هــــه‌واڵ عــیراق
هاوپه‌يمان نيشتمانى راپرسى ره‌ته‌و كرد و مه‌رج ئه‌را كۆنگره‌ێ سنى دانا

هاوپه‌يمان نيشتمانى راپرسى ره‌ته‌و كرد و مه‌رج ئه‌را كۆنگره‌ێ سنى دانا


شه‌فه‌ق نيوز/ ليژنه‌ێ سياسى هاوپه‌يمان نيشتمانى له‌نوو ئه‌نجامداين راپرسى ماف بريار چاره‌نويس ئه‌را هه‌رێم كوردستان ره‌ته‌و كرد ئه‌را سه‌روه‌خوه‌يى له‌ عراق و له‌ هه‌مان وه‌خت يه‌كێتى عراقيش وه‌ خه‌ت قرمز تاريف كرد و داواێ دوياخستن كۆنگره‌ێ سنييش له‌ به‌غداێ پاته‌خت كرد تا وه‌ختيگ داعش له‌ گشت خاكه‌يل عراقى راو نريه‌ن.

 

سه‌رچه‌وه‌يليگ له‌ هاوپه‌يمان نيشتمانى ئه‌وه‌ ده‌رخستن ك ليژنه‌ێ گشتى هاوپه‌يمانه‌گه‌ له‌ دانيشتنى باس له‌ سه‌ركه‌فتنه‌يل هيزه‌يل عراقى و نزيكه‌وبوين واده‌ێ سه‌ركه‌فتن كووتايى له‌بان ريكخرياگ ترۆريستى داعش كردگه‌ وه‌ل تاوتوێكردن قوناغ دوياێ داعش.

 

له‌باره‌ێ راپرسى هه‌رێكم كوردستانيش، ئه‌وه‌ ده‌ركه‌فت ك هاوپه‌يمان نيشتمانى ئه‌نجامداين راپرسى ره‌ته‌و ئه‌كاو جوور كاريگ ناده‌ستوورێ تاريفى كرگه‌.

 

جى باسه‌، هاوپه‌يمان نيشتمانى له‌ به‌ياننامه‌يگيش ئاماژه‌ وه‌ ئه‌وه‌ كرد ك واده‌ێ سازكردن كۆنگره‌ێ تايبه‌ت وه‌ يه‌كێتى هيزه‌يل نيشتمانى هه‌وه‌جه‌ وه‌ دوياخستن ديرێد تا وه‌ختيگ وه‌ ته‌مامى داعش له‌ گشت ناوچه‌يل راو نريه‌ێد و باس له‌وه‌يش كرد ك ئى كۆنگره‌ خاستر ئه‌وه‌سه‌ ناوه‌ڕوك و ناونيشانى ئاشكرا بكريه‌ێد وه‌ جووريگ ك پرووسه‌ێ سه‌قامگيرى بته‌وتر بكاو فراوانتريش بدێ و هيزه‌يل تر سياسى و كه‌سايه‌تيه‌يل نيشتمانى كاريگه‌ريش بگرێده‌ خوه‌ێ.