هــــه‌واڵ عــیراق
"ئه‌لئه‌مين" ئاماژه‌ وه‌ مه‌ترسييگ كرد له‌بان ژيان ئه‌ندامه‌يل

"ئه‌لئه‌مين" ئاماژه‌ وه‌ مه‌ترسييگ كرد له‌بان ژيان ئه‌ندامه‌يل


شه‌فه‌ق نيوز/ هه‌يفا ئه‌لئه‌مين، ئه‌ندام له‌بان هاوپه‌يمانى سائرون، ميكانزمى تايبه‌ت ئمتيازات ئه‌ندامه‌يل ئه‌نجومه‌ن نوێنه‌ره‌يل ئاشكرا كرد و ئاماژه‌ وه‌ بڕگه‌يليگ كرد ك مه‌ترسى ديرێد له‌بان ژيانيان.

 

ئه‌لئه‌مين له‌ به‌ياننامه‌يگ وت: ئه‌ندامه‌يل له‌ خول ته‌شريعى سێيه‌مه‌و تائيسه‌ هويچ بڕه‌ پويليگ وه‌رنه‌گرتنه‌ له‌ڕوێ خاسه‌وكردن گوزران و هويچ سه‌ياره‌يگيش وه‌ په‌تى وه‌رنه‌گرتنه‌و يه‌يش ناچار بڕيگ له‌ ئه‌ندامه‌يل كردگه‌ سه‌ياره‌ى گران بسينن وه‌تايبه‌ت ئه‌ندامه‌يل پاريزگايه‌يل.

 

ئه‌لئه‌مين وت: هه‌ر ئه‌نداميگ ئه‌گه‌ر سه‌رچه‌وه‌يگ بازرگانى خاس نه‌ياشتوود يا شێخ و مير نه‌دێ، جى داخه‌ بايه‌سه‌ سلفه‌ بكا ئه‌را ئه‌وه‌گ ئه‌و ته‌كليفه‌ پڕه‌و بكا ئه‌را نموونه‌ وه‌ بڕ 100مليۆن دينار بايه‌سه‌ 40 مليۆن بيه‌ێد و هويچ ئه‌نداميگيش چه‌ك شه‌خسى وه‌خوه‌ى و پاسه‌وانه‌يليشى نادريه‌ێد و بايه‌سه‌ وه‌ پويل بسيننه‌ى.

 

ئه‌لئه‌مين هه‌ميش وت: ئه‌ندامه‌يل تازه‌ سه‌ريان سوڕمه‌ند ك له‌ناكاو حكومه‌تگشت ئمتيازاتيگ وسانگه‌ وه‌تايبه‌ت دياريكردن شوون ئه‌رايان و يه‌يش ناچاريان كردگه‌ مينه‌ى شوون ئه‌را خوه‌يان بكه‌ن و دوياخريش ئه‌يه‌ ژيانيان تويش مه‌ترسى ئه‌كا، چوينكه‌ ناچاره‌ مينه‌ى شوونيگ ئه‌رزان بكا له‌ شوونه‌يليگ ك ئارامى له‌تيان كه‌مه‌و ناچاريشه‌ پاسه‌وان ئه‌را خوه‌ى نه‌نه‌ێد له‌وه‌ر ئه‌وه‌گ تواناى ده‌سه‌وه‌ركردن مه‌عاشيان نه‌يرێد.