هــــه‌واڵ جیــهانى
هه‌واڵگرى فره‌نسا هووكار مه‌ندنه‌وه‌ى ئيران له‌ سوريا ئاشكرا كرد

هه‌واڵگرى فره‌نسا هووكار مه‌ندنه‌وه‌ى ئيران له‌ سوريا ئاشكرا كرد


شه‌فه‌ق نيوز/ رووژنامه‌ى "ئه‌تڵنتيكۆ"ى فره‌نسى گفتگوويگ وه‌ل ئالان روديه‌ ئه‌فسه‌ر وه‌رين له‌ ده‌زگاى هه‌واڵگرى فره‌نسى و جيگر وه‌ڕيه‌وبه‌ر ناوه‌ند توژينه‌وه‌يل هه‌واڵگرى فره‌نسى بڵاو كرد و له‌تى باس له‌ هووكاره‌يل مه‌ندنه‌وه‌ى ئيران كرد ئه‌را وه‌خته‌يل فريه‌يگ و وه‌گووره‌ى توانا له‌ سوريا.

 

رووژنامه‌گه‌ وت: ده‌خاڵه‌ت ئيران له‌ سوريا نزيكه‌ى 30 تا 105 مليار دۆلار هه‌ر له‌سه‌ره‌تاى كيشمه‌كيش تائيسه‌ ته‌كليف كردگه‌و يه‌يش ماناى ئه‌وه‌سه‌ ده‌خاڵه‌تكردنى وه‌ختى نيه‌، وه‌لێ شايه‌ت يه‌كيگ بپرسێد نياز ته‌هران له‌ مه‌ندنه‌وه‌ى له‌ سوريا چه‌س؟ ئه‌و ئامانجه‌يله‌ چه‌ن ك ئه‌خوازێد جيوه‌جييان بكا؟

 

رووژنامه‌گه‌ له‌ زووان روديه‌ وت: ئامانج له‌ مه‌ندنه‌وه‌ى ئيران له‌ مه‌سه‌له‌ى بڵاوكردنه‌وه‌ى فكره‌ى شووڕش ئيرانى له‌ خوه‌رهه‌ڵات ناوين فيشتره‌، ئه‌و رژيمه‌ هوير له‌وه‌ ئه‌كا زياتر ته‌ركيز بخاده‌ بان هيلال شيعه‌ ك له‌ به‌غداوه‌ ده‌س وه‌پى ئه‌كاو ئيجا ديمه‌شق و تاڕه‌سێده‌ به‌يروت.

 

روديه‌ وت: ده‌خاڵه‌ت ئيران له‌ هه‌ر يه‌ك له‌ به‌حره‌ين و يه‌مه‌ن و دامه‌زرانن په‌يوه‌نديه‌يل تازه‌ وه‌ل قه‌ته‌ر ئامانج له‌لى هه‌ڕه‌شه‌كردنه‌ له‌ ئارامى دژه‌ هه‌رێميه‌گه‌ى ك ئه‌ويش سعوديه‌ش و هه‌ر وه‌و خاتريشه‌ پشت وه‌ بنه‌مايه‌يل سه‌ره‌كى ئه‌وه‌سێد ئه‌را دامه‌زرانن بنگه‌ى هه‌ميشه‌يى له‌ ناوچه‌گه‌و له‌وه‌ر ئه‌وه‌يش پشت وه‌ مه‌زه‌و شيعه‌ به‌ساگه‌.