هــــه‌واڵ عــیراق
ئئتلاف مالكى پيشنياره‌گه‌ێ سه‌در له‌باره‌ێ حه‌شد ره‌ته‌و ئه‌كا

ئئتلاف مالكى پيشنياره‌گه‌ێ سه‌در له‌باره‌ێ حه‌شد ره‌ته‌و ئه‌كا


شه‌فه‌ق نيوز/ فه‌رده‌وس ئه‌لعه‌وادى ئه‌ندام ئه‌نجومه‌ن نوێنه‌ره‌يل له‌بان ئئتلاف ده‌وڵه‌ت ياسا، ئاشكراێ ئه‌وه‌ كرد ك ئئتلافه‌گه‌ێ مه‌سه‌له‌ێ تاوتوێكردن ئاينده‌ێ حه‌شد شه‌عبى چ ئيسه‌و چ دوياخر ره‌ته‌و ئه‌كا.

 

ئه‌لعه‌وادى له‌ به‌ياننامه‌يگ وت: ئاينده‌ێ حه‌شد شه‌عبى له‌لايه‌ن ملله‌ت عراقيه‌و بڕيار درياگه‌ وه‌ ئه‌وه‌گ بمينێد ئه‌را پشتگيرى هيزه‌يل چه‌كدار، ك يه‌يش وه‌ ياسايگ بريار درياگه‌ له‌ باڵاترين ده‌سڵاتيگ ته‌شريعى له‌ عراق ك ئه‌ويش ئه‌نجومه‌ن نوێنه‌ره‌يل عراقيه‌.

 

ئه‌لعه‌وادى وت: ئه‌ڵڵاجه‌ويه‌ له‌ى ماوه‌ێ ئيسه‌ مه‌ردمانيگ فشار ئه‌خه‌نه‌ بان سه‌رۆك وه‌زيره‌يل ئه‌را پرووژه‌يليگ تايبه‌ت وه‌ حه‌شد شه‌عبى له‌ وه‌ختيگ ك هيمان عراق هه‌وه‌جه‌ وه‌ حه‌شد شه‌عبى ديريد، چوينكه‌ جه‌نگ وه‌ل ترۆر هيمان ته‌مام نه‌ويه‌و هه‌ڕه‌شه‌يش له‌بان عراق هيمان وه‌رده‌وامه‌.

 

جى باسه‌، دويه‌كه‌ موقته‌دا سه‌در سه‌ركرده‌ێ ره‌وت سه‌درێ داوا له‌ حه‌يده‌ر عبادى سه‌رۆك ئه‌نجومه‌ن وه‌زيره‌يل كرد خاسسازێ له‌ كار حكومه‌ته‌گه‌ێ ته‌مام بكاو داوا تيكه‌ڵكردن حه‌شد شه‌عبييش كرد له‌ناو ڕزه‌يل ده‌زگاێ ئاسايشى.