هــــه‌واڵ عــیراق
حزب شيوعى هه‌ڵويست تونيگ له‌باره‌ێ هه‌ڕه‌شه‌ له‌ كورده‌يل فه‌يلى نيشان دا

حزب شيوعى هه‌ڵويست تونيگ له‌باره‌ێ هه‌ڕه‌شه‌ له‌ كورده‌يل فه‌يلى نيشان دا


شه‌فه‌ق نيوز/ حزب شيوعى عراقى ئه‌و لێدوانه‌يله‌ ره‌ته‌و كرد ك باس له‌ ده‌ركردن رووڵه‌يل كورده‌يل فه‌يلى كرد وه‌ل سه‌ندنه‌وه‌ێ ره‌گه‌زنامه‌ له‌ليان، هه‌ر وه‌و خاتريشه‌ داواێ روێ وه‌ڕوێ بوينه‌وه‌ێ ئيچنه‌ لێدوانه‌يليگ و هه‌ر هه‌وڵه‌يل تر كرد ك خوازيار بڵاوكردنه‌وه‌ێ خوسه‌و كينه‌ت بدێ له‌ ناونى رووڵه‌يل ملله‌ت عراقى.

 

حزب شيوعى له‌ به‌ياننامه‌يگ ئه‌را(شه‌فه‌ق نيوز)وت: وه‌ ريككفه‌ت وه‌ل سه‌ركه‌فتنه‌يل هيزه‌يل چه‌كدار وه‌گشت دامه‌زرياگه‌يلى له‌بان ريكخرياگ ترۆريستى داعش و ئاهه‌نگه‌يل رووڵه‌يل ئى ملله‌ت وه‌ى ده‌سكه‌فت گه‌وراێ نيشتمانيه‌، بريگ لێدوان خراو دريا ك هه‌ڕه‌شه‌ له‌ پيكهاته‌يگ گرينگ له‌ پيكهاته‌يل كۆمه‌ڵگاێ عراقى له‌تى كريا وه‌ تايبه‌ت له‌ كورده‌يل ده‌يشت هه‌رێم كوردستان و له‌و لێدوانه‌يل ناوه‌رپرسانه‌ داواێ ده‌ركردنيان له‌ عراق و سه‌ندنه‌وه‌ێ ره‌گه‌زنامه‌ له‌ليان كريا له‌ئاكام مه‌سه‌له‌ێ راپرسى ك بڕياره‌ له‌ هه‌رێم ئه‌نجام بگرێد.

 

حزب شيوعى وت: ئيچنه‌ لێدوانه‌يليگ ناڕه‌تحكه‌ر ئه‌دێده‌ هووكار سه‌رهه‌ڵداين خوسه‌و كينه‌ت و دوشمنايه‌تى له‌ ناونى رووڵه‌يل ئى ملله‌ت له‌ وه‌خيگ ك ئيمه‌ هه‌وه‌جه‌ێ فريه‌يگ وه‌ بته‌ه‌وكردن يه‌كێتى نيشتمانى و جيوه‌جيكردن ريڕه‌وه‌يل هاووڵاتيبوين ديريم وه‌ل گشت لايه‌نيگ وه‌بى جياوازێ.

 

جى باسه‌، حزب ناوبرياێ هه‌ميش وت: له‌ى هه‌ڕه‌شه‌يل ناڕه‌وا چشتيگ وه‌دێ ناكه‌يم بيجگه‌ هه‌وڵ خراويگ ئه‌را شيوانن خوه‌شێ رووڵه‌يل ملله‌تمان و له‌ وه‌رانوه‌ر ئى پيكهاته‌ ك قوربانى فريه‌يگ پيشكه‌ش كردگه‌ و به‌شدارى ئاشكرايگ داشتنه‌ له‌ جموجويل نيشتمانى عراقى و خه‌باته‌يل ملله‌تمان، ك وه‌و خاتريشه‌ شه‌رمه‌زار ئى لێدوانه‌يل شوفێنيه‌ ئه‌كه‌يم و ره‌تيه‌و ئه‌كه‌يم و داوايش له‌ گشت رووله‌يل ملله‌تمان ئه‌كه‌يم روێ وه‌ڕوێ هه‌ر هه‌وڵيگ خراو بوونه‌و ك مه‌رام له‌لى كينه‌ت و بوغز بوود و داوايش له‌ ده‌سڵاته‌يل په‌يوه‌نديدار ئه‌كه‌يم دادگايى ئه‌و كه‌سه‌يله‌ بكه‌ن ئى لێدوانه‌يله‌ ئه‌يه‌ن وه‌ چه‌واشه‌ێ ده‌ستوور.