وتـــــار
له‌يرا قسه‌ له‌بان جه‌نگ نيه‌

له‌يرا قسه‌ له‌بان جه‌نگ نيه‌


شه‌فه‌ق نيوز/ كورد باوه‌ڕ وه‌ جه‌نگ و خوه‌ى وه‌ده‌سه‌وداين نه‌يرێد، له‌ماوه‌ى ساڵه‌يل گوزه‌يشت ئاشتيه‌يل فريه‌يگ و جه‌نگ كه‌ميگ تاقيه‌و كردن، كورد ئه‌گه‌ر مه‌يل گرژيه‌يل بياشتيان ده‌روازه‌يل گفتگوو وه‌ واز نه‌يشتيان و نه‌تواسيان بوونه‌ شه‌ريك له‌ ده‌سه‌ڵات له‌ عراق فيدراڵى، يه‌يش ماناى ئه‌وه‌سه‌ كورد رێ خوه‌يان هه‌ڵوژانن.

 

سه‌رچه‌وه‌ى گه‌وراى كيشه‌يل عراق ته‌نيا له‌ ده‌سوه‌رداين ده‌ره‌كى نيه‌، به‌ڵكوو ريشگى ئه‌چێده‌و ئه‌را روشنهويرى و مێژوو ئى وڵاته‌ ك خوه‌نينه‌وه‌ى هه‌ڵه‌يگ ئه‌راى ئه‌كريه‌ێد. له‌ كوردستان قسه‌ له‌بان جه‌نگ ناكريه‌ێد، گشتلايگ وه‌ زووان سه‌رده‌ميانه‌ گفتگوو وه‌ل وه‌رانوه‌را ئه‌كه‌ن و گشت مه‌ردميش زيره‌كن له‌ شيه‌وكردن ماناى ئاسايش ئه‌را گشت.

 

ئمجا هه‌رچه‌نى كوردستان ته‌نيا شوونيگه‌ له‌ڕوێ گه‌شتيارى و شوونيگه‌ ئه‌را ژيان و وچانداين و له‌خوه‌يگرتن گشت عراقيه‌يل، دوينيم ئمڕوو له‌ڕوێ سياسيه‌و گشت لايه‌نه‌يل هه‌وڵ وه‌ده‌سهاوردن ره‌زايه‌ت كورد ئه‌يه‌ن ئه‌را يه‌كلاكردنه‌وه‌ى چاره‌نويس حكومه‌ت ئاينده‌، چوينكه‌ عراق پڕه‌ له‌ كيشمه‌كيش، ته‌نيا له‌ كوردستانيش قسه‌ له‌باره‌ى دامه‌زرانن حكومه‌ت و ئاشتى ئه‌كريه‌ێد.

 

ماوه‌ى دوير و دريژيگه‌ ئه‌و توانا ئه‌را عراقيه‌يل نه‌مه‌نده‌سه‌و كورد وه‌ دوشمن و تومه‌تبار هه‌ميشه‌يى دابنه‌ن له‌ دروسكردن قه‌يرانه‌يل، ئيسه‌ ده‌ركه‌فت ك ده‌سكه‌فته‌يل ناوڕاس و باشوور عراق فه‌قيرى و نه‌وين تواناو زوڵمه‌، يه‌يش ئه‌و روخسار راسكانييه‌سه‌ ئه‌را ناو ناوچه‌يله‌ ك حكومه‌ت به‌غدا حوكمى ئه‌كاو ئه‌وانه‌گ په‌لامار كوردستان دان و قووت ملله‌ت بڕين و گه‌مارۆ چه‌سپانن و تواسن جوور ئه‌و ناوچه‌يله‌ وه‌پى بكه‌ن.

 

ئاشكراس ك كورد چه‌نيگ ئاماده‌س خوليگ تر له‌ گفتگوو و حوكم هاوبه‌ش تاقييه‌و بكه‌ن، وه‌لێ ئاماده‌ نيين روێ له‌ سه‌رچه‌وه‌ى قه‌يرانه‌يل بكه‌ن له‌وه‌ر هويچ چشتيگ.

 

به‌رنامه‌ى ئيمه‌ سووكه‌وكردن قه‌يرانه‌يله‌و به‌رنامه‌ى به‌غدايش دروسكردن قه‌يرانه‌يله‌، ئيمه‌يش خوه‌شاڵيم ئه‌را ده‌رفتيگ ك ئه‌وانه‌گ ئدارى حوكم ئه‌خوازن گووش له‌ داواكاريه‌يل و هوير و ڕا و پيشنياره‌يل هه‌رێم بگرن.

 

كوردستانيه‌يل مه‌سه‌گه‌يان يه‌كلاوه‌ كردن وه‌ ئه‌وه‌گ حكومه‌تيگ ئه‌خوازن خزمه‌تگوزارى ئه‌را گشت عراقيه‌يل پيشكه‌ش بكا، يه‌يش تائيسه‌ روێ نه‌ياگه‌و ئه‌وه‌ ده‌ركه‌فت ك مه‌ينه‌تى گشت رووڵه‌يل ئى وڵاته‌ له‌و ناوچه‌يله‌ ك حكومه‌ت ناوه‌ندى ئداره‌يان ئه‌كا كووتايى نه‌يرێد و مه‌ردم له‌ بارودوخيگ خراو ژيه‌ن.

 

ئمجا ئه‌زموون پشتگووشخستن كيشه‌يل ئه‌وه‌ ئسپات كرد ك دوباره‌وه‌ ئه‌كريه‌ێد له‌ رووژه‌يل ئاينده‌! هه‌ر له‌وه‌ر ئه‌وه‌يش بايه‌سه‌ به‌شدارى له‌ پرووسه‌ى دامه‌زرانن حكومه‌ت ئاينده‌ نه‌كه‌يم وه‌ پێوه‌ره‌يل به‌غدا، به‌ڵكوو وه‌ پێوه‌ره‌يل كوردستان ك مكوڕه‌ له‌بان ده‌سه‌وه‌ركردن مافه‌يل و به‌رژه‌وه‌ندى نه‌ته‌وه‌يل و پيكهاته‌يل.

عه‌لى حسێن فه‌يلى