هــــه‌واڵ كــوردى
يڵدريم: هه‌ڵويست توركيا وه‌رانوه‌ر راپرسێ هه‌رێم كوردستان ئاڵشت نادێ

يڵدريم: هه‌ڵويست توركيا وه‌رانوه‌ر راپرسێ هه‌رێم كوردستان ئاڵشت نادێ


شه‌فه‌ق نيوز/ عه‌لى بن يڵدريم سه‌رۆك وه‌زيره‌يل توركى، له‌نوو باس له‌ هه‌ڵويست ره‌ته‌وكه‌ر وڵاته‌گه‌ێ كرد وه‌رانوه‌ر راپرسێ هه‌رێم كوردستان ك حكومه‌ت هه‌رێم خوازياره‌ له‌ كووتايى ئى مانگه‌ ئه‌نجامێ بيه‌ێد له‌باره‌ێ سه‌روه‌خوه‌يى له‌ عراق.

 

يڵدريم له‌ لێدوانيگ ئه‌را رووژنامه‌نويسه‌يل، مه‌رام هه‌رێم كوردستان له‌ عراق له‌باره‌ێ ئه‌نجامداين راپرسێ وه‌ هه‌ڵه‌ێ گه‌ورايگ تاريف كرد و وت: توركيا هه‌ر له‌ سه‌ره‌تاوه‌ ئاشكراێ هه‌ڵويست ره‌ته‌وكه‌ر خوه‌ێ له‌ وه‌رانوه‌ر ئه‌و راپرسيه‌ كردگه‌ و ئى هه‌ڵويستيشه‌ ئاڵشت نادێ.

 

جى باسه‌، يڵدريم داوايش له‌ حكومه‌ت هه‌رێم كوردستان كرد راسه‌وكردن له‌ بڕيار سه‌روه‌خوه‌يى بكاو وت: ناوچه‌گه‌ ناڵنێد وه‌ده‌س قه‌يرانه‌يل فريه‌يگ و ئه‌نجامداين راپرسييش كيشه‌ێ تازه‌يگ دروس ئه‌كاو قانجاز وه‌ ناوچه‌گه‌ ناڕه‌سنێد.