وتـار شـه‌فـه‌ق
ئيمه‌ - فه‌يليه‌يل - دويريم له‌ كار نزيكيم له‌ كيشه‌يل

ئيمه‌ - فه‌يليه‌يل - دويريم له‌ كار نزيكيم له‌ كيشه‌يل


شه‌فه‌ق نيوز/ دو پرسيار كويه‌ن هه‌س هه‌ميشه‌ ئه‌يه‌نه‌ هوير، ك له‌وه‌رچه‌ هه‌رچه‌نى بڕ فريه‌يگيش ئاماده‌گى و تواناێ به‌شه‌رييش وجوود ديرێد له‌ به‌غداو ناوچه‌يل ناوڕاس و باشوور عراق، وه‌لێ وه‌ل ئه‌وه‌يشا هه‌ر دوينێد ئحساس وه‌ يه‌كڕزى كزه‌ له‌ فام و مه‌رام، يه‌يش بيجگه‌ كيشه‌يليگ دريژماوه‌ ك ها وه‌ليا، پرسيار دويه‌ميش ئه‌و وه‌سيله‌يله‌ چه‌ن ئه‌را گوزه‌ركردن له‌ى كاره‌و په‌ڕينه‌وه‌ ئه‌را ده‌يشت سه‌قامگيرى؟  

 

كار ئاساييگه‌ ك ره‌خنه‌و پيشنيار و مه‌زه‌نه‌يليگ ئاكام كاره‌يليگن ك زويتر ئه‌نجام دريانه‌، چشت ئه‌ڵڵاجه‌ويش ئه‌وه‌سه‌ ك چه‌وه‌ڕى ئه‌وه‌ بكريه‌ێد ده‌رفه‌ت بدريه‌ێده‌ حكومه‌ت ئه‌را خاسسازى په‌يوه‌نديه‌يل ناوخوه‌يى له‌ وه‌ختيگ ك نه‌وين يا بڕيان په‌يوه‌نديه‌يل و په‌يوه‌سبوين له‌ به‌رژه‌وه‌ندى كيشه‌گه‌مان نيه‌، ئمجا له‌روێ ئى نوڕستنيشه‌ ك گرينگى ئه‌ياده‌ يه‌ك لايه‌ن و زه‌ره‌د وه‌ نه‌ته‌وه‌گه‌مان ره‌سنێد، فه‌يليه‌يل سه‌رده‌م زه‌ره‌دمه‌ن فيشتر بوينه‌ له‌ى جووره‌ هويره‌وكردنه‌، چوينكه‌ له‌ حاڵه‌ت نه‌وين به‌رهه‌م وه‌جه‌م دياره‌ ك كار ته‌كلاييش گه‌وراتره‌ له‌ قه‌واره‌ى.

 

فريه‌يگ له‌ باوگ و باپيره‌يلمان له‌وانه‌گ نه‌خوه‌نه‌وار بوينه‌، وه‌لێ هويركردنيان هه‌زاران راسى داشتگه‌، چوينكه‌ ميكانيزم په‌يوه‌نديه‌يل دوير بويه‌ له‌ نفوز و ده‌سڵات خاوه‌ن به‌رژه‌وه‌نديه‌يل فه‌ردى و ته‌سليم و خوه‌ى وه‌ده‌سه‌وداينيش ره‌ته‌و كرديان.

 

وه‌ چه‌واشه‌ى ئه‌وه‌يش، دوينيم ك نه‌خوه‌نه‌واره‌يل ئى سه‌رده‌ميشه‌ ئه‌وانه‌ نين ك خوه‌نين و نويسانن نه‌يرن، به‌ڵكوو ئه‌وانه‌ن ك ناتويه‌نن واز له‌ فكره‌و شيوازه‌يل كويه‌نيان بارن و له‌نوو ياێ بگرن، يه‌يش بيجگه‌ وجوود تواناى ئنسانى، ئمجا كورده‌يل فه‌يلى خاوه‌ن دوسيه‌ى غه‌درليكرياێ و له‌ناوبردن وه‌جه‌م ناتويه‌نن مافه‌يليان بارنه‌ ده‌س؟!

