ڕاپــۆرت تایبـه‌ت
نورا .. دوياێ زوڵم و ده‌سدريژى داعش وه‌ره‌و قورتاركردن

نورا .. دوياێ زوڵم و ده‌سدريژى داعش وه‌ره‌و قورتاركردن


شه‌فه‌ق نيوز/ چه‌كداره‌يل ريكخرياگ ترۆريستى داعش نورا خه‌ڵه‌ف ئێزيدى ئه‌را ماوه‌ى 3 ساڵ دويره‌و خستن له‌ ئاوايه‌ بويچكه‌گه‌ێ خوه‌ێ له‌ عراق ئه‌را ناو خاكه‌يل ژير ده‌سڵاتيان له‌ سورياو  په‌نج جاريش سه‌ندن و فرووشتن وه‌پى كردن وه‌رجه‌ ئازادبوينى له‌ى دوياخره‌ وه‌ل مناڵه‌يلى.

 

خانمه‌ سه‌ركرده‌يگ له‌ يه‌كه‌يل پاسه‌وان ئافره‌ت كورد، وت: نورا يه‌كيگه‌ له‌و ژنه‌ ئێزيديه‌يل فريه‌ ك جه‌نگاوه‌ره‌يل كورد خوازيار ئازادكردنيان بويه‌ له‌ژير ده‌سڵات ريكخرياگ تونڕه‌و داعش له‌ كرده‌وه‌يل ژير وه‌ژير.

 

ئه‌و يه‌كه‌يله ناو ئى كرده‌وه‌يله‌ نان "هه‌ڵمه‌ت توڵه‌ ئه‌را ئافره‌ته‌يل شه‌نگاڵ" ك شوون كه‌مينه‌يل ئێزيديه‌يله‌ له‌ عراق و ريكخرياگ ترۆريستى داعش له‌ تاوسان 2014 داگيرى كرد.

 

شايه‌تحاڵه‌يل و وه‌رپرسه‌يليگ عراقى باس له‌وه‌ كردن ك تونڕه‌وه‌يل داعش هه‌زاران كه‌س له‌ ئێزيديه‌يل دويره‌و خستنه‌و كوشتنه‌و ئغتساب كردنه‌ له‌ وه‌ختيگ چينه‌سه‌ ناو باكوور عراق و پاكسازێ ره‌گه‌زێ دژ كه‌مينه‌ێ ئێزيديه‌يل ئه‌نجام دان و باوه‌ڕيانيش ئه‌وه‌سه‌ ك هيمان تائيسه‌يش نزيكه‌ێ سێ هه‌زار ئافره‌ت له‌ ديلى مه‌ندنه‌.

 

نه‌سرين عه‌بدوڵڵا سه‌ركرده‌ له‌ يه‌كه‌يل پاسه‌وان ئافره‌ته‌يل وت: تائيسه‌ نزيكه‌ێ 200 ژن و مناڵ له‌ باكوور عراق ئازاد كريانه‌ له‌ شوونه‌يل جياجيا له‌ سوريا له‌لايه‌ن يه‌كه‌يل پاسه‌وان ملله‌ت كورد و يه‌كه‌يل پاسه‌وان ئافره‌ته‌يل.

 

نه‌سرين وت: يه‌كه‌يل پاسه‌وان ملله‌ت كورد له‌ چوارچيوه‌ێ هه‌ڵمه‌تيگ ده‌س وه‌ى كرده‌وه‌ كرد وه‌ پشتگيرى وڵاته‌يل يه‌كگرتگ ئه‌را هاوردنه‌وه‌ى شار ڕقه‌ شوون و بنگه‌ێ ريكخرياگ تونڕه‌و له‌ سوريا.

 

نه‌سرين ئويشێد: له‌و وه‌خته‌يله‌و تائيسه‌ ئيمه‌ هه‌وڵ ئه‌يه‌يم ئه‌و ئافره‌ته‌يل ئێزيديه‌ قورتار بكه‌يم ك وه‌ ديل كه‌فتنه‌سه‌ لاى ريكخرياگ داعش و باس له‌وه‌يش كرد ك جه‌نگاوه‌ره‌يل كورد په‌يوه‌ندى وه‌پيه‌و كردنه‌و پلانيگ وه‌شيوه‌ى گونجياگ دانانه‌ ئه‌را ئازاكردن ئافره‌ته‌يل.

