هــــه‌واڵ كــوردى
ئيران ئاو ئه‌ڵوه‌نيش له‌ خانه‌قين بڕێ

ئيران ئاو ئه‌ڵوه‌نيش له‌ خانه‌قين بڕێ


شه‌فه‌ق نيوز/ ئداره‌ێ وه‌ربه‌س ئه‌ڵوه‌ن له‌ قه‌زاێ خانه‌قين له‌ پاريزگاێ دياله‌ ئاشكراێ ئه‌وه‌ كرد ك ئيران ئاوه‌يل چه‌م ئه‌ڵوه‌نيش بڕيه‌ ك له‌ناو خاكه‌يليه‌و سه‌رچه‌وه‌ ئه‌گرێد ئه‌را ناو خاك عراق له‌ قه‌زاگه‌و ئاماژه‌ وه‌يه‌يش كرد بڕين ئه‌و ئاوه‌ بويه‌سه‌ هووكار كزبوين جه‌ريان ئاو له‌ چه‌مه‌گه‌.

 

له‌ى باوه‌ته‌و، ئه‌حمه‌د وسه‌ين وه‌ڕيه‌وبه‌ر وه‌ربه‌سه‌گه‌ وت: ئاو ئه‌ڵوه‌ن له‌ باشوور خوه‌رئاواێ ئيرانه‌و تيه‌ێده‌ ناو قه‌زاگه‌و مه‌ردم ئاوايه‌يل ناوچه‌ێ قوله‌ يه‌هوودێ وه‌رجه‌ گشت مه‌ردم شار خانه‌قين نه‌ف له‌لى وه‌رئه‌گرن وه‌ ئه‌وه‌گ ته‌نيا سه‌رچه‌وه‌يگه‌ له‌ ناوچه‌گه‌.

 

وسه‌ين وت: ئيران ئاو ئه‌ڵوه‌ن بڕيه‌و ئيه‌سه‌يش جه‌ريان ئاو له‌ چه‌مه‌گه‌ فريه‌ كزه‌و بويه‌و زه‌ره‌دمه‌ن يه‌كه‌ميش له‌ى بڕين ئاوه‌ قه‌زاێ خانه‌قين و ئاوايه‌يل ده‌وگرديه‌ و ئاماژه‌ وه‌يه‌يش كرد ك ئاگادار ده‌سڵاته‌يل پاريزگاێ دياله‌و گه‌ورا وه‌رپرسه‌يل له‌ حكومه‌ت عراقييش كرياگه‌ ئه‌را ئه‌وه‌گ جموجويل بكه‌ن و گفتگوو ئه‌نجام بيه‌ن وه‌ل لايه‌ن ئيرانى ئه‌را چاره‌سه‌ر ئى كيشه‌.

 

جى باسه‌، بڕين ئاو ئه‌ڵوه‌ن دوياێ بڕين ئاوه‌يل زێى بويچگ هات له‌ هه‌رێم كوردستان ك دوياێ فشار فريه‌يگ له‌لايه‌ن حكومه‌ت هه‌رێمه‌و به‌شيگ له‌لى وه‌ردا.