هــــه‌واڵ عــیراق
ئسرائيل سه‌ردان شانده‌يل عراقى پيكهاتگ‌ له‌ 15 كه‌سايه‌تى شيعه‌و سنى ئاشكرا كرد

ئسرائيل سه‌ردان شانده‌يل عراقى پيكهاتگ‌ له‌ 15 كه‌سايه‌تى شيعه‌و سنى ئاشكرا كرد


شه‌فه‌ق نيوز/ حكومه‌ت ئسرائيلى جه‌خت له‌وه‌ كرد ك سێ شاند سياسى عراقى له‌ ماوه‌ى چه‌ن خه‌فته‌يگ وه‌رجه‌ ئيسه‌ سه‌ردان ئسرائيل كردنه‌.

 

له‌ى باوه‌ته‌و، وه‌زاره‌ت خارجيه‌ى ئسرائيلى له‌ به‌ياننامه‌يگ ك له‌بان ماڵه‌په‌ڕه‌يل په‌يوه‌ندى كۆمه‌ڵايه‌تى تويته‌ر بڵاو كريا، وت: له‌ ماوه‌ى هه‌فته‌يل دوياخر ساڵ گوزه‌يشت سێ شاند وه‌ شيوه‌يگ نافه‌رمى سه‌ردان ئسرائيل كردنه‌و ئه‌و شانده‌يليشه‌ كه‌سايه‌تيه‌يل شيعه‌و سنى و سه‌ركرده‌يل ناوچه‌يى گرته‌سه‌ خوه‌ى ك كاريگه‌رن له‌ عراق و باس له‌وه‌يش كرد ك ئه‌و شانده‌يله‌ سه‌ردان مووزه‌خانه‌ى(ياد فاشيم)يش كردنه‌.

 

به‌ياننامه‌گه‌ يه‌يش ده‌رخست ك ئه‌و شانده‌يله‌ چه‌ويانيش كه‌فته‌سه‌ شماره‌يگ له‌ ئه‌كاديميه‌يل و وه‌رپرسه‌يل ئسرائيلييش و ئاشكرايشى كرد ك ئه‌و شانده‌يله‌ پيكهاتنه‌ له‌ 15 ئه‌ندام و سه‌رچه‌وه‌يل تر باس له‌وه‌يش كردنه‌ ك يه‌كيگيش له‌و كه‌سايه‌تيه‌يله‌ فريه‌ نزيك بويه‌ له‌ حه‌نان فه‌تلاوى.