وتـــــار
مه‌حاڵ!.. عراق بى كورد.. و كوردستانيش بى عه‌ره‌ب

مه‌حاڵ!.. عراق بى كورد.. و كوردستانيش بى عه‌ره‌ب


شه‌فه‌ق نيوز/ گشت چشتيگ په‌شيوێ وه‌خوه‌يه‌و ديه‌! به‌غدايش له‌شوون راپرسێ كوردستان له‌ساێ بارودوخ پڕ گيچه‌ڵيگ ژيه‌ێد و حكومه‌تيش ئه‌قڵێ له‌ده‌سداگه‌، ئمجا دوشمنه‌يل كورد و ناحه‌زه‌يل خواست كورد خوازيارن ئاگر ناكووكى ده‌م بيه‌ن و گڕێ زياتر بكه‌ن، ئه‌ێ چاره‌سه‌ر چه‌س؟

 

كورد له‌ڕێ راپرسيه‌و داواكاريه‌يل خوه‌يان ره‌ساننه‌ گشت جه‌هان وه‌بى هويچ حاڵه‌تيگ ياساشكنى و بى ئنكاركردن مافه‌يل هه‌ر لايه‌نيگ يا خستن ئاسايش و سه‌قامگيرى هاووڵاتيه‌يل وه‌ كه‌مترين مه‌ترسى، ك گشت ئه‌يانه‌يش جوور سه‌ركه‌فتن شماريه‌ێد، يه‌يش بيجگه‌ سه‌ركه‌فتن خود راپرسێ، ئه‌ويش وه‌ ده‌نگداين فيشتر له‌ 90 له‌سه‌د له‌ به‌شداربويه‌يل له‌تى وه‌ به‌ڵێ ئه‌را سه‌روه‌خوه‌يى. دوياێ ئه‌وه‌يش كورد بڕيار ئه‌وه‌ دان داواى مافه‌يل خوه‌يان بكه‌ن ته‌نيا له‌ڕێ دانيشتن و زووان گفتگوو وه‌شيوه‌يگ ئاشتيانه‌و مه‌ده‌نيانه‌ دوير له‌ زووان هه‌ڕه‌شه‌ و جه‌نگ و رخه‌وبردن.

 

بايه‌سه‌ له‌بان لايه‌ن وه‌رانوه‌ريش ئى زووان و ئى شيوازه‌ داشتوود ك كورد ديرێده‌ى، چوينكه‌ به‌غدا دوياێ نزيكه‌ى سه‌ده‌يگ هيمان زووان هه‌ڕه‌شه‌و جه‌نگ و رخه‌وبردن ئه‌يه‌رێده‌ كار و چشتيگ تر له‌ هه‌گبه‌ێ نيه‌ بيجگه‌ ئه‌يه‌!

 

وه‌ل ئه‌وه‌يشا سه‌ركردايه‌تى سياسى كوردستانى هووكار نه‌ڕه‌سين وه‌ هويچ ئاكاميگ وه‌ل به‌غدا به‌ێده‌و ئه‌را ئه‌و ئه‌قڵيه‌ت و ئه‌و زووان زبر پڕ له‌ هه‌ڕه‌شه‌ ك ناتويه‌نێد خوه‌ى وه‌ل دونياێ سه‌رده‌م و ماف ملله‌ته‌يل ريك بخه‌ێد.

 

دوياێ ئى پيشه‌كييشه‌، له‌ باوه‌ڕ ئه‌وه‌سه‌ ك بيجگه‌ هه‌ڕه‌شه‌يل فريه‌و كيشه‌يل فيشتر، پرسياره‌يليگ پڕ نگه‌رانى خوه‌يان ده‌ركه‌فن ك ئايا چاره‌نويس كورده‌يل فه‌يلى چه‌س دوياێ راپرسێ؟!

 

ته‌نيا هويره‌وكردنيگ له‌ عراقيگ به‌تاڵ له‌ كورد يا كوردستانيگ به‌تاڵ‌ له‌ باقى پيكهاته‌يل تر، هه‌ڵه‌يگ كوشنده‌ و تاوان شوفێنيه‌!! ئمجا وجوود كورد ته‌نيا حه‌سر نه‌ويه‌ له‌ خه‌ريته‌ێ جوگرافياى كوردستان و ناوچه‌يل كوردستانى ده‌يشت هه‌رێم، به‌ڵكوو وجوود ديرن له‌ به‌غدا و ناوڕاس و باشوور عراقيش و ئويشنيش وجوود له‌ 10 پاريزگا ديرن.

 

كوردستانيش باس له‌وه‌ ئه‌كا ك حكومه‌ت نه‌ته‌وه‌يى يا تايفى دانامه‌زرنێد و ئه‌گه‌ريش حكومه‌ت عراقى له‌بان هه‌مان قه‌وان خوه‌ێ مه‌ند ئه‌وه‌ كورده‌يل فه‌يلى دويرن له‌ هه‌ر هه‌ڕه‌شه‌يگ و وه‌رده‌وامى ئه‌يه‌نه‌ ژيان ئاسايى خوه‌يان جوور هاووڵاتيه‌يل، وه‌تايبه‌ت له‌و ناوچه‌يله‌ ك شوون باوگ و باپيره‌يليانه‌، مه‌گه‌ر ته‌نيا هه‌ناى ك ده‌نگ سياسيه‌يل تايفه‌چێ و بازرگانه‌يل جه‌نگ به‌رزتر بدێ ك ئه‌وسا دى ئاساييه‌ گشت لايه‌نه‌يل و له‌وانه‌يش كورده‌يل فه‌يلى ترس له‌ دوباره‌كردنه‌وه‌ى له‌ناوبردن وه‌جه‌م(جينۆسايد)داشتوون.

 

ئاشكرايشه‌ ك ريه‌يل سه‌خت و خراويگ ها وه‌رده‌م گشتلايگ و ئه‌وانه‌كيش دژ مافه‌يل ملله‌ت كوردن بايه‌سه‌ له‌بانيان ته‌ماشاێ بارودوخ و مه‌ترسى و نگه‌رانى فه‌يليه‌يل بكه‌ن ك له‌گشت پيكهاته‌يل تر كورد تويش سته‌م هاتن له‌ به‌غدا و ناوڕاس و باشوور عراق وه‌ تومه‌ت ئه‌وه‌گ كورد بوين و بايه‌سه‌ له‌بانيان ياد ئه‌و تاوانه‌يله‌ بكه‌ن ك هاته‌ تويشيان تا بزانن له‌وه‌رچه‌ كورد هه‌وڵ جيايى و سه‌روه‌خوه‌يى ئه‌ياد و له‌وه‌رچه‌ هه‌وڵ ئه‌وه‌ ئه‌ياد له‌ ته‌قلاكردنى قورتار بدێ له‌ كيشه‌و گرفته‌يل وه‌ ئه‌وه‌گ يه‌ك ڕێ هه‌ڵوژنێد ك ئه‌ويش ڕى گفتگووكردن و له‌يه‌كڕه‌سينه‌وه‌ى مه‌نتقيه‌ وه‌خاتر ره‌سين ئه‌را چاره‌سه‌ر ئاشتيانه‌.

عه‌لى حسێن فه‌يلى