حه‌شد شه‌عبى له ده‌نگداين تايبه‌ت وه‌ل ده‌زگاى ئه‌منى قه‌يه‌غه كريا
هــــه‌واڵ عــیراق
حه‌شد شه‌عبى له ده‌نگداين تايبه‌ت وه‌ل ده‌زگاى ئه‌منى قه‌يه‌غه كريا
شه‌فه‌ق نيوز/ كۆمسيۆن باڵاى سه‌روه‌خوه‌ى هه‌ڵوژاردنه‌يل، كارمه‌نده‌يل حه‌شد شه‌عبى له به‌شداريكردن له ده‌نگداين تايبه‌ت وه‌ل ده‌زگايه‌يل ئه‌منى قه‌يه‌غه كرد ك برياره دوو رووژ وه‌رجه واده‌ى هه‌ڵوژاردنه‌يل گشتى له 12ى ئايار ئه‌نجام بگرێد.
كۆمسيۆن وت: ئه‌ندامه‌يل حه‌شد له چوارچيوه‌ى ده‌نگداين گشتى له شوونه‌يل وجووديان ده‌گ ئه‌يه‌ن ك له 12ى ئى مانگه ئه‌نجام ئه‌گرێد و يه‌يش ده‌رخست ك ئه‌وانه‌گ ته‌كليف وه ئه‌ركه‌يليان كريانه له شوونه‌يل مه‌رزێ هه‌ق ئه‌وه ديرن له چوارچيوه‌ى ده‌نگ تايبه‌ت به‌شدار بوون.
جى باسه، مه‌عه‌ن هيتاوى سه‌رۆك كۆمسيۆن باڵاى سه‌روه‌خوه‌يى هه‌ڵوژاردنه‌يل له عراق له لێدوانيگ ك شه‌فه‌ق نيوز ئاگادارى بوى، وت: مه‌سه‌له‌ى ده‌نگداين تايبه‌ت وه ده‌زگايه‌يل ئه‌منى و هيزه‌يل سه‌ربازى به‌شدارى نزيكه‌ى يه‌ك مليۆن و نيم ده‌نگده‌ر ئه‌گرێده خوه‌ى له رووژ په‌نجشه‌ممه‌ى ئاينده وه‌ل ده‌نگداين تايبه‌ت وه زيندانيه‌يليگ ك ماوه‌ى حوكمه‌گه‌يان له په‌نج ساڵ كه‌متره.
