وتـــــار
كيشه‌ى جايه‌ڵه‌يل.. بى ئامانج بژيه‌

كيشه‌ى جايه‌ڵه‌يل.. بى ئامانج بژيه‌


شه‌فه‌ق نيوز/ قسه‌ له‌بان باوه‌ت جايه‌ڵه‌يل چه‌ن گووشه‌يگ جياجياو چه‌ن لايه‌نيگ ئه‌گرێده‌و له‌روێ دامه‌زرانن كۆمه‌ڵايه‌تى و هووكاره‌يل ده‌ره‌كى كاريگه‌ر و سياسه‌ت حكومه‌ته‌يل و روڵ نوخبه‌يل وه‌ل ئه‌وه‌گ چوين بوونه‌ به‌شدار و لايه‌نگر كيشه‌ى جايه‌ڵه‌يل؟

 

بڕيگ هووكار هه‌ن كاريگه‌رى ديرن له‌ نه‌خشه‌ێ ئاينده‌ى جايه‌ڵه‌يل و له‌وانه‌يش له‌ جه‌هان خوه‌رهه‌ڵات و ناڵانن ئه‌و ده‌وڵه‌ته‌يله‌ له‌ده‌س نه‌فامى له‌ ئاسته‌يل جياجيا و كه‌مى شاره‌زايى و نه‌وين جدديه‌ت له‌ پشتگيرى و نيشانداين روڵ جايه‌ڵ.

 

له‌يرا ئيمه‌ ناتويه‌نيم بويشيم ك سياسه‌ت رۆڵ نه‌يرێد و زانيم ك كاريگه‌رى و كاريگه‌رييش ديرێد له‌ ده‌ورگرد ناوخوه‌يى(شيرازه‌ى كۆمه‌ڵايه‌تى)، وه‌چه‌و گرينگييشه‌و دوينيمنه‌ ئه‌وه‌گ چين جايه‌ڵه‌يل زوورمينه‌ن و جوور سامانيگن و نه‌بايه‌د فه‌رامووش بكريه‌ن له‌ كاركردن و عه‌قڵه‌يل به‌رهه‌مدار.

 

سايكۆلۆجيه‌ت جايه‌ڵه‌يل وه‌تايبه‌ت ئه‌و ده‌وڵه‌ته‌يله‌ ك هانه‌ سه‌ره‌تاى ليست نه‌فامى و جه‌نگه‌يل وه‌رده‌وام ك ئه‌گه‌ر ژيانيان له‌ مه‌يدانه‌يل كوشتار فه‌نا نه‌دێ، ئه‌وه‌ ژيانيان بى ئه‌زره‌ت و بى ئامانج ئه‌دێ وه‌ بوونه‌ێ نه‌وين تواناى ئه‌وانه‌ له‌ په‌ره‌داين وه‌ خوه‌يان.

 

ئالشتبوين ديد نزيك ره‌شبينى له‌لاى جايه‌ڵه‌يل مه‌سه‌له‌ێگ حه‌تميه‌، ئه‌ويش ك ئنساف نيه‌ گشت مه‌ينه‌تى و دريغييگ بكريه‌ێده‌ مل حكومه‌ت، به‌ڵكوو په‌يوه‌ندى له‌ناونى حاكم و مه‌حكوم جوور په‌يوه‌ندى ناونى باوگ وه‌ل كوڕه‌يليا ك مافه‌ ديرن و ئه‌ركيش ها بانيان، ئه‌ويش له‌ كۆمه‌ڵگايه‌يل كه‌م تواناو گرينگ ئه‌وه‌سه‌ په‌نجه‌ى تومه‌ت ته‌نيا ئه‌را حكومه‌ت دريژ بكريه‌ێد ك يه‌يش مه‌نتقى نيه‌ ئه‌گه‌ر مه‌سه‌له‌گه‌ وه‌ مه‌نهه‌جيه‌ت وه‌ربگريم جوور خوه‌نينه‌وه‌و شيه‌وكردن.

 

ئمجا ئيمه‌ يا بايه‌سه‌ كارا بويمن له‌ كۆمه‌ڵگا يا ئه‌وه‌سه‌ له‌ چه‌وه‌ڕى خوه‌رئاوا بويمن و وه‌رگه‌ى گشت زله‌ت و ئستغلاليگ بگريم وه‌ناو و كه‌س و شيواه‌يل و ناسناوه‌يل جياجياى ئنسانى هاوكاريانه‌و رووشنهويريانه‌.

 

كومه‌ڵگايه‌يل فريه‌يگ ويران بوين له‌شوون جه‌نگ جه‌هانى دويه‌م، له‌وانه‌يش يابان و ئه‌ڵمانياو دار سحرى نه‌ياشتن تا هه‌ڵكه‌فتيان ئالشت بكه‌ن جوور ئه‌وه‌گ ئيسه‌ هه‌ن، ده‌وڵه‌ته‌يل تريش جوور باشوور خوه‌رهه‌ڵات ئاسيا ئه‌و تواناو سامانه‌يل باتنيه‌ نه‌يرن و قه‌ناعه‌ت ته‌واويگ داشتن و چه‌و له‌ خوه‌رئاوا كردن و جى داخيشه‌ ده‌وڵه‌ته‌يليگيش شكه‌ستخواردگ چه‌وه‌ڕى ده‌سميه‌تن له‌ليان تا زياتر له‌ده‌ور خوه‌يان سويڕ بخوه‌ن.

 

مه‌سه‌له‌ى جه‌وهه‌رى ئه‌وه‌سه‌ ئله‌ت وجوودمان له‌ هوير بووه‌يم ك چوين و ئه‌راچه‌؟ فه‌رامووشكردن ئى مه‌سه‌له‌يشه‌ جوور هووكاريگه‌ له‌ هووكاره‌يل شكه‌ست، ئجا خوه‌رئاوايش هه‌رچه‌نى سه‌ركه‌فتگيشه‌ له‌ چسته‌يل زانستى و ئازادى، وه‌لێ وه‌ل ئه‌وه‌يشا وجوود خوداى په‌روه‌ردگار و گله‌وخواردن ئه‌را ئايين دروس له‌ هوير بردنه‌.

 

ئيمه‌يش ئه‌گه‌ر بتويه‌نيم واز له‌ بريگ چشت بى فايده‌ باريم جوور لايه‌نگرى حزبى ك ره‌سيگه‌ راده‌يگ بڕيگ ئاقڵه‌يل يا جوور ئه‌وه‌گ وه‌پيان ئويشيه‌ێد ئه‌كاديمى، ده‌س گيرياسه‌ بان فكر و جموجويليان ك له‌وه‌ختيگ بايه‌سه‌ وه‌ چه‌واشه‌ بدێ و ئه‌وانه‌ خاوه‌ن ئه‌قڵ وازيگن و سه‌ركرده‌ى نه‌وه‌يلن، ئمجا وه‌و خاريشه‌ با واز له‌گشت ئه‌و نه‌فاميه‌ باريم و ئه‌قڵ بايمنه‌ كار مادام دڵه‌يليگ هه‌ن كوتن وه‌ل دره‌وينه‌يليگ شه‌وقدار و فكره‌يليگ هه‌وڵ قورتاربوين ئه‌يه‌ن له‌ هه‌مه‌جيه‌ت و بوغز و با مه‌حاڵ دروس بكه‌يم، چوينكه‌ ژيان بى مغامره‌ شايسته‌ى ژيان نيه‌.

عه‌بدولڕه‌حمان عه‌بدولسه‌لام