شه‌فه‌ق نيوز/ وه‌زاره‌ت ته‌ندروستى و ژينگه‌ وشدارێ دا كۆمپانياى "پترۆجاينا"ى كاركه‌ر له‌ سه‌رچه‌وه‌ێ نه‌فتى پاريزگاى ميسان، ئه‌ويش له‌وه‌ر ئه‌وه‌گ پابه‌ند نيه‌ وه‌ راپۆرت كاريگه‌رێ ژينگه‌يى ك له‌لايه‌ن وه‌زاره‌ته‌گه‌وه‌ دانرياگه‌ وه‌خاتر مقه‌يه‌تيكردن له‌ هاووڵاتى عراقى و ژينگه‌گه‌ێ له‌ مه‌ترسى پيسبوين.

له‌ى باوه‌ته‌و، سه‌مير عه‌بود وه‌ڕيه‌وبه‌ر ژينگه‌ێ ميسان له‌ به‌ياننامه‌يگ وت: وه‌ڕيه‌وبه‌رايه‌تيه‌گه‌ ئاگادار كۆمپانياى پترۆجايناى چينى كردگه‌ ئه‌را ئه‌وه‌گ پاشمه‌نده‌ى ژينگه‌يى خوى لاوه‌ێد تا كاريگه‌رى خراو نه‌كاده‌ بان ژينگه‌و ته‌ندروستى گشتى.

عه‌بود هه‌ميش وت: تيمه‌يل ته‌كنيكى سه‌ر وه‌ وه‌ڕيه‌وبه‌رايه‌تيه‌گه‌ سه‌ردانيگ مه‌يدانى ئه‌را شوون كۆمپانياگه‌ له‌ سه‌رچه‌وه‌ى نه‌فتى حه‌لفايه‌ ئه‌نجام دانه‌ ئه‌را ئاگاداربوين له‌ هه‌ڵكه‌فت ژينگه‌يى و ئه‌رايان ده‌ركه‌فتگه‌ ك كۆمپانياگه‌ مادده‌يل كيمياوى ته‌خه‌زين كردگه‌ له‌ كه‌شيگ نه‌گونجياێ وه‌ل حاڵه‌ت ژينگه‌يى وله‌ناو حاويه‌يليگ ئاسنين ك يه‌يش ئه‌دێده‌ هووكار بڵاوبوينه‌وه‌ى له‌بان ئه‌و خاكه‌يله‌ ك نزيكه‌ له‌ليه‌وه‌و دوياخريش كاريگه‌رى خراو له‌لى ئه‌كه‌فێده‌و، ك وه‌و خارتريشه‌ وشدارى وه‌پى درياگه‌ وه‌گووره‌ى به‌نده‌يل مادده‌ى(33)له‌ ياساى مقه‌يتيكردن و خاسكردن ژينگه‌ ژماره‌(27)ئه‌را ساڵ 2009.