شه‌فه‌ق نيوز/ خوه‌ينيشانده‌ره‌يل ناوڕاس و باشوور عراق داواكاريه‌يليان زياى كردن و داواى لاوردن ئه‌ندامه‌يل ئه‌نجومه‌ن پاريزگايه‌يل ئه‌كه‌ن وه‌ل پيشكه‌شكردن وه‌رپرسه‌يل گه‌ناته‌كار ئه‌را دادگا، يه‌يش دوياى ئه‌وه‌گ داواكارييان ته‌نيا له‌بان دابينكردن كاره‌باو ده‌رفه‌ت كار و خزمه‌تگوزاريه‌يل بوێ، ك وه‌ل ئه‌وه‌يشا ليژنه‌يل خوه‌ينيشانداين هه‌وڵ دامه‌زرانن سه‌ركردايه‌تييگ يه‌كگرتگ ئه‌يه‌ن ئه‌را ئه‌وه‌گ خوه‌ينيشانداينه‌يل فراوانتره‌و بكريه‌ێد ك چيه‌سه‌ هه‌فته‌ى چواره‌مى.

له‌ى باوه‌ته‌و، ليژنه‌يل ريكخه‌ر خوه‌ينيشانداينه‌يل له‌ پاريزگايه‌يل ناوڕاس و باشوور عراق له‌ به‌ياننامه‌يگ ك شه‌فه‌ق نيوز ئاگادارى بوى، وتن: ئاماده‌كارى ئه‌كركيه‌ێد ئه‌را ئه‌نجامداين خوه‌ينيشانداين فراوانتر ك له‌گشت پاريزگايه‌يل ده‌س وه‌پى بكا ئه‌را داواكارى لاوردن پاريزگاره‌يل و لاوردن ئه‌نجومه‌نه‌يل پاريزگاو دابيننكردن خزمه‌تگوزارى.

جى باسه‌، به‌ياننامه‌گه‌ هه‌ميش وت: ئى خوه‌ينيشانداينه‌يله‌ وه‌رده‌وامى ئه‌دێ تا وه‌ختيگ داواكارى خوه‌ينيشانده‌ره‌يل جيوه‌جى ئه‌كريه‌ێد و گه‌ناته‌كاره‌يل پيشكه‌ش وه‌ دادگا ئه‌كريه‌ن.