هــــه‌واڵ كــوردى
كوردستان جواو سزايه‌يل به‌غدا ده‌رهه‌قى داره‌و

كوردستان جواو سزايه‌يل به‌غدا ده‌رهه‌قى داره‌و


شه‌فه‌ق نيوز/ سه‌فين دزه‌يى قسه‌كه‌ر وه‌ناو حكومه‌ت هه‌رێم كوردستان، وت: ئه‌و سزايه‌يله‌ ك به‌غدا گرته‌سه‌ى وه‌ر ده‌رهه‌ق هه‌رێم كوردستان له‌ ئاكام راپرسێ سه‌روه‌خوه‌يى، سياسيين و ناگونجيه‌يد وه‌ل ده‌ستوور.

 

دزه‌يى وت: حكومه‌ت عراقى له‌ساڵ 2015 تائيسه‌ سزا له‌بان پێشمه‌رگه‌ى كوردستان چه‌سپانگه‌ وه‌ كلنه‌كردن بودجه‌ى تايبه‌ت وه‌ پێشمه‌رگه‌و له‌ساڵ 2014يش ملله‌ت هه‌رێم كوردستان سزا داگه‌ وه‌ كلنه‌كردن به‌ش هه‌رێم له‌ بودجه‌و دوياى ئه‌وه‌يش كه‌مه‌وكردن پۆسته‌يل كوردستان و كه‌مه‌وكردن ريژه‌ى ئه‌فسه‌ره‌يل و روتبه‌يل كورد له‌ سوپاى عراقى ك زويتر 25% و ئيسه‌ ره‌سيه‌سه‌ 2% تا 3%.

 

دزه‌يى وت: سزايه‌يل دژ هه‌رێم كوردستان كار تازه‌يگ نيه‌و به‌غدا وه‌رده‌وامه‌ له‌ چه‌سپانن سزا له‌بان هه‌رێم و به‌غدا ئه‌گه‌ر قسه‌ له‌بان ده‌ستوور عراقى ئه‌كا، ئى مافه‌يله‌ ده‌ستوور عراقى رى وه‌پيان ده‌يد، هه‌ر له‌وه‌ر ئه‌وه‌يش برياره‌يل حكومه‌ت عراقى سياسيه‌ نه‌ك ده‌ستوورى، چوينكه‌ به‌غدا ياساو ده‌ستوور شكانگه‌و بايه‌سه‌ كه‌شيگ گونجياگ بايده‌ ئارا ئه‌را گفتگوو ناونى هه‌رێم و به‌غداو بيجگه‌ ئه‌يه‌ هويچ چاره‌سه‌ريگ تر نيه‌، له‌وه‌ر ئه‌وه‌گ كيشه‌ى كورد وه‌ جه‌نگ چاره‌سه‌ر نه‌وى له‌ ساڵه‌يل شه‌س و هه‌يشتايه‌يل سه‌ده‌ى وه‌رين.