ڕاپــۆرت تایبـه‌ت
راپۆرتيگ بريتانى بار عراق و ده‌وڵه‌ت كورد خسته‌ پيشبينيه‌يل 2018

راپۆرتيگ بريتانى بار عراق و ده‌وڵه‌ت كورد خسته‌ پيشبينيه‌يل 2018


شه‌فه‌ق نيوز/ رووژنامه‌ى " گارديان " باوه‌تيگ كه‌ريم شاهين په‌يامنێرى له‌ ئه‌سته‌مبوڵ بڵاو كرد، ك له‌تى باس له‌ كاريگه‌رى ركابه‌رێ سعودى - ئيرانى كرد له‌بان خوه‌رهه‌ڵات ناوين له‌ ساڵ 2018.

شاهين ئويشێد: ساڵيگ سه‌خت له‌ خوه‌رهه‌ڵات ته‌مام بوێ، وه‌لێ ساڵ 2018 ئسراحه‌ت نه‌يرێد له‌ ئاژاوه‌ێ هه‌رێمى، ك سه‌رچه‌وه‌ له‌ ئاگر ركابه‌رێ ئه‌گرێد له‌ ناونى سعوديه‌ و ئيران.

 

نويسه‌ر له‌ باوه‌ته‌گه‌ێ ئويشێد: محه‌مه‌د بن سه‌لمان مير جايه‌ڵ جوان سعودى له‌ هێزێ بته‌و كرد و ده‌سكرده‌ جموجويليگ له‌ خاسسازى رووشنهويرى و ئابوورى ك زويتر له‌يوا نه‌كرياگه‌ له‌ رياز، وه‌لێ ئاره‌زووه‌يل ده‌ره‌كى هيمان به‌ر نه‌گرتگه‌ و له‌ جياێ ئه‌وه‌يش گرژى وه‌ل يه‌مه‌ن هاوساێ وه‌رده‌وام ئه‌دێ ك فه‌قيرترين ده‌وڵه‌ته‌يل عه‌ره‌بيه‌ تا ره‌سيه‌ێده‌ ريككه‌فتنيگ سياسى.

 

شاهين يه‌يش باسكرد ك بن سه‌لمان چشته‌يل فريه‌يگ نه‌يرێد بوشيده‌ێ له‌ سوريا ك له‌تى رژيم به‌شار ئه‌سه‌د له‌ روسياو ئيرانه‌و پشتگيرێ ئه‌كريه‌ێد وه‌ل چويچيان حزبه‌يل ئۆپۆزسيۆن.

 

شاهين ئاماژه‌ وه‌ ئه‌وه‌يش ئه‌كا هه‌ر يه‌ك له‌ روسيا و ئيران و توركيا زاڵن له‌بان ريڕه‌و روێداگه‌يل و بڕيار كووتايى ئه‌يه‌ن ئه‌را چاره‌سه‌ر، ك هه‌رچه‌نى چشتيگيش نيه‌ ده‌سه‌وه‌ر كووتايى تون وتيژى يا ياخيبوين دژ رژيم ئه‌سه‌د بكا، يه‌يش له‌ وه‌ختيگ ك گشت جه‌هان فكريان كه‌فته‌سه‌ لاى قوناغ دوياێ داعش و دياره‌ ركابه‌ريه‌گه‌يش فيشتره‌و ئه‌دێ ئه‌را ده‌سكه‌فتن به‌شيگ له‌ پرووژه‌يل ئاوه‌دانكردنه‌وه‌، ك له‌ى قوناغيشه‌ بريار چاره‌نويس ده‌وڵه‌ت كوردييش ئه‌دريه‌ێد.

