزه‌يليگ له‌ رووڵه‌يلى له‌ گووشه‌ێ غوربه‌ت ك ئوميديان قه‌ره‌باڵغى خسته‌سه‌ ده‌روازه‌يل نيشتمان ئه‌زيز و پاسه‌وان كويه‌ن تازه‌يش پيشوازى وه‌ هاتنيان ناكه‌ن و مه‌يل وازكردن قاپى ئه‌رايان نه‌يرن له ‌ترس هاتن گه‌رده‌لويل نيشتمانى له‌ جاده‌ى عراقى.

 

سێ حكومه‌ت گشت خێر و به‌ير ئى وڵاته‌ له‌ناونى خيزان و كه‌سه‌يل نزيك له‌ خوه‌يان و تاكه‌يل حزب و ئه‌شره‌ت دابه‌ش كردن وه‌بى ئه‌وه‌گ هوير له‌ هاوردنه‌وه‌ى چشتيگ ئه‌را خاوه‌ن هه‌قه‌يل بكه‌ن.

 

كورد فه‌يلى هه‌ڵويسته‌يل نيشتمانى شه‌ره‌فمه‌نديگ له‌ژير پاى نيشتمانى چه‌قانن ك هه‌رچه‌نى مه‌ردمان تر بى وه‌فايى نيشان دان، وه‌لێ هيمان عراق له‌ چه‌ويان بيتاوانه‌ شايسته‌ى فيشتر له‌وه‌سه‌ پيشكه‌شى بكه‌ن.

 

ئايا هيمان نيشتمان مه‌ندگه‌و هيمان ئاده‌ميزاد له‌تى بى سه‌روشوونه‌ و عراق زه‌خمه‌يلى پشتگووش خست و جاده‌ى عراقييش زاكره‌تى له‌ده‌س داگه‌و داره‌ خوه‌رمايه‌يليش جاڕسن له‌ چه‌وه‌ڕيكردن و دوچه‌مانيش تويش ژان دڵته‌نگى هاتنه‌ و به‌غدايش سووز دايگانه‌ له‌ده‌سدا و مه‌ردميش وژانيان له‌ هوير بردنه‌..؟ يا هيمان عراقه‌گه‌ێ جارانه‌ وه‌ مه‌ردمه‌گه‌ێه‌و؟.

 

ئه‌ى كى قاپيه‌يل نيشتمان ئه‌را كورده‌يل فه‌يلى واز بكا.. كى له‌ ئاهه‌نگ وه‌فادارى چه‌وه‌ڕييان ئه‌كا.. كى خاتريان ئه‌ياده‌وه‌و زاكره‌يان پاكه‌و ئه‌كا له‌ژان مه‌ويسى.. كى فايل مه‌ينه‌تيليان له‌ گووشه‌ى فه‌رامووشكردن پاكه‌و ئه‌كاو له‌بان رفه‌ێ پشتين به‌رزيه‌و ئه‌كاو ئه‌خاده‌ى ئه‌مانه‌تيگ پيرووز له‌ باوه‌ش گه‌رم نيشتمان..؟

 

جارجاريگ مناى خوه‌م ئه‌كه‌م له‌بان دوباره‌كردنه‌وه‌ى وشه‌ێ(كورد فه‌يلى)، ك يه‌يش له‌وانه‌ بوى عافيه‌ت و ئازايه‌تى دانه‌ چوار پيت عراق، ك ئه‌ويش عراقيگ كووچكرياگ و غه‌ريب و زه‌خمى و ئه‌وانيش عراق جوانيگ بوين.

 

ئايا حكومه‌ت ئه‌تويه‌نێد كراس شووره‌يى كويه‌ن حكومه‌ت وه‌رين لاوه‌ێد و ناچارى له‌ روخسار عراق و شه‌رمه‌زارى له‌ وه‌رانوه‌ر رووڵه‌يلى هه‌ڵگرێد و وه‌ناو نيشتمان و ملله‌ت عوزرخوازى بكا وه‌ گورجى كار و كرده‌وه‌يلى ئه‌را هاوردنه‌وه‌ى گشت مافه‌يل گيانى و مه‌عنه‌وى ئى پيكهاته‌ له‌ڕى له‌وه‌رگرتن ڕى وشوونه‌يل ياسايى يه‌كلاكه‌ر و گشت بڕياره‌يل خراويگ له‌بانيان هه‌ڵگرێد ك هاته‌ تويش ميژوو نيشتمانى و ئنتماى عراقى و حاڵه‌يل كووچكردن و غوربه‌ت و بى سه‌روشوون رووڵه‌يليان و ئه‌و ژانه‌ و مه‌ينه‌تيه‌يله‌ ك هاته‌ تويشيان، ئايا سه‌رۆك وه‌زيره‌يل تواناى ئى كاره‌ ديرێد..؟ چه‌وه‌ڕى ئه‌كه‌يم، وه‌لێ سه‌برمان نه‌مه‌ند.

 

رووشنهويره‌يل عراق و ره‌ساننكاره‌يل و نويسه‌ره‌يل و شاعره‌يل و هونه‌رمه‌نده‌يل و فكرمه‌نه‌يل كه‌ى ده‌سپيشخه‌رى ئه‌كه‌ن ئه‌را به‌رزه‌وكردن شه‌ره‌ف وژدان عراقى، يه‌يش بانگه‌وازيگه‌و قابل دوياخستن نيه‌.

 

شه‌ره‌فه‌ ئه‌رام ناسنامه‌ى ئه‌وان وه‌پيم بدريه‌ێد، ئه‌وان ماف داشتن ناسنامه‌ ئنتماى راسكانى ئه‌را نيشتمان ديرن و نه‌بايه‌د چه‌وه‌ڕيى بكه‌ن وه‌تايبه‌ت ئه‌وانه‌گ له‌ڕى كاره‌يل ته‌زويركردن ره‌سينه‌وه‌ نيشتمانه‌گه‌يان، ئه‌ويش له‌وه‌ر ئه‌وه‌گ عراق باێده‌ بان هه‌قيقه‌ت خوه‌ى و كه‌سايه‌تى نيشتمانى وه‌ راسى ده‌ربكه‌فێد وه‌ هاتنه‌وه‌و ئنسافكردن كورده‌يل فه‌يلى.

 

يه‌يش خواستيگه‌و قايل دوياخستن و له‌هويره‌وبردن نيه‌، مه‌حه‌كيگه‌ ئه‌را هه‌ركه‌سيگ ئنتما ئه‌را رووڵه‌يل عراق ئه‌خوازێد.

حه‌سه‌ن حاته‌م ئه‌لمه‌زكور