 

نورا ئه‌وه‌ ده‌رخست ك چه‌كداره‌يل داعش له‌ پاريزگاى حماێ سورى دويريه‌و خستنه‌ ئه‌را ماوه‌ێ ساڵيگ و مناڵه‌يليشى وه‌ليا بوينه‌ له‌ وه‌ختيگ پياويگ وايانه‌سه‌يان، وه‌لێ ئاشكراێ ناوه‌گه‌ێ نه‌كرد ك ئه‌و كرده‌وه‌يشه‌ ئه‌را قورتاركردنى له‌لايه‌ن يه‌كه‌يل پاسه‌وان ملله‌ت كورد جيوه‌جى كرياوێد.

 

نورا وت: پلانه‌گه‌ له‌ساێ بنگه‌يليگ دانرياگه‌ ك ريكخرياگ داعش فه‌رزى كردگه‌و نواگيرى له‌ چه‌كداره‌يلى ئه‌كا مۆبايل وه‌ل خوه‌يان هه‌ڵگرن ئه‌را به‌ره‌يل جه‌نگ، ك ئه‌و چه‌كداريشه‌ ك ده‌سوه‌سه‌ر نورا كردگه‌ مۆبايله‌گه‌ێ له‌ ماڵ وه‌جى هيشتوێد و يه‌يش له‌يوا كرد نورا په‌يوه‌ندێ وه‌ براگه‌ێ خوه‌ێ بكاو ئه‌ويش له‌لايه‌ن خوه‌يه‌و داواێ ده‌سميه‌ت يه‌كه‌يل پاسه‌وان ملله‌ت كردگه‌ ئه‌را قورتاركردن خوه‌يشكه‌گه‌ێ.

 

نورا(24 ساڵان)، ئه‌بو عومه‌ێر مۆبايله‌گه‌ێ له‌ ماڵ هيليده‌ جى هه‌ناێ ك ئه‌چێد ئه‌را ربات، يه‌يش ئويشيد من شماره‌ى براگه‌م زانستم و وه‌و مۆبايله‌ په‌يوه‌ندێ وه‌پيه‌و كردم.

 

دوياخريش ئاگادار نورا كريا ك بايه‌سه‌ له‌بانى چه‌وه‌ڕێ بكا په‌يوه‌ندێ وه‌پيه‌و بكريه‌ێد تا پياويگ باێد و قورتارێ بكاو كه‌ليمه‌ێ سڕيش وه‌پى دا تا بزانێد چگن وه‌ل ئه‌و پياوه‌ ئه‌مانه‌.

 

دوياێ ئه‌وه‌يش ك چه‌كداره‌يل داعش نورا و هه‌رچوار مناڵه‌گه‌ێ له‌ ساڵ 2014 رفانن، له‌ڕى ناوچه‌يل جياجيا له‌ باكوور عراقه‌و وه‌ل ده‌يان ئافره‌ت تر له‌ شار كۆجۆ له‌ شه‌نگاڵ جيوازى كردن و باس له‌وه‌يش كرد و وت: تائيسه‌يش نازانم چاه‌رنويس هاوسه‌ره‌گه‌م وه‌ كاملا ره‌سێ.

 

ئيسه‌يش نوراو مناڵه‌يلى له‌ باكوور خوه‌رهه‌ڵات سوريا له‌ناو ناونديگ جينشين كريانه‌ ك له‌لايه‌ن ليژنه‌ێ ئافره‌ته‌يل سه‌رپه‌رشى ئه‌كريه‌ێد و سه‌ر وه‌ كورده‌يله‌.

 

وه‌ل ئه‌وه‌يشا وه‌رجه‌ ماوه‌يگيش جه‌نگاوه‌ره‌يل كورد دويه‌ته‌ێ نورايش قورتار كردن ك ته‌مه‌نى هه‌فت ساڵانه‌ و له‌ نزيك شار ڕقه‌ فرووشيا و ئيسه‌يش ره‌سيه‌سه‌ لاى كه‌س وكارى له‌ شه‌نگاڵ.