هــــه‌واڵ كــوردى
يه‌كێتى نيشتمانى به‌ياننامه‌يگ له‌باره‌ى به‌شداريكردنى له‌ حكومه‌ت كوردستان ده‌ركرد

يه‌كێتى نيشتمانى به‌ياننامه‌يگ له‌باره‌ى به‌شداريكردنى له‌ حكومه‌ت كوردستان ده‌ركرد


شه‌فه‌ق نيوز/ مه‌كته‌ب سياسى يه‌كێتى نيشتمانى كوردستان، ئاشكراى ئه‌وه‌ كرد به‌شداريكردن حزبه‌گه‌ى له‌ دامه‌زرانن حكومه‌ت تازه‌ى هه‌رێم كوردستان په‌يوه‌سه‌ وه‌ هاوبه‌شى راسكانى و رۆڵ و كاريگه‌ريى له‌ بڕياره‌يل جوور ئه‌وه‌گ له‌ ريككه‌فتنه‌ سياسيه‌گه‌ ئاماژه‌ وه‌پى كرياگه‌و وت: بايه‌سه‌ حكومه‌ت هه‌رێم و گشت لايه‌نه‌يل به‌شدار پابه‌ند بوون وه‌و بڕگه‌و ماده‌يله‌ ك هاتگه‌ له‌ ياساى بودجه‌ى گشتى عراقى ئمساڵ 2019.

 

مه‌كته‌ب سياسى يه‌كێتى نيشتمانى له‌ به‌ياننامه‌يگ دوياى دانيشتنى وه‌ سه‌رپه‌رشى كۆسره‌ت ره‌سول عه‌لى جيگر يه‌كه‌م ئه‌مينداره‌ گشتيه‌گه‌ێ و وه‌ئاماده‌بوين به‌رهه‌م ساڵح جيگر دويه‌م جه‌خت له‌ هه‌ڵه‌په‌ڵه‌ ئه‌را گامناين تايبه‌ت وه‌ دامه‌زرانن حكومه‌ت تازه‌ى هه‌رێم كرد و وت: به‌شداريكردن يه‌كێتى په‌يوه‌سه‌ وه‌ هاوبه‌شى راسكانى و رۆڵ و كاريگه‌ريى له‌ بڕياره‌يل جوور ئه‌وه‌گ له‌ ريككه‌فتنه‌ سياسيه‌گه‌ى ناونى پارتى و يه‌كێتى هاتگه‌و هه‌ردوگلا له‌بانى ئمزا كردنه‌.

 

به‌ياننامه‌گه‌ هه‌ميش وت: يه‌كێتى جه‌خت له‌ خواست به‌شداريكردن راسكانى ئه‌كا له‌ بڕياره‌يل و ده‌سڵاته‌يل سه‌رۆكايه‌تى هه‌رێم و سه‌رۆكايه‌تى حكومه‌ت و سه‌رۆكايه‌تى په‌رله‌مان و دوسيه‌ى ئه‌منى و دارايى و گشت پرسه‌يل له‌ بڕياردان.