هــــه‌واڵ كــوردى
مه‌رجه‌عيگ شيعه‌ وشدارى دا له‌ "داوڕيان" وه‌ل كوردستان

مه‌رجه‌عيگ شيعه‌ وشدارى دا له‌ "داوڕيان" وه‌ل كوردستان


شه‌فه‌ق نيوز/ به‌شير نه‌جه‌فى مه‌رجه‌ع شيعه‌، وشدارى دا له‌باره‌ى هه‌ر داوڕيانيگ وه‌ل كورد و ئاشكراى وازكردن قاپيه‌گه‌يشى دا ئه‌را گشت هاووڵاتيه‌يل كوردستان.

 

له‌ى باوه‌ته‌و، سه‌عدى ئه‌حمه‌د پيره‌ قسه‌كه‌ر وه‌ناو يه‌كێتى نيشتمانى كوردستان، له‌ لێدوانيگ ئه‌را هووكاره‌يل ره‌سانن كورد وت: شانديگ له‌ هه‌رێم كوردستان كووتايى وه‌ سه‌ردانه‌گه‌ێ ئه‌را نه‌جه‌ف هاوردگه‌و چه‌وێ كه‌فته‌سه‌ شماره‌يگ له‌ مه‌رجه‌عه‌يل ئايينى و مامۆستايه‌يل له‌ حه‌وزه‌ى زانستى و زانكۆى كووفه‌.

 

ئه‌حمه‌د پيره‌ هه‌ميش وت: شاند هه‌رێم له‌و سه‌ردانه‌ چه‌وێ كه‌فته‌سه‌ چه‌ن مه‌رجه‌عيگ، له‌ناونيشانيش به‌شير نه‌جه‌فى و شماره‌يگ له‌ مامۆستايه‌يل زانكۆى كووفه‌و سه‌رۆك ديوان وه‌قف شيعى و بيجگه‌ نوێنه‌ره‌يليگ جياجياى حزبه‌يل سياسى له‌ نه‌جه‌ف و له‌وانه‌يش حزب ده‌عوه‌و ره‌وت ئه‌لحكمه‌و ره‌وت سه‌درى و ئه‌نجومه‌ن باڵاى ئسلامى و باس له‌وه‌يش كرد ئه‌و ديداره‌يله‌ ئيجابى بوينه‌و چه‌ن دوسيه‌يگ په‌يوه‌س وه‌ حكومه‌ت و ئداره‌ى ده‌وڵه‌ت له‌تيان تاوتوێ كريانه‌.

 

جى باسه‌، ئه‌حمه‌د پيره‌ هه‌ميش وت: ئى سه‌ردانه‌ له‌وه‌ر بته‌وكردن په‌يوه‌نديه‌يل مێژوويى ناونى كورد و شيعه‌ ئه‌نجام گرتگه‌و يه‌يش ده‌رخست ك به‌شير نه‌جه‌فى مه‌رجه‌ع ئايينى جه‌خت له‌بان خواست دانه‌وڕيام ناونى كورد و شيعه‌ كردگه‌و جه‌ختيش له‌وه‌ كردگه‌ قاپيه‌گه‌ى هه‌ميشه‌ وازه‌ له‌وه‌رده‌م حزبه‌يل كوردستانى و وه‌رده‌واميش مه‌يل ئه‌وه‌ ديرێد ئاگادار بدێ له‌ بارودوخ ملله‌ت هه‌رێم كوردستان.