 

ئى شه‌پۆله‌ ك ئمڕوو جاهان گرته‌سه‌و، قاپيه‌يلێ له‌ڕوێ گشتلايگ واز كرد تا چالاك بوون و تا په‌يوه‌نديه‌يليان خاستر و فيشتر و نزيكتر بدێ، ته‌سليم بويه‌يليش له‌ پيكهاتگه‌مان وه‌رده‌وام زوورمينه‌ن، وه‌لێ ئاينده‌ موڵك ئه‌وانه‌سه‌ ك خوه‌يان وه‌ده‌س نايه‌ن و كيشه‌يش له‌ عراق ئه‌وه‌سه‌ ك هويچ كه‌سيگ به‌رنامه‌يگ ئه‌را نزيكه‌وكردن نه‌يرێد نه‌ نه‌ته‌وه‌يل و نه‌ مه‌زه‌و و نه‌ تاك و نه‌ قه‌وم وخيش و نه‌يش هاوبه‌شه‌يل له‌ زووانيش ده‌روازه‌يل وازيگ ديرن له‌وه‌رده‌م كه‌سان تر.

 

له‌ عراق ئمڕوو، كورده‌يل فه‌يلى سه‌رمايه‌ ئه‌را نزيكه‌وبوين نه‌يرن تا بتويه‌نن ته‌نانه‌ت وه‌خته‌يليگيش ئه‌را گفتگوو ناوخوه‌يى بارنه‌ ده‌س، چوينكه‌ په‌يوه‌نديه‌يل ريك وپيك خاستر له‌ جاران نيه‌و فيشتريش له‌لى نيه‌.

 

وه‌ل جوود گشت ئه‌و هه‌مگه‌ مه‌يدانه‌يل گشتيه‌، دوينێد چه‌وه‌ڕيكردن ئه‌را بنياتناين باخچه‌يگ تايبه‌ت وه‌ فه‌يليه‌يل له‌ جه‌هانمان بويچگه‌و ئه‌كاو په‌يوه‌ندى و موحيبه‌تيش له‌ناونيمان مه‌يليگه‌ دوير له‌ ده‌سكه‌فتن. وه‌ل ئه‌وه‌يشا له‌وه‌ر خاتر هه‌ر مه‌سه‌له‌يگ بايه‌سه‌ ئاماده‌كارى بدێ و جوور شانازييشه‌‌ ك له‌ده‌سداين و نه‌وين گفتگوو، وه‌ خاڵ هيز دابنريه‌ێد.

 

بايه‌سه‌ له‌ حزبه‌يل سياسى ياێ بگريم ك وه‌فر په‌يوه‌نديه‌يل ناونيان وه‌گشت ئاسانييگ تاويه‌ێده‌و، هويچ كيشه‌يليگيش نه‌يرێد له‌ خاسسازى ناونيان، چوينكه‌ زانێد ك كزى په‌يوه‌نديه‌يل ماناى ته‌مام نه‌وين فام سياسى و كۆمه‌ڵايه‌تى و نه‌ڕه‌سينه‌ ئه‌را قوناغ دوياى ئه‌و قه‌يرانه‌ ك كورده‌يل فه‌يلى له‌لى سوود وه‌رنه‌گرتن و هساويش ئه‌را زه‌ره‌ده‌يليشى نه‌كريا.

 

له‌ى قوناغ ئيسه‌يشه‌، گه‌ورا كردنه‌وه‌ى كيشه‌ى ريكنه‌كه‌فتن وه‌ نسبه‌ت ئه‌را ئيمه‌ ئه‌وه‌ ده‌رخه‌ێد ك ئيمه‌ هويچ چشتيگ جددى نه‌يريم باس له‌لى بكه‌يم وه‌ جدديه‌ت و كه‌سه‌يل تر له‌ليمان وه‌ريبگرن.

 

له‌ى دونياى تازه‌گه‌ريه‌ وه‌بى يادكردن گوزه‌يشته‌ جوور وه‌ره‌قه‌يگ كار ئه‌را گفتگوو له‌وه‌ر ده‌رچگن له‌ بار ناوچه‌يى و ئستغلالكردن بار تازه‌ى ژيان و كار، دوينێد خاستر ئه‌وه‌سه‌ هوير له‌ ده‌سكه‌فتن ده‌رفه‌ت نه‌كه‌يم، به‌ڵكوو بايه‌سه‌ ده‌رفه‌ت ئه‌را خوه‌مان دروس بكه‌يم، ئمجا بار ئيسه‌ ئحساس متمانه‌ وه‌ نه‌فس بته‌وتر ئه‌كا له‌لايگ و له‌لايگ تريشه‌و ده‌رفه‌ت تازه‌ په‌يا ئه‌كا ئه‌را هه‌ڵخه‌له‌تانن و وه‌رده‌وامى له‌ كار هه‌ڵه‌.

عه‌لى حسێن فه‌يلى