 

نويسه‌ر يه‌يش نويساگه‌، له‌ وه‌ختيگ ك جه‌نگاوه‌ره‌يل ئسپات قانجازيان ئه‌را هاوپه‌يمان ناوده‌وڵه‌تى كردن وه‌ سه‌رۆكايه‌تى وڵاته‌يل يه‌كگرتگ دژ ريكخرياگ داعش، وه‌لێ كووتايى هه‌ڵمه‌ته‌گه‌ ماناى وسانن پشتگيرى سه‌ربازيه‌ له‌ليان و وت: كورد خوازيار دامه‌زرانن ناوچه‌يگ خوه‌يموختاريين، وه‌لێ نه‌ياره‌يليان باوه‌ڕيان ئه‌وه‌سه‌ جموجويليان وه‌ره‌و لاى خوه‌رئاوا له‌ باكوور ريخوه‌شكه‌ره‌ له‌بان هه‌وڵه‌يليگ ئه‌را دامه‌زرانن ده‌وڵه‌ت.

 

شاهين قه‌ناعه‌تى ئه‌وه‌سه‌، ئى ئاره‌زووه‌يله‌ هه‌رچه‌نيگ بدێ، وه‌ل ئه‌وه‌يشا روێ وه‌ڕوێ ناڕه‌زايه‌تى وه‌هيزيگ توركيا ئه‌دێ، ك جه‌نگاوه‌ره‌يل كورد له‌ سوريايش هه‌ڕه‌شه‌يگن ئه‌را بان ئاسايشه‌ نه‌ته‌وه‌ييه‌گه‌ێ و ئه‌گه‌ره‌يل ئه‌وه‌يش هه‌س روسيا و وڵاته‌يل يه‌كگرتگيش پشتگيرى هه‌ڵويست توركى بكه‌ن.

 

نويسه‌ر يه‌يش ده‌رخستگه‌ ك دقه‌ت له‌ عراق ئه‌كريه‌ێد له‌بان بار وڵاته‌گه‌، ئه‌ويش دوياێ ساڵه‌يليگ له‌ روێ وه‌ڕوێ بوينه‌وه‌ وه‌ل ريكخرياگ ترۆريستى داعش و وتگه‌: به‌غدايش روێ وه‌ڕوێ ئه‌ركه‌يل قورسيگ بووده‌وه‌ ئه‌را جه‌مه‌وكردن ملله‌تيگ زه‌خمدار و كورديش هه‌وڵ په‌ڕينه‌وه‌ ئه‌ياد له‌ هه‌وڵه‌يليان ئه‌را وه‌رگرتن سه‌روه‌خوه‌يى و زوورم سنيه‌يليش له‌وانه‌گ له‌ساێ ريكخرياگ داعش ژيان مه‌يل گله‌وخواردن ديرن ئه‌را شار و ئاوايه‌يليان ك له‌ئاكام جه‌نگ و كوشتار ويران كريانه‌.

 

شاهين زياتر وتگه‌: بايه‌سه‌ له‌بان حكومه‌ت ناوه‌ندى كار له‌بان يه‌كسانكردن داواكاريه‌يل بكا و زاڵ بدێ له‌بان ئه‌و ميليشيايه‌يله‌ ك له‌لايه‌ن ئيرانه‌و پشتگيرى له‌ليان ئه‌كريه‌ێد و رۆڵ گرينگ داشتن له‌ جه‌نگ دژ ريكخرياگ ترۆريستى داعش و تومه‌تبارن وه‌ ئه‌نجامداين تاوانه‌يل.

 

دوياخريش نويسه‌ر وتگه‌: هه‌رچه‌نى ريكخرياگ داعش راو نريا، وه‌لێ ترۆر هيمان مه‌ترسى گه‌ورايگه‌ له‌ ناوچه‌گه‌و هه‌رچه‌نى ريكخرياگ ترۆريستى ناوچه‌يل فراوانيگ له‌ سوريا و عراق له‌ده‌سدا، وه‌لێ چه‌كداره‌يل ئه‌و ريكخرياگه‌ گله‌وخواردنه‌ ئه‌را بياوانه‌يل و خوه‌يان شاردنه‌سه‌و و خوه‌يان ئاماده‌ ئه‌كه‌ن ئه‌را گامه‌يل ئاينده‌.