هــــه‌واڵ كــوردى
ئه‌مريكا چوين ئه‌تويه‌نێد مقه‌يه‌تى له‌ كورد سوريا بكا؟

ئه‌مريكا چوين ئه‌تويه‌نێد مقه‌يه‌تى له‌ كورد سوريا بكا؟


شه‌فه‌ق نيوز/دۆناڵد ترامپ سه‌رۆك ئه‌مريكا له‌ دانيشتنى وه‌ل وه‌زيره‌يل پاڵپشتى له‌ پلانه‌يل كيشاننه‌وه‌ى هيزه‌يلى كرد له‌ سورياو له‌جواو پرسيار رووژنامه‌نويسيگ له‌باره‌ى كاريگه‌رى كيشانه‌وه‌ى ئه‌و هيزه‌يله‌ له‌بان هيزه‌يل كورد، ترامپ ره‌خنه‌ گرت ئه‌را فرووشتن پترول وه‌ ئيران، وه‌لێ باس كرد و وت: له‌ هه‌مان وه‌خت وڵاته‌يل يه‌كگرتگ مقه‌يه‌تى له‌ كورد ئه‌كا.

 

وڵاته‌يل يه‌كگرتگ چوين مقه‌يه‌تى له‌ كورد ئه‌كا دوياى خوه‌يكيشانه‌وه‌ى؟

 

شاره‌زايه‌يل وه‌ گووره‌ى قسه‌يل ديفيد بولاك له‌ په‌يمانگاى واشنتۆن ئه‌را خوه‌رهه‌ڵات پايين باس له‌ دو چشت بنه‌ڕه‌تى كرد: مه‌ندنه‌وه‌ى هيزه‌يل چه‌كدار كورد له‌ لايگ و ريككه‌فتن وه‌ل توركيا ئه‌را نواگيريكردن يا رازيكردنى وه‌ ئه‌وه‌گ جاريگتر روێ وه‌ڕوێ هيزه‌يل كورد نه‌دێده‌و.

 

بولاك باوه‌ڕێ ئه‌وه‌سه‌ كليله‌گه‌ له‌ ره‌سين وه‌ل توركيا ئه‌ياده‌ ده‌س، ئى مه‌سه‌له‌يشه‌ له‌لايه‌ن جون بۆڵتن راوێژكار ئاسايش نه‌ته‌وه‌ييه‌و دقه‌ت له‌بانى ئه‌كريه‌ێد له‌ سه‌ردانه‌گه‌ى وه‌ى نزيكه‌يله‌ ئه‌را توركيا.

 

ئاشكرايشى كرد: رێگرى له‌ داگيركارى توركى ئه‌را ناوچه‌يل كوردنشين له‌ناو سوريا ئامانجيگه‌، چوينكه‌ توركيا هه‌ڕه‌شه‌ له‌ كورد ناو سوريا ئه‌كاو مكوڕه‌ له‌ داگيركردن مه‌نبج و ته‌نانه‌ت حه‌سه‌كه‌ يا قاميشلى له‌ خوه‌رهه‌ڵات فورات، وه‌لێ له‌ڕاسى ناخوازێد ئه‌و پرووسه‌ جيوه‌جێ بكا، چوينكه‌ فريه‌ سه‌خته‌و نزيكه‌ى 60 هه‌زار چه‌كدار كورد و عه‌ره‌ب له‌ناو سوريا وجوود ديرن و توركيايش ناخوازێد جه‌نگ راسه‌وخۆ به‌رپا بكا.